Kolohe 4 - Tokelauan New Testament

¹ Koutou matai, ke tonu ma hako autou faiga e fai ki nā pologa a koutou. Ke koutou manatua, e i ei foki te koutou Matai i te lagi.

Ni Fakahinoga

² Tatalo pea lava ma mataala i nā taimi e tatalo ai koutou, ma hiki ake te fakafetai ki te Atua.

³ Tatalo foki mo ki mātou, ke tatala mai e te Atua ki a te ki mātou he avanoa ke tālaki atu ai tana fekau ki te mealilo e uiga ki a Keliho. Auā ko te mea ia e i te falepuipui ai au i te taimi nei.

⁴ Tatalo la ke mafai au ke tautala i ni fakakupuga e mālamalama lelei ai ia tagata.

⁵ Ke koutou iloa oi fai te koutou āmio i te va feagai ma tagata hē talitonu, ma ke fakaaogā lelei nā avanoa vēnā.

⁶ Ko autou kupu e tatau ke lelei ma mālie i te fakalogo, ma e tatau ke mafai e koutou oi kavatu ni tali e hako ki ni fehili e fai atu e ho he tino.

Nā toe Kupu

⁷ Ko to mātou uho pele ko Tuhiko, he tino faigāluega fakamāoni, ma ko he uho foki e gālulue fakatahi ki mātou i te gāluega a te Aliki, ka ia kavatua ni tala e uiga ki a te au.

⁸ Ko te mea ia kua kō uga atua ai ki a te koutou, kae ke fai ma mea e fakamālohi atu ai ki a te koutou, e ala i nā tala ki te tūlaga e i ei ki mātou.

⁹ E o atu fakatahi ki lāua ma Onehimahi te uho fakapelepele ma te fakamāoni, ma ko hētahi foki lava o koutou. Ka fakailoa atu e ki lāua nā mea uma e tutupu i kinei.

¹⁰ E alofa atu ia Alihitako, tēnei e falepuipui fakatahi ki māua, vēnā foki ia Maleko te fetautāina o Panapa. (Kua uma te koutou maua o te fakatonuga ke koutou taliagia fiafia ia Maleko kāfai e kui vēnā atu.)

¹¹ E alofa atu foki ia Iehu, ko tētahi ona igoa ko Iuhito. Ko ki lātou iēnei e toka tolu, ko nā tino Iutaia oioti lava ia e gālulue fakatahi ma au mo te Mālō o te Atua, ma e fehoahoani lahi lele mai ki a te au.

¹² E alofa atu ia Epafalahi, ko hētahi tēnei mai te koutou ekalehia ma ko he kaukauna e a Keliho Iehu. E tatalo fakatauanau pea lava ia mo koutou i taimi uma, ma gogō atu ki te Atua ke fehoahoani atu ke mautū ai te koutou tutū, koutou iēnā kua mātutua i te faka-Kelihiano ma uhitaki kātoatoa ki te finagalo o te Atua.

¹³ E molimau au ki ana gāluega fītā mo koutou ma nā tino i Laotikeia ma Ielapoli.

¹⁴ E momoli atu ia alofaaga o Luka te fomai fakapelepele o ki mātou, vēnā ma Temahi.

¹⁵ Fakapa atu o mātou alofaaga ki te kau uho i Laotikeia vēnā foki mo Nufana ma te Ekalehia e fai a lātou tāpuakiga i tona fale.

¹⁶ Kāfai e uma te koutou faitaua o te tuhi tēnei, e tatau foki ke kave ke faitau i loto o te Ekalehia i Laotikeia. Oi kua faitau fakatahi ai ma te tuhi tēnei, te tuhi ka kavatu e te kau uho Kelihiano i Laotikeia ki a te koutou.

¹⁷ Ma lea ki a Alihipo, “Ke mautinoa e uma te gāluega na tuku atu ki a te koe ke tautua ai ki te gāluega a te Aliki.”

¹⁸ Ko toku lima lava te tuhi atu ai au vēnei: Ni alofaaga mai ia Paulo. Nahe puli i oku filifili e noanoa ai au. Ke ia te koutou te alofa tūnoa o te Atua.