Kalatia 4 - Tokelauan New Testament

¹ Ko te uiga o te mea e lea atu ai au — ko te tamaiti e tuku e ia mauagia nā meatōtino a tona tamana, e hē kehe lele ia ma he pologa ka koi tamaiti ai, e ui lava ko nā mea uma lele e a ia.

² Ka koi tamaiti ai, e i ei nā tino e ki lātou tauhiagia ia ma kikilagia ana meatōtino, ke pa ki te taimi kua uma te fuafua e tona tamana.

³ Nae vēnā foki lava ki tātou i nā aho nae tamaiti ai ki tātou. Ko ki tātou nae fai ma pologa a nā agaga e pule i te lalolagi ma te vāteatea kātoa,

⁴ Kae i te pa maiga o te taimi tonu na fuafuagia, oi uga mai ai e te Atua tona lava Ataliki. Na fānau mai i he fafine, ma na ola ake i lalo o nā Tūlāfono Iutaia,

⁵ ke toe fakatau mai nā tino nae mulimuli ki te Tūlāfono, kae ke kavea ai ki tātou ma fānau a te Atua.

⁶ Ona ko koutou ni fānau e a te Atua, na ia uga maia ai te Agaga o tona Ataliki ki o tātou loto, te Agaga tēia na kalaga vē, “Te Tamana, toku Tamana!”

⁷ Ko te mea ia, ko koutou kua hē toe ni pologa. Ko koutou ni fānau e a te Atua, ma ka fōki atu e ia ki a te koutou nā mea uma a ia mo tana fānau.

Popōlega o Paulo ki tagata o Kalatia

⁸ I nā aho kua teka, nae hē koutou iloa te Atua, ma nae fai koutou ma pologa a ni atua e hē ni atua moni.

⁹ Kae nei la kua koutou iloa te Atua — pe i hētahi fakakupuga, kua iloa e te Atua koutou — e vēhea ona toe fia liliu koutou ki nā agaga vāivai ma hēai he aogā e pūleagia te lalolagi ma te vāteatea? He ā te toe fia kavea ai koutou ma a lātou pologa?

¹⁰ E i ei nā aho, nā māhina, nā vāitaimi o te tauhaga ma nā tauhaga, e fakamanatu e koutou.

¹¹ Ko au te popole na meake ko aku gāluega uma e fai mo koutou, e fakahēaogāgia?

¹² Te kau uho, ko au e aioi atu ki a te koutou, ko koutou ke vē ko au, auā ko au foki kua kavea e vē lava ko koutou. E hēai he koutou hehē ki a te au.

¹³ E manatua e koutou pe aiheā na kō tālakia atu ai te Tala Lelei i te taimi muamua; ona ko au nae tauale.

¹⁴ E ui lava nae lahi nā fakafītāuli na feagai ma koutou ona ko toku faitauale, kae e hēki kavea tēnā ma mea ke inoino mai ai koutou ki a te au, pe teteke mai ai foki. Kae na koutou talia au e vē oi talia e koutou he agelu mai te lagi; na koutou talia au e vē oi talia e koutou ia Keliho Iehu.

¹⁵ Ko koutou nae fiafia lele. He ā te kua tupu ki te koutou fiafia nae i ei? E talitonu au kana he mea e koutou mafaia, na hali kehe e koutou outou mata ma fōki mai ki a te au.

¹⁶ Ko au nei la kua fai ma outou fili auā ko au e tautala atu ki a te koutou i te meamoni?

¹⁷ Ko iētahi tino iēnā e tuahā atu ki a te koutou, kae e hē ni manatu lelei to ki lātou. Oioti lava te mea e fofou ki lātou ki ei, ke vavae kehe koutou ma au, kae ke tuahā ake ai koutou ki a te ki lātou e vē oi tuahā ki lātou ki a te koutou.

¹⁸ Ko he mea e lelei te tuahā ki he mea, pe kāfai ko te māfuaaga e lelei — ko te mea tēnei e hako i taimi uma, kae e hē vē e hako oioti i nā taimi e i kinā ai au.

¹⁹ Taku fānau pele! E vē o na lagona nā tīgā e he mātua kāfai ka fānau, e vēnā foki oi lagona e au nā tīgā, ke pa lava ki te taimi e kavea ai koutou ke vē ko Keliho.

²⁰ Kai au te fia i kinā ma koutou i te taimi nei, kae ke mafai ai ke hui te fakakupu atuga o aku kupu ki a te koutou. Ko au te popole ki a te koutou!

Akoakoga mai te tala o Hākā ma Hala

²¹ Ke fehili atu au ki nā tino o koutou e fofou ko ki lātou ke i lalo o te pule a te Tūlāfono; e hē koutou lagona nei te mea e lea mai ai te Tūlāfono?

²² E lea mai ko Apelaamo e toka lua ona ataliki, ko tētahi i he fafine pologa, ma tētahi i he fafine e hē ko he pologa.

²³ Ko tona ataliki i te fafine pologa, na fānau mai lava i te auala māhani, kae ko tona ataliki i te fafine e hē he pologa, na fānau mai e ala i he folafolaga na fai e te Atua.

²⁴ Ko nā mea iēnei e i ei tētahi ona fakauigaga. Ko nā fafine e toka lua e fakatuhagia ki nā feagaiga e lua na fai e te Atua ma ona tagata. Ko Hākā, te fafine pologa, e fakatuhagia ia ki te feagaiga na faia i luga o te Mauga ko Hinai. Ho he tino e fānau mai ai, e kavea ma pologa.

²⁵ Ko te igoa Hākā, e fakatuha ia ki te igoa o te Mauga ko Hinai i Alapi, ma e fakatuha i te taimi nei, ki te kakai ko Ieluhalema, e nofo pologa fakatahi ma ona tagata uma.

²⁶ Kae ko te Ieluhalema i te lagi, e haoloto, ma ko te tātou mātua ia.

²⁷ Auā kua tūhia i te tuhituhiga paia, “Koe ke fiafia, te fafine hē manava ola! Tau kalaga ma tau kekē fiafia, koe tēnā ko hēki kē lagona lele ia tīgā o he fafine e fānau! Auā ko te fafine na tīaki, ka tokalahi atu tana fānau i lo te fānau a te fafine e hēki tiakia lele e tana āvaga.”

²⁸ Ko te mea ia te kau uho, ko koutou ni fānau e a te Atua e ala i tana folafolaga, e vē foki lava ko Ihaako.

²⁹ I te taimi tēnā, ko te ataliki na fānau mai i te auala māhani, kua fakahāuā ki te ataliki na fānau mai ona ko te Agaga o te Atua; ma kua vēnā foki lava i te taimi nei.

³⁰ Kae e vēhea mai te tuhituhiga paia? E lea mai, “Tuli kehe te fafine pologa ma tona ataliki; auā ko te ataliki o te fafine pologa, e hē maua hona tofi fakatahi ma te ataliki o te fafine e hē ko he pologa, i nā mea a tona tamana.”

³¹ Ko te mea ia te kau uho, ko ki tātou e hē ni fānau a he fafine pologa, kae e a he fafine haoloto.