Loma 13 - Tokelauan New Testament

Ko nā Tiute tau te Mālō

¹ Ke uhitaki ia tagata uma tau tokatahi ki nā tūlāfono fakatemālō, auā e hē mafai ke i ei he mālō kāfai e hē finagalo ki ei te Atua, ma ko nā mālō e tutū nei, na tuku ki ei e te Atua.

² Ko ai lava e teteke ki he mālō e tū nei, kua teteke ia ki te mea na fakatonu e te Atua; ma ko ai lava e ia faia te mea tēnei, ka kavea ia ki mua o te fakamahinoga.

³ Auā ko nā tino e i ei te pule, e hē tatau ke mātataku ai ki lātou e faia nā mea e lelei, kae vaganā ai ki lātou e faia nā mea e kino. E fofou koutou ko koutou ke nahe mātataku i nā tino e i ei te pule? Fai la nā mea e lelei, oi taku leleia ai koutou e ki lātou,

⁴ auā ko ki lātou ni kaukauna e a te Atua, e gālulue mo te koutou lelei. Kae kāfai e koutou faia nā mea e kino, e tatau la koutou ke mātataku, auā e ia te ki lātou te pule ke fakahala ai koutou. Ni kaukauna e a te Atua ki lātou, ma e fakatino e ki lātou te fakahalaga a te Atua mo ki lātou e faia nā mea e kino.

⁵ Ona ko te mea tēnei, e tatau ai koutou ke uhitaki ki a te ki lātou e i ei te pule — e hē gata ona ko te fakahalaga a te Atua, kae ko he mea foki e iloa lelei lava e koutou e tatau ke koutou faia.

⁶ Ko te mea foki ia e totogi ai autou lāfoga, auā ko te mālō e galue mo te Atua kāfai e fakatino uma o lātou tiute.

⁷ Totogi la nā tupe e nofo kaitālafu ai koutou ki ei; totogi ki ei nā itūkāigā lāfoga uma e tatau ke koutou totōgia, ma kavatu ki a te ki lātou uma te fakaaloalo ma te āva e tatau ai.

Ko nā Tiute o Tētahi ki Tētahi

⁸ Nahe i ei lele he tiute taukave o koutou ki he tino — oioti lava te koutou tiute, ko te alofa o tētahi ki tētahi. Ko te tino e fai e ia te mea tēnei, kua uhitaki ia ki te Tūlāfono.

⁹ Ko nā fakatonuga a te Atua e vē mai, “Ia koe nahe mulilua; ia koe nahe tāmate tino; ia koe nahe kaihohoa; ia koe nahe mānumanu ki nā mea a hētahi tino” — ko iēnei fakatonuga ma iētahi kua hē tākua, e aofia uma i te fakatonuga tēnei e fokotahi, “Alofa ki tō tuākoi e vē oi alofa koe ki a te koe lava.”

¹⁰ Kāfai koe e alofa ki iētahi tino, ka hēai lele hau mea kino e fai ki ei; kāfai la koe e alofa, ko tona uiga kua uhitaki koe ki te Tūlāfono kātoa.

¹¹ E tatau ke fai e koe te mea tēnei, auā e iloa e koe kua pa ki te taimi e tatau ke ala ai koe mai tau moe e fai. Auā ko te taimi ka maua ai e ki tātou te fakaolataga e pili lele mai nei i lo te taimi na muamua talitonu ai ki tātou.

¹² Kua loa te pō, ma kua tāli pa lele ki te ao. Ke i na tuku loa e ki tātou nā mea e fai i te pōuli, kae hiki ake nā meatau e tau ai i te mālamalama.

¹³ Ke lelei a tātou āmio, e vē ko nā tino e nonofo i te mālama o te ao — e hēai he fai pātī hē taupulea pe konanā, e hēai ni āmio mātagā uiga kehe pe faiamio, e hēai he tauaimiha pe fuā.

¹⁴ Kae tātou hiki ake nā meatau a te Aliki ko Iehu Keliho, ma nahe ki tātou toe manatu ki nā uiga mātagā fakatetagata ma te fakamaliega o ona tuinanauga.