Loma 14 - Tokelauan New Testament

Nahe Koutou Fakamahino atu ki iētahi Tino

¹ Talia e koutou nā tino e vāivai i te fakatuatua, kae nahe koutou faitio ki o lātou talitonuga tau tokatahi.

² Ko te talitonuga o iētahi tino e kakai ai ki ho he mea, kae ko nā tino e vāivai i te fakatuatua e kakai oioti ki nā fuālakau fatoaga.

³ Nahe faitio te tino e kai ki ho he mea ki te tino e kai oioti ki nā fuālakau fatoaga; nahe fakamahino foki te tino e kai oioti ki nā fuālakau fatoaga ki te tino e kai ki ho he mea; auā kua talia e te Atua te tino tēnā.

⁴ Ko ai nei koe ke fakamahino ai e koe nā kaukauna a hētahi tino? Nā ko te lātou Matai lava oioti te ia faia te tonu pe hako a lātou mea e fai pe hēai, ma ka fehoahoani te Aliki ki a te ki lātou ke mautinoa ko a lātou mea e fai e hako.

⁵ Ko iētahi tino e manatu e i ei he aho e tāua atu i lo iētahi aho, ka ko iētahi e manatu e tutuha uma lava nā aho. E tatau koutou tau tokatahi, ke mautū outou tāofi ki nā mea kua talitonu koutou ki ei.

⁶ Ko nā tino e fakatāua atu e ki lātou he aho e fokotahi, e fai e ki lātou ke vīkia ai te Aliki; ko nā tino e kakai ki ho he mea, e fai e ki lātou ke vīkia ai te Aliki, auā e kavatu e ki lātou te fakafetai ki te Atua mo nā meakai. Ko nā tino e hē kakai ki he itūkāigā meakai, e fai e ki lātou ke vīkia ai te Aliki, ma e kavatu e ki lātou te fakafetai ki te Atua.

⁷ Ko ki tātou e hē ola mo ki tātou lava oioti, ma e hē oti foki ki tātou mo ki tātou lava oioti.

⁸ Kāfai ki tātou e ola, ko ki tātou e ola mo te Aliki, ma kāfai ki tātou oti, ko ki tātou e oti mo te Aliki. Ko te mea ia, pe ko ki tātou e ola pe oti, ko ki tātou e a te Aliki.

⁹ Auā ko Keliho na oti ma toe ola mai, kae ke kavea ai ia ma Aliki mo tagata ola, vēnā ma tagata oti.

¹⁰ Ko koutou la iēnā e kakai oioti ki nā fuālakau fatoaga — he ā te fakamahino atu ai koutou ki iētahi tino Kelihiano? Ma ko koutou iēnā e kakai ki ho he mea — he ā te faitio tauanoa ai koutou ki iētahi uho Kelihiano? Ko ki tātou uma lele ka tutū i mua o te Atua ke fakamahino e ia.

¹¹ I te tuhituhiga paia, kua vāgana te Aliki, “E vē ona mautinoa lelei ko au ko te Atua e ola pea lava ka vēnā foki ona mautinoa lelei ko tagata uma ka tōtutuli ki lalo, ma taufai viviki ake ki toku igoa.”

¹² Ko ki tātou tau tokatahi uma la, ka tali atu lava te tino ki te Atua, e tuha ai ma ana mea na fai.

Nahe Faia ni Mea ke Pakukū ai Iētahi Tino ki te Agahala

¹³ Ko te mea ia, keina fakauma loa te fakamahino atu o tētahi ki tētahi. Kae e tatau ke tonu loa i tō māfaufau ke nahe toe faia lele e koe he mea ke tau tevateva ai ho uho ia Keliho, pe pakū ai foki ki te agahala.

¹⁴ Ko te māfutaga a āku ma te Aliki ko Iehu, kua kō mautinoa ai e hēai he meakai e hē mamā i nā tūlaga tau tāpuakiga; kae kāfai koe e talitonu e i ei ni meakai e hē mamā, ka hē mamā lava la mo koe.

¹⁵ Kāfai e i ei ni uho Kelihiano e āfāina ona ko nā meakai e kai ai koe, ko tona uiga kua hē fakavaea nā mea a koe e fai i luga o te alofa. Nahe kavea nā mea e kai koe ki ei, ma mea e āfāina lele ai he tino na maliu ia Keliho mo ia!

¹⁶ Nahe kē faia lele he mea ke taku kino ai he mea e kē iloa e lelei.

¹⁷ Auā ko te Mālō o te Atua e hē ko nā mea e kai ma nā mea e inu, kae e fakatatau ki te faia o nā mea e fiafia ai te Atua, e fakatatau ki te maua o te ola fīlēmū, e fakatatau ki te maua o te fiafia moni. Ko nā mea uma iēnei e maua mai i te Agaga Paia.

¹⁸ Ma kāfai koe e tautua ki a Keliho i te auala tēnei, ka fiafia ai te Atua ma fakaaloalo atu ia tagata ki a te koe.

¹⁹ Ko te mea ia, ko ki tātou e tatau ke taumafai pea lava ke ola i te fīlēmū ma fehoahoani tētahi ki tētahi, ke taufai mālolohi ai.

²⁰ Nahe fakahēaogāgia e koutou nā mea na fai e te Atua, ona ko nā meakai. Ko nā meakai uma lele e lelei ke kai, kae e hehē te kai ki he mea kāfai ka kavea tēnā ma mea e pakū ai hētahi tino ki te agahala.

²¹ E hako te hē kakai ki nā kanofi o nā manuvaefa, te hē inu ki te uaina, pe ko te fai o he mea e tau tevateva ai ho uho ia Keliho.

²² Ko nā mea kua talia e koe e uiga ki te mea tēnei, ko he mea lava i te va o koe ma te Atua. Amutia nā tino e hēai lele he fakaatu kāfai e fai e ki lātou nā mea e ki lātou iloa e hako!

²³ Kae kāfai e i ei ho lātou loto māhalohalo ki a lātou mea e kai, ka taku halagia ki lātou e te Atua kāfai e kakai ki ei, auā ko a lātou mea e fai e hē fakavaegia i luga o te fakatuatua. Ma ko ho he mea e hē fakavaea i te fakatuatua ko he agahala tēnā.