Iuta 1 - Tokelauan New Testament

¹ Mai ia Iuta, he kaukauna e a Iehu Keliho, ma ko he uho e o Iakopo — Ki nā tino kua filifilia e te Atua, ma e ola i te alofa o te Atua te Tamana ma te puipuiga a Iehu Keliho:

² Ke ia te koutou te alofa tūnoa, te fīlēmū ma te agalelei mai te Atua.

Nā Faiakoga Pepelo

³ Aku uō pele, ko au nae taumafai ke tuhi atu ki a te koutou e uiga ki te fakaolataga kua maua fakatahi e ki tātou. Kae nei kua ia te au te lagona ke tuhi vave atu loa, ma fakamālohi atu ko koutou ke tau pea lava mo te talitonuga faka-Kelihiano kua fōki mai e te Atua ki ona tagata.

⁴ Auā e i ei nā tino hē mātataku i te Atua kua ōmamai munimuni ki te mea e i ei ki tātou; nā tino e fakahehē e ki lātou te fekau e uiga ki te alofa tūnoa o te Atua, kae ke fai ai pea o lātou tuinanauga mātagā ki te tino. E teteke foki ki lātou ki a Iehu Keliho to tātou Matai ma to tātou Aliki e fokotahi. Kua leva te vavalo e nā Tuhituhiga Paia te fakahalaga e ki lātou maua.

⁵ E ui lava la kua iloa e koutou nā mea uma iēnei, kae ko au e fofou ke fakamanatu atu ki a te koutou te laveakiga e te Aliki o tagata Ihalaelu mai Aikupito, kae mulimuli ake na fakaumatia e ia nā tino o ki lātou e hēki talitonu.

⁶ Ke manatua e koutou ko nā agelu e hēki tauhihi ki te tūlaga e gata mai ai te pule na tuku ake ki a te ki lātou e te Atua, na tīaki e ki lātou to lātou nofoaga tōtino; kua fakatonu e te Atua ke haihai ki lātou i ni filifili ke pa ki te fakavavau i te pōgihā i lalo, te mea e tuku ai lava ki lātou ke pa ki te fakamahinoga i te Aho lahi.

⁷ E manatua e koutou ia Hotoma ma Komolo ma nā kakai nae pili ki ei? Nae vē foki lava nā mea nae fai e nā agelu iēnei. Nae fai e ki lātou nā uiga mātagā ma tuinanauga ki te tino e hē tuha ai ma te natula; kua pakia ki lātou i te fakahalagia i te afi e hē mate lele, ke fakamanatu ai ki tagata uma, ke nahe ki lātou faia nā uiga iēnei.

⁸ E vēnā foki lava nā tino iēnei. Nae ki lātou kitea ni fakaaliga e ala i ni miti ma kua agahala ai ki lātou i o lātou tuinanauga ki te tino; nae teteke ki te pule a te Atua ma fāifāi ki nā agelu mamalu.

⁹ Ke pa foki lava ki a Mikaele, ko hētahi ia o agelu hili a te Atua, e hēki ia mafaia oi fai ni kupu mātagā vēnei. I te la fetaliakiga ma te Tiāpolo e uiga ki te tino o Mohe, e hēki fakaaogā e ia ni kupu mātagā ke fakailoa ai ki te Tiāpolo tona hehē, kae na lea vē oioti, “Ko te Aliki e ia munaiagia koe.”

¹⁰ Kae ko nā tino iēnei, e fai kupu fakakino ki ho he mea lava e hē mālamalama ai ki lātou; ma ko nā mea iēnei e ki lātou iloa mai o lātou lagona lilo e vē ko manu vaefa tāvao, e fakaumatia ai foki lava ki lātou.

¹¹ Kai te fakaalofa lele o ki lātou auā kua mulimuli ki te auala na kui ai ia Kaino. Kua fakatakitaki ki te mea hehē a Palaama na fai, kae ke lahi ai ni a lātou tupe e maua. Kua fakatuikehe ki lātou e vē ko te fakatuikehe o Kola, ma e fakaumatia ki lātou e te Atua, vē foki lava ko te mea na pa ki a Kola.

¹² E hē matamumuli ma e kakai fakaatuatuvale, ma e vē ki lātou ni mea kelekelea i nā taimi e kakai ai koutou; e hē fia tōkakaga ki iētahi tino kae kikila ifo lava ki lātou ki a te ki lātou lava. E vē ki lātou ko nā ao e pūhia i te matagi, kae e hē maua ai he ua. E vē ko nā lākau e hē fua i te taimi e fua ai ia lākau; nā lākau kua taheki kātoa ki luga ma nā aka ma kua mamate kātoa.

¹³ E vē ki lātou ko nā galu o he tai hou, ko te takāpia o a lātou āmio mātagā, e togi ake ki te matāfaga. E vē ki lātou ko nā fetu e eva holo, ma kua uma te hāunia e te Atua he nofoaga i te lolotoga o te pōgihā, ke nonofo ai pea ki lātou ke pa ki te fakavavau.

¹⁴ Ko iēnei nā mea na vavalo e Enoka, ko te toka fitu ia o lāpuna na tupuga hako mai ia Atamu, i te leaga vēia, “Kikila, ko te Aliki ka hau ma te afe ma afe o ana agelu paia,

¹⁵ ke fakamahino ia tagata uma, ma ke fakahalagia ki lātou uma mo o lātou uiga hē mātataku i te Atua ma nā kupu kino uma na tautatala ai nā tino agahala, e teteke ai ki te Aliki.”

¹⁶ Ko nā tino iēnei e mālohi te taumūimui ma e taku hehē pea lava e ki lātou iētahi tino; e mulimuli ki o lātou lava tuinanauga; e gugutu ma fakavikiviki e ki lātou iētahi tino kae ke mafai ai ke hao a lātou mea e fai.

Nā Lapatakiga ma nā Fakahinoga

¹⁷ Kae ke koutou manatua aku uō pele, nā mea na fakailoa atu ki a te koutou e nā apohitolo a to tātou Aliki ko Iehu Keliho, i nā aho kua teka.

¹⁸ Na lea atu ki a te koutou, “Kāfai e pa mai nā toe aho, ka ōmamai nā tino ma taufakalili atu ki a te koutou, nā tino e pūlea o lātou ōlaga e o lātou lava tuinanauga hē pūlea.”

¹⁹ Ko iēnei nā tino e ki lātou fakatupuagia nā fekehekeheakiga; ni tino e o te lalolagi e hē ia te ki lātou te Agaga o te Atua.

²⁰ Kae ko koutou aku uō pele, ke haga ati ake pea i te fakavae o te koutou fakatuatua e hili te paia. Tatalo i te mana o te Agaga Paia,

²¹ ke tūmau koutou i loto o te alofa o te Atua, ka koi fakatalitali koutou ki te ola fakavavau e fōki atu e to tātou Aliki ko Iehu Keliho, e ala i tona alofa fakahao.

²² Alolofa fakamāgalo ki nā tino kua fakahētonu to lātou talitonu;

²³ fakaola iētahi tino i te tahamu kehe mai i loto o te afi o te fakamahinoga; loto alolofa ki iētahi tino ma ko koutou foki ke fakaeteete; kae inoino ki o lātou lākei kua kelekelea i o lātou lava tuinanauga ki te tino.

Ko te Tatalo e Vīkia ai te Atua

²⁴ Ke i te Atua, tē e ia puipuia koutou ke nahe pakukū, ma e ia kaumaia koutou ki tona mamalu, e aunoa ma ni hehē ma nā loto kua tumu i te fiafia —

²⁵ ke i te Atua e tokatahi to tātou Fakaola, e ala ia Iehu Keliho to tātou Aliki, te vīkiga, te mamalu, te mana ma te pule, mai te kāmataga ke pa mai ki te taimi nei, ma ke pa ki te fakavavau fakavavau lava. Amene.