Kalatia 5 - Tokelauan New Testament

Ko te Haolotoga mai ia Keliho

¹ Kua ia te ki tātou te haolotoga — Ko ki tātou kua fakahaoloto e Keliho! Fakamākeke la ma tūmau i te haolotoga, ma ke nahe toe kavea lele koutou ma pologa.

² Fakalogo lelei mai! Ko au ko Paulo, ma e lea atu au ki a te koutou, kāfai e talia e koutou ko koutou ke pelitome, ko tona uiga e hēai lele la he aogā o Keliho ki a te koutou.

³ E toe lapataki atu au ki ho he tamāloa e ia talia ko ia ke pelitome; kāfai e kē faia te mea tēnei, ko koe la e tatau ke uhitaki ki te Tūlāfono kātoa.

⁴ Ko koutou iēnā kua taumafai ke fakalelei te koutou va ma te Atua e ala i te uhitaki ki te Tūlāfono, kua koutou momotu kehea lava koutou ma Keliho. Kua hē koutou maua te alofa tūnoa o te Atua.

⁵ Kae vē la ko ki mātou, ko te mātou fakamoemoe ke fakalelei e te Atua to mātou va ma ia; ma ko te mea tēnei e hakilikili ki mātou ki ei ona ko te mana o te Agaga o te Atua, e galue ia te mātou e ala i to mātou fakatuatua.

⁶ Auā kāfai ki tātou e i te hokotaga ma Keliho Iehu, e hēai lele he mea e kehe ai pe kua pelitome pe hēai. Oioti lava te mea e tāua ko te koutou fakatuatua e mafai ai koutou ke alolofa ki iētahi tagata.

⁷ Ko koutou nae fētutuli lelei lele! Ko ai te nae fakalavelave atu ki a te koutou ma kua hē mafai ai koutou ke talitonu ki te meamoni?

⁸ E hē ko te Atua, auā ko ia te taukalaga atu ko koutou ke ōake ki a te ia.

⁹ E vē oi lea mai tētahi fakakupuga, “Ko he tamā mea fefete e fefete uma ai he paluga falaoa kātoa.”

¹⁰ Kae e tūmau pea lava toku talitonu ki a te koutou. Ko to tātou ōlaga i te hokotaga ma te Aliki, e mautinoa ai e au ka hē koutou taliagia ni manatu e kehe mai i oku manatu, ma ko ai lava e taumafai ke fakahehē ki a te koutou, ka fakahalagia ia e te Atua.

¹¹ Kae e vē la ko au, te kau uho, kāfai e tālaki pea e au ko te pelitome ko he mea e tatau ke fai, he ā la te koi fakahāuā mai ai pea ia tagata ki a te au? Kāfai au e lea ki nā tino ko te pelitome ko he mea e tatau ke fai, ko tona uiga ko te fekau e folafola e au e uiga ki te hātaulo, e hē tatau ke fai ma fakalavelave ki a te ki lātou.

¹² Kai au te fofou ko nā tino e fakahehēa koutou, ke hē gata e pelitomeagia, kae ke tatipi foki ma ni iētahi mea!

¹³ Kae e vē la ki a te koutou, te kau uho, ko koutou na kalaga atu ki ei te Atua kae ke maua ai e koutou te haolotoga. Kae nahe kaveagia te haolotoga tēnei ma mea ka pūlea ai koutou e tuinanauga o te tino. Kae ke kavea te alofa ke mafai ai oi tautua tētahi ki tētahi.

¹⁴ Auā ko te Tūlāfono kātoa e aofia i loto o te fakatonuga e fokotahi: “Alofa ki tō tuākoi e vē oi alofa koe ki a te koe lava.”

¹⁵ Kae kāfai koutou e tūmau pea te takati ma te fakaogohia o tētahi ki tētahi e vē ko uiga o nā manu fekai, koutou la ke mataala auā e i na ka fakaumatia kātoa tētahi e tētahi.

Ko te Agaga o te Atua ma te Natula Fakatetagata

¹⁶ Ko te mea e lea atu ai au ko tēnei: tuku ki te Agaga ke ia takitakiagia outou ōlaga, oi hē fakamaliea ai e koutou te natula fakatetagata.

¹⁷ Auā ko te mea e fofou ki ei to tātou natula fakatetagata, e teteke ki te mea e fofou ki ei te Agaga, ma ko nā mea e fofou ki ei te Agaga, e teteke ki ei to tātou natula fakatetagata. Ko nā mea iēnei e lua e fetekeaki tētahi ki tētahi, ma ko tona uiga e hē koutou mafaia oi fai he mea e fofou koutou ki ei.

¹⁸ Kāfai koutou e takitakia e te Agaga, ko koutou la e hē āfāina i te Tūlāfono.

¹⁹ Ko nā mea e fai e te natula fakatetagata e manino lele. Ko te nanau ki te tino, ko te āmio fakamanu, ma te fai āmio mātagā;

²⁰ ko te ifo ki tupua ma te fai mea fakataulaitu. Ko te fevaevaeaki ma tauaimiha; ko te loto kino, ko te ita ma te manatu fakapito. Ko te fetekeaki ma fai itū kau;

²¹ ko te mata pipiko, ko te konā ma te fai pātī ma iētahi mea vēnei. Ko au e lapataki atu i te taimi nei e vē foki ona lapataki atu au muamua: ko nā tino e ki lātou faia nā mea iēnei ka hē faia mo ki lātou te Mālō o te Atua.

²² Kae ko te Agaga e fua mai ai te alofa, te fiafia, te fīlēmū, te onohai, te agalelei, te āmio lelei, te fakamāoni,

²³ te loto maulalo, ma te loto pūlea. E hēai he tūlāfono e teteke ki nā mea vēnei.

²⁴ Ma ko nā tino e ia Keliho Iehu, kua tāmate e ki lātou o lātou natula fakatetagata, fakatahi ai ma te nauloto ma nā tuinanauga.

²⁵ Kāfai kua fōki mai e te Agaga te ola ki a te ki tātou; e tatau foki la ke takitaki ki tātou e te Agaga.

²⁶ Kae nahe ki tātou fia hili, pe fakatīgā tētahi ki tētahi, pe mata pipiko tētahi ki tētahi.