Loma 15 - Tokelauan New Testament

Fai nā mea ke Fiafia ai iētahi Tino kae hē ko Koutou

¹ Ko ki tātou iēia e mālolohi i to tātou fakatuatua, e tatau ke onohai i nā mea e hē kātoatoa ai nā tino vāivai. Nahe kavea ma mea ke fiafia ai ki tātou.

² E tatau ke fai e ki tātou uma nā mea ke fiafia ai iētahi kua talitonu ki te Atua, kae ke kavea ma mea e mālohi ātili ai to lātou fakatuatua.

³ Auā e hēki faia e Keliho ni mea ke fiafia ai lava ia. Kae e vē oi lea mai te tuhituhiga paia, “Ko a lātou kupu tau fakakino na lafo atu ki a te koutou, kua pakukū uma mai ki oku luga.”

⁴ Ko nā mea uma kua tūhia i nā Tuhituhiga Paia, na tūhia ke akoako ai ki tātou, kae ke maua ai e ki tātou te fakamoemoe, e ala i te onohai ma te fakamālohi, e ki tātou maua mai i nā Tuhituhiga Paia.

⁵ Ke kavea te Atua, te puna o te onohai ma te fakamālohi, ma mea e tahi ai te manatu ia te koutou, ona ko te koutou mulimuli ki nā fakatakitakiga a Keliho Iehu,

⁶ kae ke mafai ai koutou fakatahi ke viviki ake i te leo e tahi, ki te Atua ma te Tamana o tō tātou Aliki ko Iehu Keliho.

Ko te Tala Lelei ki Tagata Nukukehe

⁷ Talia la e tētahi tētahi, ke maua ai he vīkiga mo te Atua, e vē ona talia koutou e Keliho.

⁸ Auā e lea atu au ki a te koutou, ko te ōlaga tautua o Keliho nae mo tagata Iutaia, ke iloa ai ko te Atua e fakamāoni, ke fakataunuku ana folafolaga ki o lātou tupuna,

⁹ ma ke mafai ai ia tagata nukukehe ke ki lātou vīkia te Atua, ona ko tona alofa fakahao. E vē oi tūhia i nā Tuhituhiga Paia, “Ma ka vīkia koe e au i te mea e i ei ai ia tagata nukukehe; ka pehe au i nā vīkiga ki a te koe.”

¹⁰ E toe lea vē mai foki, “Koutou ke fiafia, tagata nukukehe, fakatahi ma tagata filifilia o te Atua!”

¹¹ Ma toe lea mai vē, “Ke viviki atu ki te Aliki, koutou tagata nukukehe uma; ke viviki atu ki a te ia, koutou tagata o mālō uma!”

¹² Oi lea mai foki ia Ihaia, “Ka hau he lāpuna o Iehe ka hau ke pule ki tagata nukukehe, ma ka tuku atu ki ona luga to lātou fakamoemoe.”

¹³ Ke fakatumulia koutou e te Atua, te puna o te fakamoemoe, i te fiafia ma te fīlēmū e ala i te koutou fakatuatua, kae ke tupu ai pea te koutou fakamoemoe, i te mana o te Agaga Paia.

Ko te Ala kua hē popoi ai ia Paulo i tana Tuhi

¹⁴ Oku uho, e mautinoa e au ko koutou e tumu i te lelei, kua ia te koutou te mālamalama, ma kua koutou mafaia oi akoako tētahi ki tētahi.

¹⁵ Kae e i ei iētahi mea, kua hē popoi lele au oi tuhi atu ai ma fakamanatu atu ki a te koutou. Kua hē popoi au ona ko te avanoa kua tuku mai e te Atua,

¹⁶ ke kavea ai au ma kaukauna a Keliho Iehu ke galue mo tagata nukukehe. Ko au e tautua e vē he ohitāulaga i te tālakiga o te Tala Lelei mai te Atua, kae ke ofo atu ai e te Agaga Paia ia tagata nukukehe ma tāulaga e fiafia ai te Atua.

¹⁷ I te māfutaga ma Keliho Iehu, kua maua ai e au te loto fāfia i taku tautua ki te Atua.

¹⁸ Ko au ka hē popoi lele ma ka tautala oioti lava ki nā mea kua fai e Keliho kui mai ia te au, ke takitaki ai ia tagata nukukehe ke uhitaki ki te Atua. Kua fai e ia te mea tēnei e ala i nā kupu ma nā gāluega fakatino,

¹⁹ i te mana o nā vāvega ma nā mea ofoofogia, ma i te mana o te Agaga o te Atua. Ma kua uma te tālaki e au te Tala Lelei ki a Keliho, e kāmata mai i Ieluhalema ke pa ki Ilulikou.

²⁰ Ko te mea e naunau au ki ei, ke tālaki atu te Tala Lelei ki nā koga ko hēki lagona ai te igoa o Keliho, kae ke nahe ati ake ai e au ki luga o he fakavae na kāmata e hētahi tino.

²¹ E vē oi lea mai te tuhituhiga paia, “Ko nā tino e hēki fakailoa ki ei e uiga ki a te ia, ka ki lātou kitea ia; ma ko nā tino ko hēki ki lātou lagona lele e uiga ki a te ia, ka ki lātou iloa.”

Ko te Fuafuaga a Paulo ke Āhiāhi ki Loma

²² Ma ko tēnei te māfuaaga nae hē mafai ai au ke āhiāhi atu ki a te koutou i te lahi o taimi.

²³ Kae nei kua uma aku gāluega i nā kogāfenua iēnei, ma e ona kua lahi nā tauhaga nae fakatalitali ai au ke fanatu oi kikila koutou,

²⁴ kua i ei ai he fuafuaga ko au ka fanatu. Ko au e fofou ke afe atu i taku malaga ki Hepania, ma ke fehoahoani koutou ke vave pa au ki ei, kāfai e uma he tātou māfutaga fiafia mo hina taimi.

²⁵ Kae i te taimi nei, ko au ka fano ki Ieluhalema ke fehoahoani ki tagata o te Atua e nonofo i kinā.

²⁶ Auā kua tonu i nā Ekalehia i Maketonia ma Akaia ke kave ha lātou tāulaga ke fehoahoani ki nā tino mātitiva o te Atua i Ieluhalema.

²⁷ Ko te tonu tēnā e a ki lātou lava; kae ko he mea tatau auā he tiute e o ki lātou ke fehoahoani ki ei. E vē ona manuia ia tagata nukukehe i nā fakamanuiaga fakateagaga na maua e tagata Iutaia, e tatau ai foki ke fakaaogā nā fakamanuiaga i nā mea tau te ōlaga e maua e tagata nukukehe, ke fehoahoani ai ki tagata Iutaia.

²⁸ Ka uma te kō faia o te mea tēnei ma tuku atu ki a te ki lātou nā tupe uma na ao mo ki lātou, oi fano ai au ki Hepania ma afe atu ki a te koutou i toku auala ki ei.

²⁹ Ma kāfai au e pa atu, e mautinoa e au ko au e fanatu ma te kātoaga o nā fakamanuiaga mai ia Keliho.

³⁰ Ko au la e fakatagi atu ki a te koutou, oku uho, e ala i te Aliki ko Iehu Keliho ma te alofa e hau mai te Agaga: ke kau fakatahi ki tātou ma tatalo fakatauanau ki te Atua, mo au.

³¹ Tatalo ke puipui malu au mai nā tino hē talitonu i Iutea ma ke talia taku galue tautua i Ieluhalema e tagata o te Atua.

³² Ma ko au la ka fanatu ma te loto fiafia, pe kāfai ko te finagalo ia o te Atua, ma ke maua e au he fakamālōlōga fiafia i toku māfuta ma koutou.

³³ Ke fakatahi te Atua, te puna o te fīlēmū, ma koutou uma lele. Amene.