Kalatia 3 - Tokelauan New Testament

Ko te Uhitaki ki te Tūlāfono pe ko te Fakatuatua ki a Iehu Keliho

¹ Kai koutou iēnā i Kalatia te vālelea! Ko koutou nei na fakalauatau e he tino? Ko tēnā na fakakikila outou mata ki te fakamatalaga manino e uiga ki te mate o Iehu Keliho i luga o te hātaulo?

² Ke fehili atu la au vēnei: Na maua e koutou te Agaga o te Atua e ala i te uhitaki ki te Tūlāfono, pe na ala i te kua fakalogo o koutou ki te Tala Lelei ma talitonu ki ei?

³ E moni nei lava kua hēai ni mea i outou māfaufau? Ko koutou na kāmata i te koutou ōlaga fou e ala i te Agaga o te Atua; ko koutou la e fofou ke fakakātoatoa te koutou ōlaga e ala i te koutou lava mālohi?

⁴ Ko nā mea uma nei na pa koutou ki ei, e hēai lele he aogā? E hēai moni nei lava he uiga?

⁵ E fōki atu nei e te Atua tona Agaga ki a te koutou ma fai e ia nā vāvega ona ko koutou e uhitaki ki te mea e lea mai ai te Tūlāfono, pe ona kua fakalogo koutou ki te Tala Lelei ma talitonu ki ei?

⁶ Māfaufau ki nā mea na pa ki ei ia Apelaamo; e vē oi lea mai te tuhituhiga paia, “Ko Apelaamo na talitonu ki te Atua, ma ona ko tona fakatuatua, na fakaleleia ai e te Atua tona va ma ia.”

⁷ E tatau la ke koutou iloa, ko nā lāpuna moni lava o Apelaamo, ko ki lātou iēnā e fakatuatua ki te Atua.

⁸ Na vavaka e te tuhituhiga paia e fakalelei e te Atua te va o ia ma tagata nukukehe e ala i to lātou fakatuatua. Ma na fakailoa ai te Tala Lelei ki a Apelaamo e ala i te tuhituhiga paia: “Ona ko koe, ka fakamanuia ai e te Atua ia tagata o mālō uma.”

⁹ Ko Apelaamo na talitonu ma na fakamanuiagia; ko ki lātou uma la e talitonu, e fakamanuia foki e vē ko Apelaamo.

¹⁰ Ko nā tino e fakalagolago ki te uhitaki ki te Tūlāfono e ola i lalo o te fakahalaga a te Atua. Auā e leamai te tuhituhiga paia, “Ko ai lava e hē uhitaki i taimi uma ki nā mea uma kua tūhia i te tuhi o te Tūlāfono, e i lalo o te fakahalaga a te Atua.”

¹¹ Nei, e manino e hēai he tino e mafai ke fakaleleia tona va ma te Atua e ala i tona uhitaki ki te Tūlāfono, auā e lea mai te tuhituhiga paia, “Ko te tino e fakaleleia tona va ma te Atua e ala i te fakatuatua, ko ia tēnā te ka mauagia te ola moni.”

¹² Kae ko te Tūlāfono e hē fakalagolago ki te fakatuatua. E vē oi leamai te tuhituhiga paia, “Ko ai lava e ia faia nā mea uma e fakatonu mai e te Tūlāfono, ka ola ia.”

¹³ Kae ko te kavea o Keliho ma fakahalaga mo ki tātou, kua ia fakahaoa ai ki tātou mai te fakahalaga e kaumai e te Tūlāfono; auā e leamai te tuhituhiga paia, “Ho he tino e fakatautau i luga o he lākau ma tāmate, ei lalo o te fakahalaga a te Atua.”

¹⁴ Na fai e Keliho te mea tēnei kae ke maua ai e tagata nukukehe nā fakamanuiaga na folafola e te Atua ki a Apelaamo e ala ia Iehu Keliho, ma ke maua ai e ki tātou te Agaga o te Atua, e ala i te fakatuatua.

Ko te Kehekehega o te Tūlāfono ma te Folafolaga

¹⁵ Te kau uho, ke fakaaogā e au he fakatakitakiga faigōfie: kāfai ni tino e toka lua e taufai mālilie ki he mea ma hainia he lā māliliega, e hēai he tino e ia mafaia oi fakahēaogā pe toe fakaopoopo he mea ki ei.

¹⁶ Kikila, na fai e te Atua nā folafolaga ki a Apelaamo ma ki tona lāpuna. E hē leamai te tuhituhiga paia, “nā lāpuna o ia”, ko tona uiga ni tino e tokalahi, kae e leamai “tona lāpuna”, ko tona uiga he tino e fokotahi, ko tona igoa ko Keliho.

¹⁷ Ko te uiga o taku lea atu, na ohi te feagaiga a te Atua ma Apelaamo, ma na fai tana folafolaga ka tauhi pea lava ia ki ei. Ko te Tūlāfono na fātoā tuku mai ka kua teka ai te fa helau ma te tolu hefulu tauhaga, ma e hē ia mafaia oi tatala te feagaiga ma fakahēaogā te folafolaga a te Atua.

¹⁸ Auā kāfai te meaalofa a te Atua e fakalagolago ki te uhitaki o ki tātou ki te Tūlāfono, ko tona uiga la ka hē toe fakalagolago ki tātou ki te folafolaga a te Atua. Kae ko te folafolaga a te Atua te na ala ai ona fōki e ia te meaalofa tēnā ki a Apelaamo.

¹⁹ Ko he ā la te na fai ai he Tūlāfono? Ko te Tūlāfono na fakaopoopo ki te feagaiga, kae ke iloa ai ko ki tātou e agahala, ma ko te mataloa e aogā ai, na fuafua lava ki te taimi e haele mai ai te lāpuna o Apelaamo, tēia na fai ki ei te folafolaga. Ko te Tūlāfono na tukulima ifo e nā agelu ki he tino na kavea ma hokotaga ma tagata.

²⁰ Ma e hē manakomia he hokotaga pe kāfai e fokotahi oioti te tino; ma e fokotahi oioti lava te Atua.

Ko te Ala na fai ai te Tūlāfono

²¹ Ko tona uiga la ko te Tūlāfono e teteke ki te folafolaga a te Atua? Hēai, e he vēnā! Auā kana he mea na maua e tagata he tūlāfono e maua ai te ola, anei ake e mafai e ho he tino ke fakalelei tona va ma te Atua i te uhitaki ki te tūlāfono.

²² Kae ko te tuhituhiga paia e leamai ko tagata uma o te lalolagi kua i lalo o te pule a te agahala; ma ko te meaalofa la tēia kua folafola e ala i te fakatuatua ki a Iehu Keliho, e fōki ki a te ki lātou e talitonu.

²³ Kae ka ko hēki iloa e ki tātou te fakatuatua, ko ki tātou nae haihaitia i lalo o te Tūlāfono e vē ni pagotā, ke pa ki te taimi na fakailoa mai ai te fakatuatua e te Atua.

²⁴ Ma ko te Tūlāfono la te nae ia pūlea ki tātou ke pa ki te taimi na haele mai ai ia Keliho, kae ke mafai ai ke fakalelei to tātou va ma te Atua, e ala i te fakatuatua.

²⁵ Nei kua iloa e ki tātou te fakatuatua, ko ki tātou la kua hē toe pūlea e te Tūlāfono.

²⁶ Ko te fakatuatua te mafai ai oi kavea koutou uma ma fānau a te Atua, i te hokotaga ma Keliho Iehu.

²⁷ Kua uma te papatiho o koutou ma i ei koutou i te hokotaga ma Keliho. Kua kokofu koutou i te ola o Keliho, e vē i ni kofu fou.

²⁸ E hēai la he mea e kehekehe ai ia tagata Iutaia ma tagata nukukehe, ia tagata pologa ma tagata haoloto, ia tamāloa ma fafine; e tahi koutou uma i te hokotaga ma Keliho Iehu.

²⁹ Kāfai koutou e a Keliho, ko koutou la ni lāpuna e o Apelaamo, ma ka maua e koutou uma nā mea kua uma te folafola e te Atua.