Loma 10 - Tokelauan New Testament

¹ Oku uho, te naunau lahi ko o toku loto ke mafai oku tagata ke fakaolagia! Ko au e tatalo pea lava ki te Atua mo ki lātou.

² E molimau au ki to lātou naunau lahi ke fai te finagalo o te Atua; kae ko to lātou naunau e hē fakavaea i te mālamalama moni.

³ Ko hēki ki lātou iloa te auala e fakalelei ai e te Atua te va o tagata ma ia, ka kua taumafai lava ki lātou ke fai a lātou lava faiga māhani; ma kua hē ki lātou tukuatua ai ki lātou ki te faiga a te Atua e fakalelei ai te va o tagata ma ia.

⁴ Auā ko Keliho te kua ia fakaumagia te Tūlāfono, kae ke mafai ai e ho he tino kua talitonu, ke fakalelei e te Atua tona va ma ia.

Ko te Fakaolataga e mo tagata Uma

⁵ Ko te mea tēnei na tūhia e Mohe e uiga ki te fakaleleia o te va ma te Atua e ala i te mulimuli ki te Tūlāfono. “Ko ai lava e uhitaki ki te mea e fakatonu mai e te Tūlāfono, ka ola ia.”

⁶ Kae ko te mea e lea mai ai te tuhituhiga paia e uiga ki te fakaleleia o te va ma te Atua e ala i te fakatuatua e vēnei: “Nahe vē ifo koe i tō loto, Ko ai te ka fano ki luga i te lagi?” (ke kavaifo ia Keliho ki lalo).

⁷ “Ia koe foki nahe lea vē, Ko ai te ka fano ki lalo ki te lalolagi o tagata oti?” (ke kavake ia Keliho ki luga mai te oti).

⁸ Ko te mea e lea mai ai ko tēnei: “Ko te fekau a te Atua e i outou tafa, e i outou laugutu ma e i outou loto” — ko te fekau tēnā e uiga ki te fakatuatua e tālaki e ki mātou.

⁹ Kāfai e takutino e koutou i mua o tagata ko Iehu ko te Aliki ma talitonu koutou na fakatū e te Atua mai te oti, ko koutou ka fakaolagia.

¹⁰ Auā ko te tātou fakatuatua te fakalelei ai to tātou va ma te Atua; ko te tātou takutinoga i mua o tagata, te fakaola ai ki tātou.

¹¹ E lea mai te tuhituhiga paia, “E hēai he tino e talitonu ki a te ia ka maua i te fakanoanoa.”

¹² Ko te mea tēnei e aofia ai ia tagata uma, auā e hēai he mea e kehekehe ai ia tagata Iutaia ma tagata nukukehe; ko te Atua ko te Aliki ia e tahi o tagata uma, ma e ia kavatua nā fakamanuiaga e lahi mo ki lātou uma e kālalaga atu ki a te ia.

¹³ E vē oi lea mai te tuhituhiga paia, “Ho he tino lava e kalaga atu ki te Aliki mo he fehoahoani ka fakaolagia.”

¹⁴ Kae e kālalaga vēhea ake ki lātou ki a te ia mo he fehoahoani, pe kāfai ko hēki talitonu ki lātou? E talitonu vēhea ake ki lātou, pe kāfai ko hēki fakalogo ki lātou ki te fekau? Ma, e lagona vēhea ake e ki lātou te fekau, pe kāfai te fekau ko hēki folafolagia?

¹⁵ Ma, e mafai vēhea ke folafola te fekau, pe kāfai e hē uga atua nā kavefekau? E vē oi lea mai te tuhituhiga paia, “Kai te gali o te haeleele mai o nā kavefekau e folafolagia te tala lelei!”

¹⁶ Kae e hēki talia e ki lātou uma te Tala Lelei. E vē oi lea ia Ihaia, “Te Aliki, ko ai nei te kua talitonu mai ki ta mātou fekau e tau logologo?”

¹⁷ Ko te mea ia, ko te fakatuatua e hau mai te fakalogo ki te fekau, ma ko te fekau e hau mai te tālakiga e uiga ki a Keliho.

¹⁸ Kae ko au la e fehili: E moni nei ko hēki fakalogo ki lātou ki te fekau? Ko te meamoni, kua lagona e ki lātou — auā e lea mai te tuhituhiga paia: “Ko o lātou leo kua halalau ki te lalolagi kātoa; ko a lātou kupu kua pa ki nā pito uma o te lalolagi.”

¹⁹ Ko au e toe fehili: Ko tagata nei o Ihalaelu e hēki mālamalama? Na tali lava e Mohe te fehili tēnei i te leaga e uiga ki te vāgana a te Atua e vē: “Ka fakaaogā e au nā tino o mālō hē taulia ke fakatupu ai te lotokino ki oku tagata; ma e ala i nā mālō o tagata vālea ka fakatupu ai e au te ita ki oku tagata.”

²⁰ Ma e hili atu la te mālohi o te fakakupuga e Ihaia o te kupu a te Atua i te leaga vē: “Ko au na maua e nā tino nae hē ki lātou hakilia au; Na fakakitea au ki a te ki lātou nae hē fehili e uiga ki a te au.”

²¹ Kae na lea vē e uiga ki tagata o Ihalaelu, “I te aho kātoa e falōlō atu oku lima ke toe foki mai oku tagata hē uhitaki ma fakatuikehe.”