Kalatia 2 - Tokelauan New Testament

Ko Paulo ma iētahi o te kau Apohitolo

¹ Kua teka te hefulu fa tauhaga, oi toe fano ai au ki Ieluhalema, ki māua ma Panapa, ma na kave ai e au ma Tito.

² Ko au na ala oi fano, ona na fakailoa mai lava e te Atua ki a te au, ko au e tatau ke fano. I ha mātou māfutaga nā ko ki mātou ma nā takitaki, na fakamālamalama ai e au ki a te ki lātou te Tala Lelei kua tālaki e au ki tagata nukukehe. E hē fofou au ko aku gāluega kua uma te fai ma nā gāluega i te lumanaki ke fakahēaogā.

³ Ko toku hoa ki a Tito, e ui ko he tino Eleni kae e hēki fakamālohiagia ke pelitome,

⁴ e vē ona fofou ki ei ni tino. Ko nā tino iēnei na lea ko ki lātou kua talitonu e vē ko ki mātou, kae ni hipai na ōmamai kae ke ki lātou iloa ai e uiga ki te haolotoga kua ki mātou maua, e ala ia Keliho Iehu. Nae fofou ke fai ki mātou ke vē ni pologa,

⁵ kae e hēki ki mātou tukua lele ki ei he avanoa, auā ko ki mātou nae fofou ke tūmau pea lava te moni o te Tala Lelei mo koutou.

⁶ Ko iētahi o ki lātou nae lea ko ki lātou ni takitaki — ko au e lea vēnei atu auā e hē tāua ia te au pe ko ai ki lātou iēnei; ko te Atua e hē fakamahino i te kikila atu i fafo — ko ki lātou iēnei e lea atu au, e hēki fakaopoopoa lele he lātou mea fou e fokotahi ki te Tala Lelei e kō tālakia.

⁷ Kae na ki lātou iloa ko te tālakiga o te Tala Lelei ki tagata nukukehe, ko he mea na tuku mai e te Atua ki a te au ke fai, e vē foki lava oi tuku atu e ia ki a Petelu, te tālakiga o te Tala Lelei ki tagata Iutaia.

⁸ Auā ko te mana o te Atua te na kavea ai au ma apohitolo mo tagata nukukehe, e vē foki lava ona kavea ia Petelu ma apohitolo mo tagata Iutaia.

⁹ Ko Iakopo, ma Petelu ma Ioane, e vē ko ki lātou lava iēnei ko nā takitaki, na iloa e ki lātou ko te gāluega fakapitoa tēnei na fōki mai e te Atua ki a te au; ma na fakamautū ta mātou māliliega ke gālulue fakatahi, i te fakatālofa o ki māua ma Panapa ki ei. Na mālilie fakatahi ki mātou ko ki māua ma Panapa ke gālulue mo tagata nukukehe, kae gālulue ki lātou mo tagata Iutaia.

¹⁰ Oioti lava te mea na lea mai ai, ke manatua ake pea nā tino mātitiva i te lātou vāega, ma ko te mea foki lava tēnei nae fofou au ke kō faia.

Kua Fakahako e Paulo ia Petelu i Anitioka

¹¹ Kae i te fanaifoga o Petelu ki Anitioka, na lea lava au ki ona mata ko ia e hehē.

¹² Ka ko hēki taunuku mai ki kinei nā tamāloa na uga mai e Iakopo, ko Petelu nae kakai fakatahi lava ma nā tino nukukehe. Kae talu lava te taunuku mai o nā tamāloa, e hēki toe kakai fakatahi ia Petelu ma nā tino nukukehe, auā nae mataku i nā tino nae fofou ke pelitome nā tino nukukehe kua talitonu.

¹³ Ma ko iētahi uho Kelihiano Iutaia, kua kāmata foki oi hui o lātou uiga e vē ko Petelu, ma ke pa foki lava ki a Panapa, na mulimuli foki ki nā uiga fakagutugutulua iēnei.

¹⁴ I te kō kiteaga ko te vāega tēnei e hē havavali i te auala hako e tuha ai ma te kupu moni e uiga ki te Tala Lelei, oi lea vēnei ai au ki a Petelu i mua o ki lātou uma, “Ko koe he Iutaia, kae ko koe nae ola lava e vē he tino nukukehe, kae hē vē he Iutaia. E vēhea la ona taumafai koe ke fakamālohi ki nā tino nukukehe ke ola e vē ni tino Iutaia?”

Ko Tagata Iutaia ma Tagata Nukukehe e Fakaola e ala i to lātou Talitonu ki a Keliho

¹⁵ Ko ki tātou na fānanau mai ni Iutaia, kae hē ni “tagata nukukehe agahala.”

¹⁶ Kae e iloa e ki tātou, oioti lava te auala e mafai ai he tino ke fakalelei tona va ma te Atua, ko te fakatuatua ki a Iehu Keliho, ka e hē ko te faia o nā mea e leamai ai te Tūlāfono na kui mai ia Mohe. Ko ki tātou foki la kua talitonu ki a Keliho Iehu, kae ke fakalelei ai to tātou va ma te Atua e ala i to tātou fakatuatua ki a Keliho, kae hē ona e fai e ki tātou nā mea e leamai ai te Tūlāfono. Auā e hēai he tino e mafai ke fakaleleia tona va ma te Atua e ala i te mulimuli ki nā mea e leamai ai te Tūlāfono.

¹⁷ Kāfai la ki tātou tagata Iutaia e taumafai ke fakalelei to tātou va ma te Atua i te tātou hokotaga ma Keliho, kae e iku ifo ko ki tātou ni tino agahala e vē foki lava ko tagata nukukehe — ko tona uiga nei la ko ki tātou e fakamālohia e Keliho ke fai te agahala? E hēai!

¹⁸ Kāfai e toe kāmata oi ati ake e au te vāega o te Tūlāfono na kō talepea ki lalo, ko tona uiga kua fakamāonia e au ko au ko he tino holi tūlāfono.

¹⁹ Kae e tuha ai ma te Tūlāfono, ko au ko he tino kua oti — na tāmate lava e te Tūlāfono — kae ke mafai ai au ke ola mo te Atua. Ko au na tāmate fakatahi ma Keliho i luga o te hātaulo,

²⁰ kae ke nahe ko au te ola, kae ko Keliho e ola i loto ia te au. I te ōlaga tēnei e ola ai au i te taimi nei, ko au e ola ona ko toku fakatuatua ki te Ataliki o te Atua, tē e alofa mai ki a te au ma na fōki tona ola kae ke ola ai au.

²¹ E hē tetekea e au te alofa tūnoa o te Atua. Kae kāfai he tino e fakaleleia tona va ma te Atua e ala i te Tūlāfono, ko tona uiga e hēai he uiga na oti ai ia Keliho.