Loma 4 - Tokelauan New Testament

Ke Fai ia Apelaamo ma Fakatakitakiga

¹ Ka vēhea ake nei la he tātou tala e fai e uiga ki a Apelaamo, te tupuna o ki tātou tagata Iutaia? Ni a te na mafai ke fai e ia lava tautahi?

² Kāfai te va o ia ma te Atua na fakalelei ona ko ana gāluega nae fai, nae tatau la ke i ei he mea ke fāfia ai — kae e hē i mua o te Atua.

³ E lea mai te tuhituhiga paia, “Ko Apelaamo nae talitonu ki te Atua, ma ko tona fakatuatua na fakalelei ai e te Atua tona va ma ia.”

⁴ Ko te tino e faigāluega e maua tona totogi, kae e hē takua tona totogi ko he meaalofa, ka ko he mea e maua mo tana galue.

⁵ Kae ko nā tino e fakalagolago ki te fakatuatua kae hē ko a lātou gāluega e fai, ma talitonu ki te Atua tē e ia fakamāgaloa nā tino agahala, ko te fakatuatua la tēnei te taulia i te kikila a te Atua, e mafai ke fakalelei ai to lātou va ma ia.

⁶ Ko te uiga ia o te kupu a Tavita, i te leaga fakatatau ki te fiafia o te tino kua fakalelei e te Atua tona va ma ia, e tuha lava pe hēki i ei ni ana gāluega na fai.

⁷ “Amutia nā tino e fakamāgalogia a lātou holitūlāfono, ma holoi kehea a lātou agahala!

⁸ Amutia te tino ka hē faitaua ana agahala e te Aliki.”

⁹ Ko te fakamanuiaga nei tēnei na lea ai ia Tavita e mo nā tino oioti kua uma te pelitome? Hēai! E fakatatau foki ki nā tino e hēki pelitomea. Auā kua ki mātou hiki atua te kupu mai te tuhituhiga paia e vē mai, “Ko Apelaamo nae talitonu ki te Atua, ma ko tona fakatuatua na fakalelei ai e te Atua tona va ma ia.”

¹⁰ Ko anafea na tupu ai te mea tēnei? Na tupu nei ka kua uma ai te pelitome o Apelaamo pe hēai? Na tupu ka ko hēki pelitomea ai.

¹¹ Ko Apelaamo na fātoā pelitome mulimuli, ma ko tona pelitome na fai ma fakailoga ke fakailoa ai ko tona fakatuatua, te na fakalelei ai e te Atua tona va ma ia. Ko Apelaamo la, ko te tamana fakateagaga ia o ki lātou uma e talitonu ki te Atua, ma kua fakalelei e te Atua to lātou va ma ia, e ui lava ko ki lātou ko hēki pelitomea.

¹² Ko ia foki ko te tamana o ki lātou kua uma te pelitome, ko tona uiga, ko nā tino e hē gata i te kua uma o te pelitome, ka nae ola foki i he ōlaga fakatuatua e vē ko te ōlaga nae ola ai ia Apelaamo, ka ko hēki pelitome ai.

Ko te Folafolaga a te Atua e maua e ala i te Fakatuatua

¹³ I te folafolaga e te Atua ki a Apelaamo ma ona lāpuna ko te lalolagi ka e o ia, e hēki ia faia te mea tēnei ona ko Apelaamo nae uhitaki ki te Tūlāfono, kae ona nae talitonu, ma na fakaleleia ai te va o ia ma te Atua.

¹⁴ Auā kāfai te mea kua folafola e te Atua ka fōki oioti ki a nā tino e uhitaki ki te Tūlāfono, ko tona uiga e hēai he aogā o te fakatuatua, ma ko te folafolaga a te Atua e hēai hona uiga.

¹⁵ Ko te Tūlāfono e ala mai ai te tōkahā o te Atua; kae kāfai e hēai he tūlāfono, e hēai foki he holitūlāfono.

¹⁶ Ma ko te folafolaga la na fakavae i te fakatuatua, kae ke fakamautū ai te folafolaga, ko he meaalofa fōki fua e a te Atua ki lāpuna uma o Apelaamo — e hē nā mo ki lātou e uhitaki ki te Tūlāfono, kae vēnā foki ki lātou e talitonu e vē ko Apelaamo. Auā ko Apelaamo, ko te tamana fakateagaga ia o ki tātou uma lele;

¹⁷ e vē oi tūhia i te tuhituhiga paia, “Kua kō faia koe ma tamana o mālō e lahi.” Ko te folafolaga la e lelei i te kikila a te Atua, te Atua nae talitonu ki ei ia Apelaamo — te Atua e ia toe fakatutūa nā tino kua oti, ma ko tana fakatonuga e maua ai te ola e nā mea nae hēki i ei muamua.

¹⁸ Ko Apelaamo nae talitonu ma nae i ei tona fakamoemoe, e ui lava nae hē faigōfie mo ia, ma na kavea ai ia, “ko te tamana o mālō e lahi.” E vē oi lea mai te tuhituhiga paia, “Ka tokalahi nā lāpuna o koe e vē ko te lahi o nā fetu.”

¹⁹ Ko Apelaamo i te taimi tēnā, kua tāli kātoa tona helau tauhaga kae ko tona fakatuatua e hēki fakaitiitia lele kāfai e māfaufau ki tona tino kua hē mafaia he mea, pe ko te tūlaga i te hē fai tama o Hala.

²⁰ E hēki teka kehe lele tona fakatuatua ma e hēki māhalohalo lele foki ki te folafolaga a te Atua; ko tona fakatuatua nae maua lahi ai e ia te mālohi, ma nae viviki ake ai ia ki te Atua.

²¹ Na mautinoa lelei lava e Apelaamo e mafai e te Atua oi fakataunuku te mea kua uma te ia folafolagia.

²² Ko te mea ia na kavea ai tona fakatuatua ma mea, “na fakalelei ai e te Atua tona va ma ia.”

²³ Ko te fakakupuga, “na fakalelei e te Atua tona va ma ia” e hēki tūhia mo Apelaamo oioti.

²⁴ Na tūhia foki mo ki tātou, ki tātou iēia ka fakaleleia e te Atua to tātou va ma ia, ma e talitonu ki tē na ia toe fakatū maia mai te oti, ia Iehu tō tātou Aliki.

²⁵ Ona ko a tātou agahala, na tuku atu ai ia e te Atua ke oti, ma na toe fakatū mai ki te ola, kae ke fakalelei ai to tātou va ma ia.