Kalatia 1 - Tokelauan New Testament

¹ Mai ia Paulo, he apohitolo e hēki tōfiagia e tagata pe e ala i he pule fakatetagata, kae na kalagagia e Iehu Keliho ma te Atua te Tamana, tē na ia fakatūagia ia Keliho mai te oti.

² E fakafeiloaki atu te kau uho Kelihiano uma i kinei fakatahi ma au, ki a te koutou nā Ekalehia i Kalatia:

³ Ke ia te koutou te alofa tūnoa ma te fīlēmū mai te Atua to tātou Tamana ma to tātou Aliki ko Iehu Keliho.

⁴ Na fakataunuku e Iehu Keliho te finagalo o to tātou Atua te Tamana, ma ofo atu tona ola mo a tātou agahala, kae ke maua ai e ki tātou te haolotoga mai tēnei lalolagi kino.

⁵ E o te Atua nā vīkiga ke pa lava ki te fakavavau! Amene.

E Fokotahi oioti te Tala Lelei

⁶ Ko au e ofo ki te vave lele oi fulitua o koutou ki tē na kalagagia koutou e ala i te agalelei o Keliho, ma talia hētahi talitonuga e lea nā tino ko he tala lelei.

⁷ Ko te mea moni, e hēai hētahi Tala Lelei! Kae ko au kua lea vēnei atu ona e i ei nā tino e fakalavelave atu ki a te koutou ma taumafai ke liliu kehe koutou mai te Tala Lelei a Keliho.

⁸ Kae e tuha pe ko ki mātou, pe he agelu mai te lagi e ia tālakia he “Tala Lelei” e kehe mai i te Tala Lelei na tālaki atu e ki mātou ki a te koutou, ke fakamālaia e te Atua te tino tēnā.

⁹ Kua uma to mātou lea atu i te mea tēnei, kae ko au e toe lea atu i te taimi nei: kāfai e i ei he tino e ia tālaki atua ki a te koutou he “tala lelei” e kehe mai i te Tala Lelei kua uma te koutou taliagia, ke fakamālaia e te Atua te tino tēnā.

¹⁰ Ko au e hē lea vēnei atu ona ko au e fofou ki te mea e fiafia ai ia tagata. Hēai! Ko te mea e fofou au ki ei, ko te mea e fiafia ki ei te Atua. Ko au e hē taumafai ke fiafia mai ia tagata ki a te au. Kāfai ko tēnei te mea e fai e au, ko au la e hē ko he kaukauna e a Keliho.

Ko te Kaveaga o Paulo ma Apohitolo

¹¹ Te kau uho, e fia fakailoa atu e au ki a te koutou ko te Tala Lelei e tālaki e au, e hēki hau mai tagata.

¹² E hēki maua e au mai tagata, pe na akoako mai e ni tino ki a te au. Na maua e au i te fakailoa maiga o Iehu Keliho ki a te au.

¹³ Kua fakalogo koutou ki te ōlaga nae ola ai au ka koi i ei au i te tāpuakiga Iutaia, ki aku fakahāuāga nae fai ki te Ekalehia a te Atua, ma aku taumafaiga ke fakauma.

¹⁴ Nae hili atu toku mālamalama i te tāpuakiga Iutaia i lo te tokalahi o iētahi tino Iutaia o oku tupulaga, ma nae hili atu foki toku pipiki mau ki nā tū a o mātou tupuna.

¹⁵ Kae i te alofa tūnoa o te Atua na ia filifilia ai au ka ko hēki fānau mai au, ma kalagagia ke kaukauna atu ki a te ia. Ma i te tonuga i te ia ke

¹⁶ fakailoa mai tona Ataliki ki a te au kae ke mafai ai e au oi tālaki te Tala Lelei a uiga ki a te ia ki tagata nukukehe, e hēki hakili fehoahoani au ki he tino,

¹⁷ pe fano ki Ieluhalema ki nā tino na muamua kavea ma apohitolo i lo au. Kae ko au na fano ki te koga e igoa ko Alapi, oi toe liliu ai ki Tamaheko.

¹⁸ Ina kua kātoa lava te tolu tauhaga, oi fātoā fano ai au ki Ieluhalema oi āhiāhi ki a Petelu, ma nofo ai lava au i kinā mo he lua vaiaho.

¹⁹ Kae e hēki fetaui au ma hētahi apohitolo vaganā ai ia Iakopo, te taina o te Aliki.

²⁰ Ko te mea tēnei kua tuhi atu ai au, e moni lava. E iloa e Atua ko au e hē tala pepelo.

²¹ Mulimuli ake, oi fano ai au ki ni kogāfenua i Hulia ma Kilikia.

²² I te taimi tēnā, ko hēki iloa au e nā tino o nā Ekalehia i Iutea.

²³ Na fakalogo oioti ki lātou ki nā tino e lea vē, “Ko te tagata tēnei nae fakahāuā mai ki a te ki tātou, kae nei kua tālaki e ia te talitonuga faka-Kelihiano nae teteke lahi ki ei muamua.”

²⁴ Oi na viviki ake ai ki lātou ki te Atua ona ko au.