Ioane 7 - Tokelauan New Testament

Ko Iehu ma ona Uho

¹ Kua uma atu te mea tēnei, oi femalagaaki ai ia Iehu i loto o Kalilaia; e hēki fofou ke fano ki Iutea, auā ko ia e hakili e nā takitaki o Iutaia i kinā, ke tāmate.

² Kua tāli pa ki te Kaiga Fakamanatu o nā Fakamalumalu,

³ oi lea atu ai nā uho o Iehu ki a te ia, “Tuku ia kinei, kae fano ki Iutea, kae ke kitea e nā tino e mulimuli atu ki a te koe, nā gāluega a koe e fai.

⁴ Auā e hēai he tino e ia mumunia ana gāluega e fai, kāfai e fofou ke iloa ia e tagata. Kāfai ko nā mea iēnei e fai e koe, fakailoa la ki te lalolagi kātoa, kae ke iloa ai koe e tagata!” (

⁵ Kae e pa foki lava ki ona uho, e hēki talitonu ki a te ia.)

⁶ Kua vāgana atu ia Iehu ki a te ki lātou, “Ko te taimi o oku ko hēki pa mai. Kae ko koutou, ho he taimi lava e lelei mo koutou.

⁷ Ko te lalolagi e hē inoino atu ki a te koutou, kae e inoino mai ki a te au, auā ko au e molimau ki te kino o ana gāluega e fai.

⁸ Olo koutou ki te Kaiga Fakamanatu. Ko au e hē fano auā ko hēki pa ki te taimi hako mo au.”

⁹ Na lea vēnā atu ia Iehu, oi nofo ai lava i Kalilaia mo hina taimi.

Kua Fano ia Iehu ki te Kaiga Fakamanatu o nā Fakamalumalu

¹⁰ Kua olo nā uho o Iehu ki te Kaiga Fakamanatu, oi fano ai foki ia Iehu ki ei, kae e hēki fakailoa lele ki he tino.

¹¹ Ko nā takitaki o Iutaia nae ki lātou hakilia ia Iehu i te Kaiga Fakamanatu, kua lea vē, “E i fea te tagata nei?”

¹² Kua tautalatala muhumuhu te tokalahi o nā tino, e uiga ki a Iehu. Kua lea vē iētahi, “Ko Iehu he tino lelei,” kae lea iētahi, “Hēai, e fakahehē e ia ia tagata.”

¹³ Kae ona ko te lātou mātataku i nā takitaki o Iutaia, na hēki tautatala leo lalahi ai ke lagona e tagata.

¹⁴ Pe kua teka te āfa o nā aho o te Kaiga Fakamanatu, oi fano ia Iehu ki te Mālumalu, oi akoako atu ki tagata.

¹⁵ Na ofo lele nā takitaki o Iutaia ma lea vē, “E vēhea ona iloa e te tagata nei te lahi o nā mea iēnei, kae ko he tino e hēki pa lele ki ni akoakoga?”

¹⁶ Kua tali atu ia Iehu ki a te ki lātou, “Ko nā mea e akoako atu e au, e hē āku, kae e hau mai te Atua, tē na ia uga maia au.

¹⁷ Ko ai lava e fiafia oi fai te mea e fofou ki ei te Atua, ka ia iloa pe ko taku akoakoga e hau mai te Atua, pe hau lava i taku pule.

¹⁸ Ko te tino e tautala i tana lava pule, e ia hakilia ni ona lava vīkiga. Ka ko te tino e ia hakilia he vīkiga mo tē na ia uga maia ia, e hako lava ia, ma e hēai he mea e fokotahi e hehē ai.

¹⁹ E hē ko Mohe nei te na ia tuku atua te Tūlāfono ki a te koutou? Kae e hēai lele he tino o koutou e uhitaki ki te Tūlāfono. He ā la te taumafai ai koutou ke tāmate au?”

²⁰ Kua tali mai nā tino i te kaifenua, “Ko koe e ulufia e he tēmoni. Ko ai te taumafai ke tāmate koe?”

²¹ Kua tali atu ia Iehu, “Na fai e au te mea ofoofogia e fokotahi, ma na ofo uma ai koutou.

²² Na fakatonu koutou e Mohe ke pelitome nā ataliki o koutou (e ui lava e hē ko Mohe, kae ko nā tupuna o koutou te na ki lātou kamatagia), oi na pelitome ai e koutou he taumalo i te Hāpati.

²³ Kāfai he taumalo e pelitome i te Hāpati kae ke nahe holia ai te Tūlāfono a Mohe, aiheā la te ita tauanoa mai ai koutou ona na kō fakamālōlōa te tino kātoa o he tino, i te Hāpati?

²⁴ Nahe faiagia tautou fakamahinoga fuafua ki nā mea e kitea i nā mata, kae fuafua ki te mea e tonu.”

Kua Fehilihili ia Tagata pe ko Iehu nei ko te Mehia?

²⁵ Ko iētahi tino i Ieluhalema kua lea vē, “E he ko te tagata nei tēnei e taumafai nā takitaki o Iutaia ke tāmate?

²⁶ Kae kikila atu, e tautala i mua tagata, ma e hēai lele he lātou tala e fai ki ei! Pe ona nei e ki lātou iloa ko ia ko te Mehia?

²⁷ Kāfai te Mehia e hau, e hēai lele he tino e ia iloa pe hau mai fea. Ka ko te tagata tēnei, e iloa uma lele e ki tātou te mea e hau ai.”

²⁸ Ka koi akoako atu ia Iehu i te Mālumalu, na lea leo lahi lele ai vē, “Oi, e koutou iloa au ma te mea e hau ai au, ni? Ko au e hēki hau i haku pule. Kae ko tē na ia uga maia au, e fakamāoni. E hē koutou iloa ia,

²⁹ kae e kō iloa, auā ko au na hau mai ia te ia ma, na ia uga maia au.”

³⁰ Oi taumafai ai ki lātou ke puke ia Iehu, kae e hēki i ei he tino na pa ki ei tona lima, auā ko tona taimi ko hēki pa mai.

³¹ Kae e tokalahi nā tino i te kaifenua kua talitonu ki a te ia ma lea vē, “Kāfai te Mehia e hau, ei na ka lahi atu nei nā fakailoga e ia faia i lo te tagata tēnei?”

Kua Uga nā Fitafita ke Puke ia Iehu

³² Kua lagona a nā Falehaio nā mea e tautatala muhumuhu ai nā tino e uiga ki a Iehu, oi fakatonu ai e ki lātou ma nā ohitāulaga hili nā fitafita, ke puke ia Iehu.

³³ Oi lea atu ai ia Iehu, “Ko au ka fakatahi ma koutou mo hina taimi, oi fano ai au ki tē na ia uga maia au.

³⁴ Ka koutou hakilia au, kae ka hē koutou maua au, auā e hē koutou mafaia oi olo ki te mea ka i ei ai au.”

³⁵ Kua fakataufai nā takitaki o Iutaia ma lea vē, “Ko fea nei te mea ka fano ki ei te tagata nei kae ke nahe maua ai ia e ki tātou? E i na ka fano nei ki nā kakai i Eleni, nā mea kua takape ki ei o tātou tagata, ma akoako atu ki nā tino e nonofo ai.

³⁶ He ā te uiga o tana tala na fai vē, ‘Ka koutou hakilia au, kae ka hē koutou maua au,’ ma, ‘E hē koutou mafaia oi olo ki te mea ka i ei ai au?’ ”

Nā Vaitafe o te Vai e Maua ai te Ola

³⁷ I te toe aho, ma ko te aho ia e hili ona tāua i nā aho o te Kaiga Fakamanatu, na tū ai ki luga ia Iehu oi tautala leo lahi, kua lea vē atu, “Ko ai lava he tino e fia inu, hau ki a te au, ma

³⁸ ko ai lava e talitonu mai ki a te au, e tatau ke inu. E vē ona tūhia i te tuhituhiga paia, ‘Ko nā vaitafe o te vai e maua ai te ola, e tafe mai ki fafo i tona fatu.’ ”

³⁹ Ko te kupu tēnei a Iehu na fai fakatatau ki te Agaga Paia, tēia na tuku e maua e nā tino kua talitonu. I te taimi tēnā, ko hēki tuku atua e te Atua te Agaga Paia, auā ko Iehu ko hēki hiki akea ki tona mamalu.

Kua Fekehekeheaki ia Tagata

⁴⁰ Ko iētahi tino i te kaifenua na ki lātou lagona nā kupu tēnei a Iehu, kua lea vē, “E hako lava ko te tagata tēnei ko te Pelofeta!”

⁴¹ Ko iētahi na lea vē, “Ko te Mehia tēnei!” Ka ko iētahi kua lea vē, “E mafai te Mehia ke hau mai Kalilaia?

⁴² E lea mai te tuhituhiga paia, ko te Mehia ka tupuga mai i te Tupu ko Tavita, ma ka fānau mai i Peteleema, te kakai nae nofo ai ia Tavita.”

⁴³ Ko te mea ia na fekehekeheaki ai te kaifenua, ona ko Iehu.

⁴⁴ Ko iētahi o ki lātou, na fofou ke ki lātou pukea ia Iehu, kae e hēki i ei he tino na pa tona lima ki a te ia.

Ko te Hē Talitonu o Takitaki o Iutaia

⁴⁵ I te toe liliuga o nā leoleo, oi fehiligia ai ki lātou e nā ohitāulaga hili ma te kau Falehaio. Kua lea vē atu ki lātou, “He ā te hēki koutou kaumaia ai ia Iehu?”

⁴⁶ Kua tali mai nā leoleo, “E hēki i ei lele he tino na kua tautala e vē ko te tino tēnei!”

⁴⁷ “Kua fakavalea foki koutou e ia, ni?” kua lea atu vēnā ki ei te kau Falehaio.

⁴⁸ “E koutou iloa pe na kua i ei he takitaki e fokotahi o Iutaia, pe he Falehaio, e talitonu ki a te ia?

⁴⁹ Ko te kaifenua tēnei, e hē ki lātou iloa he mea e uiga ki te Tūlāfono a Mohe. Kae e hē āfāina meamanū kua fakamālaiagia ki lātou.”

⁵⁰ Ko tētahi o te kau Falehaio nae i kinā, ko Nikotemo. Ko ia tēnei te na fano oi kikila ia Iehu, i he taimi i mua atu. Kua lea vē atu ia Nikotemo ki iētahi o ona hoa,

⁵¹ “E tuha ai ma a tātou tūlāfono, e hē ki tātou mafaia oi fakahala ni tino ka ko hēki fakalogo ki tātou ki ni a lātou fakamatalaga, ma ki tātou iloa ai pe he ā ta ki lātou na fai.”

⁵² Kua tali mai ki lātou, “Ko koe foki e hau mai Kalilaia ni? Hukehuke ki nā Tuhituhiga Paia, oi kē iloa ai e hēai lele he pelofeta e hau mai Kalilaia.” [

Ko te Fafine na Maua e Mulilua

⁵³ Oi fano ai lava te tino ki tona fale,