Loma 1 - Tokelauan New Testament

¹ Mai ia Paulo, he kaukauna e a Keliho Iehu, ma ko he apohitolo na kalagagia ma filifilia e te Atua, ke tālakia tana Tala Lelei.

² Ko te Tala Lelei na folafola e te Atua mai te kāloā e ala i ana pelofeta, e vē oi tūhia i nā Tuhituhiga Paia.

^3-4 Ko te Tala Lelei e fakatatau ki tona Ataliki, to tātou Aliki ko Iehu Keliho! I tona itū tagata, na tupuga mai ia Tavita. Kae ko te Agaga Paia na fakamāonia ai ko Iehu ko te Ataliki o te Atua, ma e uiga kehe tona mālohi i te kua toe fakatū mai i te oti.

⁵ Ko ia te na ala ai ona tuku mai te avanoa e te Atua ke kavea ai au ma apohitolo mo Keliho, kae ke takitaki ai e ia ia tagata o mālō uma, ke talitonu ma uhitaki.

⁶ Ko te mea tēnei e aofia ai foki ma koutou iēnā i Loma, koutou iēnā kua kalaga ki ei te Atua ke kavea mo Iehu Keliho.

⁷ Oi ko au la e tuhi atu ki a te koutou uma i Loma, koutou iēnā e alofa ki ei te Atua, ma kua kalagagia e te Atua ke kavea ma ona tagata: Ke ia te koutou te alofa tūnoa ma te fīlēmū mai te Atua to tātou Tamana ma to tātou Aliki ko Iehu Keliho.

Ko te Tatalo o te Fakafetai

⁸ Muamua, ko au e fakafetai ki toku Atua mo koutou uma lele e ala ia Iehu Keliho, auā ko te koutou fakatuatua kua iloa e te lalolagi kātoa.

⁹ E molimau te Atua ko te mea e lea atu ai au e moni — te Atua e tautua au ki ei ma toku loto kātoa, e ala i te tālaki atu e au o te Tala Lelei e uiga ki tona Ataliki. E iloa e te Atua ko koutou e kō manatua pea lava

¹⁰ i taimi uma e tatalo ai au. Ko au e tatalo ki te Atua, pe kāfai e tuha ai ma tona finagalo, ke mafai au oi āhiāhi atu ki a te koutou i te taimi nei.

¹¹ Auā ko au e fofou lahi lele ke feiloaki ma koutou, kae ke mafai ai oi maua fakatahi e ki tātou he fakamanuiaga fakateagaga, ke mālolohi ātili ai koutou.

¹² Ko te uiga o taku lea atu, ke mafai ki tātou ke fakamālohi tētahi ki tētahi, e ala i to tātou fakatuatua.

¹³ Oku uho, ko au e fofou ke koutou iloa, e lahi lele nā taimi nae fia fanatu ai au oi āhi atu koutou, kae ko hēki maua lele he avanoa. Ko au e fofou ke kō maua ni tino ia te koutou mo Keliho Iehu, e vē oi kō maua i iētahi tagata nukukehe.

¹⁴ Auā e i ei toku tiute ki tagata uma lele, nā tino Eleni ma nā tino fakapaupau, nā tino kua akoakogia ma ki lātou e hēki akoakogia.

¹⁵ Ko te mea ia e naunau lele ai au, ke kō folafola atua foki te Tala Lelei ki a te koutou iēnā e nonofo i Loma.

Ko te Mālohi o te Tala Lelei

¹⁶ Ko au e talitonu kātoatoa ki te Tala Lelei; ko te mana tēnā o te Atua e fakaola ai ki lātou uma e talitonu, muamua ko tagata Iutaia, ma vēnā foki ma tagata nukukehe.

¹⁷ Auā e fakaalia i te Tala Lelei te auala e fakalelei ai e te Atua te va o tagata ma ia: e fakalelei i te fakatuatua ma e nā ko te fakatuatua oioti lava. E vē oi lea mai te tuhituhiga paia, “Ko te tino e fakalelei te va o ia ma te Atua e ala i te fakatuatua, ka ola ia.”

Ko Tagata uma lele e Hala i mua o te Atua

¹⁸ Ko te tōkahā o te Atua e fakaalia mai te lagi, mo nā agahala ma uiga kino uma o tagata, ma e ala i o lātou uiga kino, kua faigatā ai ke fakailoa te meamoni.

¹⁹ E fakahalagia ki lātou e te Atua, auā ko nā mea e tatau ke iloa e uiga ki te Atua, e manino lele ki a te ki lātou, ona na fakailoa lava e te Atua ki a te ki lātou.

²⁰ Talu te gaohia o te lalolagi e te Atua, e faigōfie lele oi iloa e tagata ko te mālohi o tona mana e hēai hona gataaga, ma ko ia ko te Atua moni. Ko nā mea iēnei e hē kitea, kae e mafai ke iloa. E iloa ona ko nā mea kua fai e te Atua. Oi e hēai la he mea e tatau ke hē ki lātou iloa ai.

²¹ E ki lātou iloa te Atua, kae e hē ki lātou mafaia lele oi lea vē ake, “Ko koe ko te Atua moni.” E hē ki lātou lagonagia lele foki he loto fakafetai ki gāluega a te Atua. Kae ko o lātou manatunatuga e hēai lele he uiga, ma o lātou māfaufau papaku, kua tumu i te pōgihā.

²² E lea vē, ko ki lātou e popoto, kae ni tino vālelea.

²³ Kua hē tāpuaki ki te Atua e mamalu ma ola pea lava, kae kua tāpuaki ki nā fakatuha kua fau fōliga ki tagata e hē ola tūmau, pe ko nā manulele, nā manu vaefa pe ko nā manu fetolofi.

²⁴ Ma ko te mea ia kua tīaki ai ki lātou e te Atua ke fai nā mea kino e nanau ki ei o lātou loto, ma ko o lātou māfaufauga kino, e fai ai e tētahi ki tētahi, nā uiga mātagā ki o lātou tino.

²⁵ E hē talitonu ki lātou ki te meamoni e uiga ki te Atua, kae talia e ki lātou te pepelo; e tāpuaki ma kaukauna kinā mea na gaohia e te Atua, kae e hē tāpuaki ki te tino e a ia nā mea na gaohi ma tē e tatau ke vīkia e tagata ke pa ki te fakavavau! Amene.

²⁶ Ona e ki lātou faia nā mea iēnei, kua tīaki ai ki lātou e te Atua ke fai pea o lātou tuinanauga mātagā. E pa foki lava ki fafine, kua hē fia fakaaogā o lātou tino e vē ko te natula i te va o te fafine ma te taulelea, kae kua fakaaogā i ni auala e hē tuha ma te natula.

²⁷ E vēnā foki ia taulelea, kua hē fofou ke fakaaogā o lātou tino e vē ko te natula i te va o te taulelea ma te fafine, kae kua mu o lātou loto i te nanau o tētahi ki te tino o tētahi. Kua fai e iētahi taulelea ki iētahi taulelea nā uiga matuā mātagā lava, ma ko te mea ia ka pakū ai lava ki o lātou luga te fakahalaga e tatau mo a lātou āmio hehē.

²⁸ Ona ko nā tino iēnei kua hē fia talia e ki lātou te mālamalama moni e uiga ki te Atua, kua tīaki vē ai ki lātou e te Atua ma o lātou māfaufau pikopiko, kae ke fai ai pea e ki lātou nā mea e hē tatau ke ki lātou faia.

²⁹ Kua tumu ki lātou i ho he itūkāigā uiga hē lelei, ko te āmio kino, ko te manako lahi ma te fai o nā āmio mātagā; e tumu i te loto kino, te tāmate tino, te tauaimiha, te talapepelo ma te tau fakakino. E faitatala

³⁰ ma tau mūimui; e inoino ki te Atua, e fakamā tino, e fia hili ma gugutu; e fatufatu meakino; e hē uhitaki ki o lātou mātua;

³¹ e hē ia te ki lātou he lotofuatia, e hē fakamoemoegia, ma e hē loto alofa ma hē agalelei ki iētahi tino.

³² E ki lātou iloa te tūlāfono a te Atua e lea mai ko nā tino e ola i he ōlaga vēnei e tatau ke oti. Kae kua hē gata i te haga fai pea e ki lātou o nā mea iēnei, kae e fiafia foki kinā tino e ki lātou faia nā uiga iēnei.