Loma 6 - Tokelauan New Testament

Ko ki Tātou e Ola ona ko Keliho

¹ Ka vēhea ake nei la ki tātou? Ka fai pea lava e ki tātou te agahala, kae ke fakalahi ātili ai te alofa tūnoa o te Atua?

² E hē tatau! Kāfai ki tātou kua hē i lalo o te pule a te agahala — e vēhea la ona haga fai pea e ki tātou te agahala?

³ E hē koutou iloa ko ki tātou uma e fakatahi ma Keliho Iehu e ala i te papatihoga, e fakatahi foki ma ia i tona oti?

⁴ I te papatihoga la o ki tātou, ko ki tātou na oti ma na tanu fakatahi ma Keliho. Ko ki tātou na papatiho kae ke ola ai ki tātou i he ola fou, e vē ona toe fakatū ia Keliho ki te ola i te mana o te Atua te Tamana.

⁵ Auā kāfai ki tātou na tahi ma ia i he oti e vē ko tona oti, ka mautinoa lelei lava la te tahi o ki tātou ma ia i he toetū e vē ko tona toetū.

⁶ Ma e iloa e ki tātou ko o tātou tagata tuai kua tāmate fakatahi ma Keliho i luga o tona hātaulo, kae ke mafai ai o tātou tino agahala ke fakaumatia, ma hē toe kavea ai ki tātou ma pologa a te agahala.

⁷ Auā kāfai ki tātou e oti, ko ki tātou e fakahaoloto mai te mālohi o te agahala.

⁸ Ona ko ki tātou kua oti fakatahi ma Keliho, ko ki tātou foki la e talitonu, ko ki tātou ka ola fakatahi ma ia.

⁹ Auā kua ki tātou iloa ko Keliho kua toe tū mai i te oti, ma ka hē toe oti lele — ka hē toe i ei he pule a te oti ki a te ia.

¹⁰ Ko te mea ia, ona ko tona oti, kua hē toe i ei ai he pule a te oti ki a te ia; kae kua ola i te māfutaga ma te Atua.

¹¹ E tatau foki la ke ia te koutou te manatu, ko koutou kua oti e tuha ai ma te agahala, kae e ola i te māfutaga ma te Atua e ala ia Iehu Keliho.

¹² Ko te agahala e hē tatau ke pule ki outou tino e fano e pala, kae ke uhitaki ai koutou ki nā tuinanauga o koutou.

¹³ Nahe tuku atua foki he itūtino o outou tino ke fakaaogā e vē ni mea faigāluega mo nā mea kino. Kae e tatau ke tuku atu koutou mo te Atua, e vē ko nā tino kua toe fakatutū mai te oti ki te ola, ma tuku kātoa atu outou tagata, ke fakaaogā ma mea faigāluega mo nā mea lelei.

¹⁴ Nahe kavea te agahala ma pule o koutou; auā ko koutou e hē ola i lalo o te tūlāfono, kae e ola i lalo o te alofa tūnoa o te Atua.

Ko he Tiute e o ki tātou ke fai te mea e Tonu

¹⁵ E vēhea la? Ka fai nei la e ki tātou te agahala meamanū ko ki tātou e hē i lalo o te tūlāfono, kae e i lalo o te alofa tūnoa o te Atua? Hēai!

¹⁶ E hē koutou iloa, kāfai e tuku atu outou tagata ma pologa ke uhitaki ki he tino, ko koutou ni pologa ki te tino e uhitaki koutou ki ei — pe a te agahala, e iku ai ki te oti, pe a te uhitaki, e iku ai ki te fakaleleia o te va ma te Atua.

¹⁷ Kae fakafetai ki te Atua, auā e ui lava nae i ei he taimi na fai ai koutou ma pologa a te agahala, ka kua uhitaki koutou ma te loto kātoatoa ki te tūlaga o nā akoakoga na maua e koutou.

¹⁸ Ko koutou na fakahaoloto mai i te agahala ma kua kavea ma kaukauna a te Atua ke faia te mea e tonu.

¹⁹ (E fakaaogā e au te gagana faigōfie, ona ko te hē lava o te koutou iloa.) E i ei he taimi kua teka atu, na tuku kātoa atu ai outou tagata ke fai ma pologa a te faiamio, ma fakaaogā ai ki nā mea kino. Ke vēnā foki la ona tuku kātoa atu i te taimi nei outou tagata ke fai ma pologa a te āmiotonu, ke fakaaogā mo nā mea e paia.

²⁰ I te taimi nae fai ai koutou ma pologa a te agahala, ko koutou nae haoloto e tuha ai ma nā mea e finagalo ki ei te Atua

²¹ He ā nei la he mea lelei ma koutou na maua, i te kua koutou faia o nā mea kua toe māhiahi ai lava koutou i te taimi nei? Ko te ikuga o nā mea iēnā ko te oti!

²² Kae i te taimi nei, ko koutou kua fakahaoloto mai te agahala, ma kua kavea ma pologa a te Atua. Ko te mea a koutou kua maua, ko he ōlaga tautua fakamāoni ki te Atua, ma ko te ikuga, ko te ola e fakavavau.

²³ Auā ko te totogi o te agahala ko te oti, ka ko te meaalofa fōki fua a te Atua, ko te ola e fakavavau, i te māfutaga ma Keliho Iehu to tātou Aliki.