Loma 5 - Tokelauan New Testament

Kua Uma te Fakalelei o te va o ki tātou ma te Atua

¹ Nei la kua uma te fakalelei o te va o ki tātou ma te Atua e ala i te fakatuatua, kua maua ai e ki tātou te fīlēmū i te māfutaga ma te Atua e ala i to tātou Aliki ko Iehu Keliho.

² Kua kaumai e ia ki tātou e ala i to tātou fakatuatua, ki te alofa tūnoa o te Atua, tēia e ola ai nei ki tātou. Ko ki tātou la e fāfifia ona ko te tātou fakamoemoe, ke i ei fakatahi ki tātou i te huhulu pupula mamalu o te Atua.

³ Ko ki tātou foki e fāfifia ki nā puapuagā e maua ai ki tātou, auā kua ki tātou iloa ko te puapuagā e tupu ai te onohai,

⁴ ko te onohai e talia ai ki tātou e te Atua, ma ko te talia o ki tātou e te Atua, e tupu ai te fakamoemoe.

⁵ Ko te fakamoemoe tēnei e hē fakanoanoa ai ki tātou, auā kua liligi mai e te Atua tona alofa ki o tātou loto e ala i te Agaga Paia, te meaalofa a te Atua ki a te ki tātou.

⁶ Auā ka koi vāivai ki tātou ma hē mafaia he mea, ko Keliho na oti mo ki tātou nā tino kino, i te taimi na filifili lava e te Atua.

⁷ Ko he mea e faigatā te oti o he tino ke hui ai he tino āmiotonu. Ma hōvē e i na i ei he tino e ono loto mākeke, ke oti ia ke hui ai he tino lelei.

⁸ Ka kua fakaalia e te Atua tona alofa ki a te ki tātou — ko te taimi ka koi i te agahala ai ki tātou, na oti ai ia Keliho mo ki tātou.

⁹ E ala i tona toto, kua fakalelei ai to tātou va ma te Atua, ma ka hē hili atu nei la te mautinoa ko ki tātou ka fakahao e ia mai te tōkahā o te Atua!

¹⁰ Ko ki tātou nae fili ki te Atua, kae na ia faia ki tātou ma ana uō, e ala i te oti o tona Ataliki. Nei la ko ki tātou ni uō e a te Atua, ka hē hili atu nei la te mautinoa ko ki tātou ka fakahao e ala i te ola o Keliho?

¹¹ Kae e hē ko tēnā oioti; ko ki tātou e fiafia ona ko te mea na fai e te Atua e ala i to tātou Aliki ko Iehu Keliho, tē kua mafai ai ki tātou ke kavea ma uō a te Atua.

Ko Atamu ma Keliho

¹² Ko te agahala na hau ki te lalolagi i he tino e fokotahi, ma ko tana agahala na kaumai ai foki ma te oti. Ona ko te mea tēnei, kua pa ai te oti ki te lalolagi kātoa, auā ko tagata uma lele kua agahala.

¹³ Nae i ei te agahala i te lalolagi ka ko hēki tuku maia ai te Tūlāfono; kae ko te mea e hē i ei he tūlāfono, e hē tūhia ai foki ni agahala.

¹⁴ Kae mai te vāitaimi o Atamu ke pa ki te vāitaimi o Mohe, ko te oti nae pule kātoa ki tagata uma, ke pa lava kinā tino e hēki agahala i te auala na agahala ai ia Atamu, ina kua hē uhitaki ki te fakatonuga a te Atua. I hētahi itū, ko Atamu e tāi vē oi tāi hē vē foki ko te tino na tuku e hau.

¹⁵ Kae ko te meaalofa fōki fua e hē vē ko te agahala a Atamu. E hako e tokalahi na feoti ona ko te agahala a he tino e fokotahi. Kae ko te alofa tūnoa o te Atua e hili lele atu te lahi, ma vēnā tana meaalofa fōki fua mo te tokalahi o tagata e ala i te alofa tūnoa o he tino e fokotahi, ko Iehu Keliho.

¹⁶ Ma e i ei te mea e kehekehe ai te meaalofa a te Atua, ma te agahala a he tino e fokotahi. I te umaga o te agahala o te tino e tokatahi, na fai ai tona ikuga e te Atua e “Hala”; kae i te umaga o te agahala o tagata e tokalahi, na maua mai ai te meaalofa e hēki tatau ke ki lātou maua, ko te “Hē hala.”

¹⁷ E hako ko te agahala a he tino fokotahi te na kāmata ai oi pule te oti, ona ko te tino tēnā e fokotahi. Kae e hē hili atu nei la te lelei o te mea na fai e te tino e fokotahi, ko Iehu Keliho! Ko nā tino uma lele e maua e ki lātou te lahi o te alofa tūnoa o te Atua, ma e fakalelei fua to lātou va ma ia, ka fakaatili to lātou mālolohi e ala ia Keliho.

¹⁸ Ko te mea ia, e vē ona fakahalagia ia tagata uma ona ko he agahala a he tino e fokotahi, e vēnā foki ona māgalo ia tagata uma ma maua e ki lātou te ola, ona ko he gāluega lelei a he tino e fokotahi.

¹⁹ Ma e vē ona kavea te tokalahi o tagata ma tagata agahala ona ko te hē uhitaki o he tino e fokotahi, ka vēnā foki ona fakaleleia to lātou va ma te Atua, ona ko te uhitaki o he tino e fokotahi.

²⁰ Ko te Tūlāfono na tuku mai ke fakaatili ai te lahi o te holi tūlāfono; kae kāfai e lahi te agahala, ka hili atu la te lahi o te alofa tūnoa o te Atua.

²¹ Ko te mea ia, e vē ona pule te agahala e ala i te oti, e vēnā foki ona pule te alofa tūnoa o te Atua e ala i te fakaleleia o to tātou va ma ia, ma takitaki ai ki tātou ki te ola fakavavau e ala ia Iehu Keliho to tātou Aliki.