Kolohe 2 - Tokelauan New Testament

¹ Ko au e fofou ke koutou iloa, ko au e galue ma te fakamākeke mo koutou ma nā tino i Laotikeia, vēnā foki mo ki lātou uma ko hēki ki lātou iloa au.

² E fai e au te mea tēnei kae ke fakatumulia ai ki lātou i te loto mākeke ma fuhia fakatahi i te alofa, ma lahi ai te mautinoa o ki lātou e ala i to lātou mālamalama e uiga ki te mealilo a te Atua, ko Keliho tēnā.

³ Ko ia ko te kī e tatala ai nā koloa tāua uma tau ki te poto ma te atamai o te Atua.

⁴ Ko au e lea vēnei atu kae ke nahe fakahehēa koutou e he tino i ni fakamatalaga hē hako.

⁵ Auā e ui lava ko au e hē i kinā ma koutou, kae ko toku agaga e i ei fakatahi ma koutou, ma ko au te fiafia i toku kikila atu ki te mau o tautou tutū fakatahi, i te fakatuatua ki a Keliho.

Ko te Ola Moni e Maua ia Keliho

⁶ Ona kua koutou taliagia ia Keliho Iehu ko te Aliki, ola foki la i te māfutaga fakatahi ma ia.

⁷ Ke mau ma loloto nā aka o koutou ia te ia, ati ake outou ōlaga i luga o ia, ma ke tuputupu te mālohi o te koutou fakatuatua, e vē oi akoako atu ai koutou. Ma ke fakatūtumugia koutou i te loto fakafetai.

⁸ Kikila lelei la kae ke nahe fakavaleagia koutou e he tino i te poto pepelo fakatetagata e hēai he aogā, tēia e hau mai nā akoakoga tuku fakaholo a tagata ma agaga e pūlea te vāteatea, kae hē mai ia Keliho.

⁹ Auā ko nā uiga uma lele o te Atua e ia Keliho, i tona itū fakatetagata,

¹⁰ ma kua fōki atu mo koutou te ola e kātoatoa, i te māfutaga fakatahi ma ia. Ko ia e pule aoao ki ho he agaga e takua he tupu, pe e ia te ia he pule.

¹¹ I te māfutaga fakatahi a koutou ma Keliho, ko koutou na pelitome, e hē i te pelitome fakatetagata, kae i te pelitome na fai e Keliho, tēia e aofia ai te fakahaolotoga o ki tātou mai te pule a o tātou lava tino agahala.

¹² Auā i te papatihoga o koutou, ko koutou na tanu fakatahi ma Keliho, ma e ala i te papatihoga na toe fakatutū mai ai foki koutou mai te oti fakatahi ma Keliho e ala i te koutou fakatuatua ki te mana galue o te Atua, tē na ia toe fakatūa ia Keliho mai te oti.

¹³ Ko koutou na i ei te taimi na pa ai koutou ki te oti i te itū fakateagaga, ona ko autou agahala ma e ona ko koutou ni tagata nukukehe ma nae hē koutou iloa te Tūlāfono. Ka kua toe kaumai koutou e te Atua ki he ōlaga fou fakatahi ma Keliho. Kua fakamāgalo ki tātou e te Atua mai ia tātou agahala uma lele;

¹⁴ kua fakahēai e ia a tātou kaitālafu e vē oi fakamaumaugia fakatahi ai ma ona tūlāfono nae fakamamalu ai. Kua fakatino te mea tēnei e ala i te tutuki o Keliho ki luga o te hātaulo.

¹⁵ Ma ko luga o te hātaulo te na fakatōkilalo ai e Keliho nā agaga e takua ni tupu vēnā ma nā taupulega; na fakamahiahi e ia ki lātou i mua o tagata e vē ni tino kua puke fakapagotā, e ala i te fakahavavali pito ki mua o te holo e fakailoga ai tona manumālō.

¹⁶ Nahe fakataga la e koutou he tino ke ia faia te tonu e uiga ki nā mea e tatau ke kakai ma inu koutou ki ei, pe e uiga ki nā aho paia, pe ki te fakamanatuga o te Māhina Tū Mai, pe ki te Hāpati.

¹⁷ Ko nā mea uma vēnā, kua nā ko he ataata o nā mea ko i mua; kae ko te mea kua mautinoa, ko Keliho.

¹⁸ Nahe talia e koutou ni faitioga mai he tino e lea e hili atu tona tāua i lo koutou ona ko he fakaaliga fakapitoa na ia kitea, ma e fakatagā lotomaulalo ma tāpuaki pea lava ki nā agelu. Ko nā tino vēnei e manatu fakamaualuga ona ko na lagona fakatetagata,

¹⁹ ma kua hē pipiki ai ki a Keliho, te ulu o te Ekalehia. I lalo o te pule a Keliho, ko te tino o te Ekalehia kātoa e fafaga ma tāofi fakatahi e nā hokoga ma nā maho, ma e tupu e vē oi finagalo ki ei te Atua.

Ko te Mate ma te Ola Fakatahi ma Keliho.

²⁰ Ko koutou na oti fakatahi ma Keliho, ma kua fakahaoloto mai koutou mai nā agaga e pule i te vāteatea. He ā la te koi ola ai lava koutou e vē ni tino e o te lalolagi tēnei? He ā te koi mulimuli ai lava koutou ki nā tūlāfono e vē ko te,

²¹ “Nahe paki te lima ki te mea tēnei,” “nahe kai ki te mea tēia.” “Nahe tago ki te mea tēnā”?

²² Ko nā tūlāfono uma iēnei, e fakatatau ki nā mea kua hē aogā ona kua uma te fakaaogā; ni tūlāfono lava ma ni akoakoga e a te tagata ola kua fai.

²³ Ko nā tūlāfono vēnā, e vē e fakavae i he poto fakatetagata, ma e takitaki fakamālohi ai ia tagata ke tāpuaki ki nā agelu, ke loto maulalo pepelo, ma ke fakahaunoa tauanoa ki te tino, kae e matuā hē aogā lava ki te tāofiofiga o nā tuinanauga ki te tino.