Loma 11 - Tokelauan New Testament

Ko te Alofa Fakahao o te Atua mo Ihalaelu

¹ Ko taku fehili: Na teteke nei e te Atua ona lava tagata? E hēai! Ko au foki ko he Ihalaelu, he lāpuna e o Apelaamo, mai te puikāiga o Peniamina.

² E hēki tetekea e te Atua ona tagata na ia filifilia mai te kāmataga. E iloa e koutou te mea e tūhia i te tuhituhiga paia, ki te fakatagi a Elia ki te Atua e uiga ki a Ihalaelu:

³ “Te Aliki, kua tāmate e ki lātou au pelofeta ma talepe ki lalo ō fata faitāulaga; toe lava ko au te koi totoe, ma e taumafai ki lātou te tāmate au.”

⁴ Na vēhea la te tali a te Atua ki ei? “Kua fakahao e au mo oku, nā tino e fitu afe e hēki ifo ki te atua pepelo ko Paala.”

⁵ E vēnā foki lava te mea e i ei nei: e i ei nā tino tokaititi e totoe o ki lātou kua filifilia e te Atua i tona alofa tūnoa.

⁶ Ko tana filifiliga e fakavae i luga o tona alofa tūnoa, kae hē ona ko a lātou gāluega na fai. Auā kāfai te filifiliga a te Atua e fakavae i luga o gāluega a tagata e fai, tona uiga ko tona alofa tūnoa la e hē ko he alofa tūnoa moni.

⁷ Oi vēhea ai? E hēki maua e tagata Ihalaelu te mea nae hakili e ki lātou. Ko te vāega tokaititi na filifilia e te Atua, te na ki lātou mauagia, kae ko iētahi tino kua makaka nā loto,

⁸ e vē oi tūhia, “Kua fakatuka e te Atua o lātou māfaufau ma o lātou loto; ke pa mai lava ki te aho nei, e hē kitea e o lātou mata pe lagona e o lātou taliga.”

⁹ Ma e lea mai ia Tavita, “Ke kavea a lātou faigākai ma māilei ke haihaitia ai ki lātou; ke hīhīga ai ki lātou, ma ke fakahalagia ai!

¹⁰ Ke fakapōulitia o lātou mata kae ke hē ki lātou kitea; ma ke pīpiko o lātou tua i o lātou fakafītāuli i taimi uma.”

¹¹ Ko au la e fehili: Na hīhīga nei ma pakukū ma hēki mafai ke toe tutū ki luga? Hēai! Kae ona kua agahala ki lātou, kua maua ai e tagata nukukehe te fakaolataga, ke fai ma mea e tupu ai te loto kino i tagata Ihalaelu.

¹² Ko te agahala a tagata Iutaia kua maua ai te lahi o fakamanuiaga e te lalolagi, ma ko to lātou mātitiva i te fakateagaga, kua maua ai te lahi o fakamanuiaga e tagata nukukehe. E vēhea ake nei la te lahi atu lele o nā fakamanuiaga e maua kāfai e tau kātoa i loto te nūmela o tagata Iutaia uma!

Ko te Fakaolataga mo Tagata Nukukehe

¹³ Ko au e tautala atu i te taimi nei ki a te koutou tagata nukukehe. Ona ko au ko he apohitolo ki tagata nukukehe, ko au e fāfia lahi i taku gāluega,

¹⁴ kae ke fai ma mea e tupu ai te lotokino i oku tagata, ma mafai ai ke fakaola ni tino o ki lātou.

¹⁵ Auā kāfai ko te tetekega o ki lātou e te Atua kua fai ma mea e liliu ai te lalolagi ki te Atua, e vēhea nei la kāfai e toe taliagia ki lātou e te Atua? Ka vē lava ki lātou ni tino oti kua toe ola.

¹⁶ Kāfai te vāega o te paluga falaoa muamua e ofo atu mo te Atua, ko tona uiga ko te falaoa kātoa e a ia foki; ma kāfai nā aka o he lākau e ofo atu mo te Atua, ko nā lālā uma e a ia foki.

¹⁷ Ko iētahi o lālā o te ōlive e tauhi lelei, kua tagau kehe ma kua hohoko ki ei he lālā o te ōlive ola vale. Ko koutou tagata nukukehe e vē ko te ōlive ola vale, ma i te taimi nei kua maua fakatahi e koutou na fakamanuiaga ona ko koutou kua kavea ma vāega o te ōlive e tauhi lelei.

¹⁸ Ko te mea ia, koutou nahe kikila fakatauemu ki a te ki lātou na tagau kehe e vē ni lālā. E vēhea ona fāfifia koutou? Ko koutou kua nā ko he lālā; e hē fehoahoani koutou ki nā aka — ko nā aka te fehoahoani atu ki a te koutou.

¹⁹ Kae ka ono lea vē koe, “Io, kae ko nā lālā na tagau kehe kae ke hui ai e au ki lātou.”

²⁰ E hako. Na tagau kehe ona e hēki talitonu, kae ko koe e tūmau pea ona ko koe e talitonu. Ia koe la nahe fāfia, kae ke lagona e koe te mataku.

²¹ Auā e hēki fakahaoa e te Atua nā lālā moni, ma ātonu ka hē ia fakahaoa foki koe.

²² E ki tātou kiteagia i kinei te agalelei ma te fakahāuā o te Atua. E fakahāuā ki a te ki lātou kua pakukū ki te agahala, kae agalelei ki a te koutou — pe kāfai e tūmau pea koutou i tona alofa. Kae kāfai e hēai, ko koutou foki la ka tagau kehe.

²³ Ma kāfai nā lālā e kāmata oi toe fakatuatua, ka toe tuku atu ki lātou ke fai ma vāega o te lākau tēnā; auā e mafai te mea tēnā ke fai e te Atua.

²⁴ Ko koutou tagata nukukehe e vē ko te lālā o te ōlive ola vale e gagau kehe ma hohoko ki te ōlive e tauhi lelei, e ui lava ko he mea tēnei e hē tuha ma te natula o mea. Ko tagata Iutaia e vē ko te ōlive e tauhi lelei; ma e faigōfie lele i te Atua oi toe hohoko nā lālā iēnei na tagau kehe, ki te lākau lava na tagau mai ai.

Ko te Alofa Fakahao o te Atua ki Tagata Uma

²⁵ Oku uho, e i ei te meamoni lilo e fofou au ke koutou iloa, ona e fehoahoani ke tāofiofi ai koutou mai te manatu ko koutou e popoto. Ko tēnei la; ko te loto makaka o tagata Ihalaelu e hē tūmau, ma e fātoā uma kāfai kua kātoatoa te nūmela o tagata nukukehe e ōmamai ki te Atua.

²⁶ Ma ko tēnei te auala ka fakahao ai ia tagata Ihalaelu uma. E vē oi lea mai te tuhituhiga paia, “Ko te Fakaola ka hau mai Hiona ma kave kehe nā agahala uma a nā lāpuna o Iakopo.

²⁷ Ka ohi e au te feagaiga tēnei ma ki lātou kāfai e kave kehe e au a lātou agahala.”

²⁸ Ona ko to lātou teteke ki te Tala Lelei, kua kavea ai ia tagata Iutaia ma fili ki te Atua, mo te lelei o koutou tagata nukukehe. Kae ona ko te filifiliga a te Atua, kua kavea ai ki lātou ma ana uō ona ko o lātou tupuna.

²⁹ Auā ko nā meaalofa ma te kalaga a te Atua, e hē toe fakafokiagia.

³⁰ Kae vē la ko koutou tagata nukukehe, e i ei te taimi na teteke ai koutou ki te Atua. Kae i te taimi nei, kua teteke ia tagata Ihalaelu ki te Atua, ma kua fakaalia tona alofa fakahao mo koutou.

³¹ I te auala foki lava tēnei e tahi, ona ko te alofa fakahao kua maua e koutou, ko tagata Iutaia kua hē uhitaki ki te Atua, kae ke maua ai foki e ki lātou i te taimi nei te alofa fakahao o te Atua.

³² Auā kua fai e te Atua ia tagata uma ma pagotā a te hē uhitaki, kae ke fakaalia ai tona alofa fakahao mo ki lātou uma.

Ke Vīkia te Atua

³³ Kai te lahi lele o te tamaokāiga o te Atua! Kai te loloto lele o tona poto ma tona mālamalama! Ko ai nei te ia mafaia oi fakamālamalama ana tonu? Ko ai nei te mālamalama i ona ala?

³⁴ E vē oi lea mai te tuhituhiga paia, “Ko ai te ia iloa nā mea i te māfaufau o te Aliki? Ko ai te ia mafaia oi kavatu ki a te ia he fautuaga?

³⁵ Ko ai nei te na kua ia fōkiatua ki ei he mea? kae ke ia toe totogi maia?”

³⁶ Auā ko nā mea uma lele na ia faia, e ala ia te ia, ma e mo ia. Ke vīkia pea lava te Atua ke pa ki te hēgata! Amene.