Loma 12 - Tokelauan New Testament

Ko te Ōlaga Tautua ki te Atua

¹ Ko te mea ia oku uho, ona ko te lahi o te alofa fakahao o te Atua mo ki tātou, e talohaga atu ai au ki a te koutou ke ofo atu outou tagata ma tāulaga ola ki te Atua, e mamā ma e fiafia ia ki ei. Ko te tāpuakiga moni tēnei e tatau ke ofo atu e koutou ki te Atua.

² Koutou nahe mulimuli ki faiga a te lalolagi, kae ke līua koutou e ala i te hūia kātoatoa e te Atua o outou māfaufau. Oi ka iloa tonu ai e koutou te finagalo o te Atua — te mea e gali ma e fiafia ai ia, ma e kātoatoa te lelei.

³ Ma e ona ko te meaalofa a te Atua ki a te au, e lea vēnei atu ai au ki a te koutou tau tokatahi uma: Ia koutou lele nahe manatu ko koutou e hili atu te lelei i lo i te tūlaga moni e i ei ai koutou. Kae e tatau koutou ke tukutuku ki lalo outou manatu, ma fuafua te tūlaga e i ei koutou ki te lahi o te fakatuatua kua fōki atu e te Atua ki a te koutou.

⁴ Ko te tino o te tagata e lahi ona vāega, ma ko nā vāega uma e kehekehe a lātou gāluega.

⁵ E vēnā foki lava ki tātou, e ui e tokalahi ki tātou, kae e tahi te tino i te māfutaga ma Keliho. Ko ki tātou uma ni vāega takitahi e hohoko tētahi ki tētahi i te tino e tahi.

⁶ Ko te mea ia, e tatau ke fakaaogā e ki tātou nā meaalofa kehekehe kua ki tātou maua, e tuha ai ma te alofa tūnoa o te Atua. Kāfai ko te tātou meaalofa ko te folafola o te fekau a te Atua, e tatau ke fai e ki tātou fuafua ki te fakatuatua kua ia te ki tātou;

⁷ kāfai ko te tautua, e tatau ki tātou ke tautua; kāfai ko te akoako, e tatau ki tātou ke akoako;

⁸ kāfai ko te fakamālohi ki iētahi tino, e tatau ke fai te mea tēnā e ki tātou. Kāfai e fōki ni a tātou mea mo iētahi tino, e tatau ke fōki ke lava ma totoe; kāfai e ia te ki tātou te pule, e tatau ki tātou ke gālulue ma te mālohi; kāfai ki tātou e agalelei ki iētahi tino, e tatau ke fai ma te fiafia.

⁹ Ko te alofa e tatau ke kātoatoa te moni. Inoino ki te mea e kino, tāofi mau ki te mea e lelei.

¹⁰ Ke alofa tētahi ki tētahi e vē ni uho, ma tauva ke hili atu te fakaaloalo o tētahi i lo tētahi.

¹¹ Koutou nahe fakavāivai lele, kae ke mumū koutou e vē he mōlī i te Agaga, ma tautua ki te Aliki ma te loto kātoa.

¹² Ke kavea te koutou fakamoemoe ma mea e fiafia ai pea lava koutou, onohai i nā puapuagā, ma tatalo i taimi uma.

¹³ Kave he vāega o autou mea ke ola ai outou uho Kelihiano mātitiva, ma talia i loto o outou fale nā tino kehe.

¹⁴ Lea ki te Atua ke fakamanuia nā tino e faikino atu ki a te koutou — io, lea ke fakamanuia kae nahe fakamālaia.

¹⁵ Fiafia fakatahi ma ki lātou e fiafia, faitatagi fakatahi ma ki lātou e faitatagi.

¹⁶ Koutou ke ola fealofani. Koutou nahe fia hihili, kae fakamāhani ki nā tino loto maulalo. Koutou nahe fia popoto.

¹⁷ Nahe koutou tauia i he hehē he hehē o he tino ki a koutou, kae taumafai ke fai e koutou nā mea e manatu ia tagata uma e lelei.

¹⁸ Fai uma nā mea e koutou mafaia, ke mafai ai oi maua he ōlaga fīlēmū i te va o koutou ma iētahi tino uma lele.

¹⁹ Oku uho, ia koutou lele nahe tauimahui, kae tuku vē ki te tōkahā o te Atua ke ia tauia. Auā e lea mai te tuhituhiga paia, “Ko te tauimahui e āku, ka kō toe tauia lava, kua vāgana ai te Atua.”

²⁰ E lea mai foki vēia, “Kāfai nā fili o koutou e fia kakaia, fafaga; kāfai e fia inu, fakainu; auā ko te faiga tēnei ka mu ai ki lātou i te māhiahi.”

²¹ Nahe fakatōkilalogia lele koutou e te kino, kae fakatōkilalo te kino e te lelei.