Kalatia 6 - Tokelauan New Testament

Fehoahoani Tētahi ki Tētahi

¹ Te kau uho, kāfai he tino e ia faia ho he itūkāigā āmio kino, e tatau koutou iēnā kua takitakia e te Agaga, ke fakatonu ki a te ia i te agaga maualalo. Ma ko koutou foki ke mataala, nā meake ka fakaohoohogia ai foki koutou.

² Fakatau fehoahoani tētahi ki tētahi i nā mea e fītatā ai koutou, ma e kitea i te faiga tēnei ko koutou ka uhitaki ki te tūlāfono a Keliho.

³ Kāfai he tino e manatu e tāua atu ia i lo hētahi tino, kae ko te meamoni e hē ko he tino e tāua, ko tona uiga kua fakahehē lava ia e ia.

⁴ E tatau ke kikila totoka ifo lava te tino ki ana lava gāluega na fai. Kāfai e lelei ana gāluega, oi e tatau ai lava la ke ia lagona te fāfia i tona loto. Kae nahe ia fakatuhatuhagia ki ni mea a hētahi tino kua fai.

⁵ Auā ko ki tātou, e amo lava te kavega a te tino.

⁶ Ko te tino kua uma te akoakogia i te fekau faka-Kelihiano, e tatau ke fakaaogā fakatahi e ia nā mea lelei a ia kua maua, ma tona faiakoga.

⁷ Ia koutou i nā fakahehēa; e hēai he tino e ia fakavaleagia te Atua, ma e helehele lava e te tino te mea na ia totōa.

⁸ Kāfai e totō e koe i te kelekele o te natula fakatetagata, mai i kinā ka fakaputu mai e koe te helehelega, ko te oti; kāfai e totō e koe i te kelekele o te Agaga, mai te Agaga ka fakaputu mai e koe te helehelega, ko te ola e fakavavau.

⁹ Ki tātou la nahe fakavāivai oi fai nā mea e lelei; auā kāfai ki tātou e hē fakavāivai, e hau te taimi ka maua ai e ki tātou te helehelega.

¹⁰ Ko te mea ia, i taimi uma e maua ai e ki tātou he avanoa, e tatau ke fai e ki tātou nā mea lelei ki ho he tino, kae maihe lava ki lātou i loto o te tātou kāiga Kelihiano.

Ko te Toe Lapatakiga

¹¹ E koutou kitea te matamata lalahi o nā mataituhi kua tuhi ai taku tuhi mo koutou i toku lava lima!

¹² Ko nā tino e taumafai ke fakamālohia koutou ke pelitome, ko ki lātou lava iēnā te fia iloa ma fāfifia i nā mea i te kikila atu i fafo. Kae oioti lava te mea e fai ai e ki lātou te mea tēnei, ona e mātataku nā ki lātou e kupugia kāfai e tālaki e ki lātou e uiga ki te hātaulo o Keliho.

¹³ Ke pa foki lava ki nā tino kua uma te pelitome, e hē mulimuli ki te Tūlāfono; e fofou ko koutou ke pelitome kae ke fai ai o lātou fāfifia, ko koutou na pelitome ona ko ki lātou.

¹⁴ Kae e vē la ki a te au, ko au e fāfia oioti lava ona ko te hātaulo o to tātou Aliki ko Iehu Keliho. Auā ia te au, ko te lalolagi kua mate e tuha ai ma te hātaulo, ma ko au kua mate e tuha ai ma nā mea iēnei o te lalolagi.

¹⁵ E hē tāua pe pelitome te tino pe hēai; oioti lava te mea e tāua, ko te toe kavea o koe ko he tino fou.

¹⁶ Kae vē la ki a te ki lātou uma e mulimuli ki te tūlāfono tēnei, ke ia te ki lātou te fīlēmū ma te alofa tūnoa, ma ke vēnā foki ona i ei i tagata uma o te Atua.

¹⁷ E i toku tino nā māila e fai ma fakamāoniga ko au ko he pologa e a Iehu. Nahe i ei la he tino e toe fakahoehā mai ki a te au.

¹⁸ Te kau uho, ke ia te koutou uma te alofa tūnoa o to tātou Aliki ko Iehu Keliho! Amene.