Ioane 5 - Tokelauan New Testament

Kua Fakamālōlō e Iehu he Tino e Mate he Vāega o tona Tino

¹ Kua uma atu te mea tēnei, oi fano ai ia Iehu ki Ieluhalema, ki hētahi o kaiga fakamanatu a tagata Iutaia.

² I tafa o te faitotoka e igoa ko te Faitotoka o Māmoe i Ieluhalema, e i ei te vaitākele e lima ona poletito; ko Peteha tona igoa i te gagana Epelu.

^3-4 E tokalahi lele nā tauale nae takokoto i nā poletito — ko nā tāuaho, ko nā pipili, ma nā tino e mate ni vāega o nā tino o ki lātou.

⁵ Nae i ei i kinā he tamāloa kua kātoa te tolu hefulu valu tauhaga talu te tauale.

⁶ Kua kitea atu e Iehu e takoto mai, ma kua ia iloa foki kua mataloa lele tona tauale; oi fehili atu ai ki ei, “E fofou koe ko koe ke mālōlō?”

⁷ Kua tali mai te tauale, “Te aliki, e hēai he tino i kinei ke tukua au ki loto o te vaitākele kāfai te vai e hakeu ake; kāfai au e taumafai ifo ki loto, e hau lava hētahi tino oi mua ia ki loto.”

⁸ Oi vāgana atu ai ia Iehu ki ei, “Tū ki luga, hiki tō moega ma havali.”

⁹ Ko te taimi lava tēnā na mālōlō ai te tamāloa; na hiki ake ai loa tona moega ma kāmata oi havali. Ko te aho na tupu ai te mea tēnei ko te Hāpati,

¹⁰ oi lea atu ai nā takitaki o Iutaia ki te tamāloa na fakamālōlō i tona tauale, “Ko te Hāpati te aho tēnei, ma e fakahā i te tātou Tūlāfono, ke hiki tō moega.”

¹¹ Kae kua tali mai te tamāloa, “Ko te tino na ia fakamālōlōa au, na lea mai ke hiki ki luga toku moega ma havali.”

¹² Kua fehili atu ki lātou ki a te ia, “Ko ai te tino na lea atu ke fai e koe he mea vēnā?”

¹³ Kae e hē iloa e te tamāloa pe ko ai te igoa o te tino na ia fakamālōlōa ia, ona ko Iehu kua fano kehe, ma kua tumu lele atu ia tagata ki kinā.

¹⁴ Mulimuli ake, oi maua ai e Iehu te tamāloa i te Mālumalu ma vāgana atu ai ki ei, “Fakalogo lelei mai, ko koe kua mālōlō, nahe kē toe faia la te agahala, auā e i nā tupu hētahi mea ki a te koe e hili atu te kino.”

¹⁵ Oi fano ai te tamāloa kua lea ki nā takitaki o Iutaia, ko Iehu te tino na ia fakamālōlōa ia.

¹⁶ Oi kāmata ai ia fakahāuāga a takitaki o Iutaia ki a Iehu, ona na ia fakamālōlōa he tino i te Hāpati.

¹⁷ Kae kua tali atu ia Iehu ki a te ki lātou, “Ko toku Tamana e galue pea lava, ma ko au foki la e tatau lava ke galue.”

¹⁸ Ko te kupu iēnei a Iehu na ātili ai lava te fia tāmate ki ei o nā takitaki o Iutaia. Ona kua hē gata i te ia holia o te Hāpati, kae kua lea foki ko tona Tamana ko te Atua, ma ia fakatutuhagia ia ma te Atua.

Ko te Pule a te Ataliki

¹⁹ Oi vāgana atu ai ia Iehu ki a te ki lātou, “E takutino atu e au ki a te koutou te meamoni; e hē mafai e te Ataliki ona fai he mea nā ko ia; kae e ia faia oioti nā mea e ia kitea e fai e tona Tamana. Ko te mea lava e fai e te Tamana, e fai foki e te Ataliki.

²⁰ Auā ko te Tamana e alofa ki te Ataliki, ma e ia fakailoa ki ei nā mea uma a ia e fai. Ka fakailoa e ia ki ei nā mea e hili atu te ofoofogia i lo nā mea iēnei, ma ka taufai ofo uma ai koutou.

²¹ E vē ona fakatutū e te Tamana nā tino kua oti ma fōki ki ei te ola, e vēnā foki ona fōki atu e te Ataliki te ola, ki nā tino e loto ia ke ki lātou maua.

²² E hē fakamahinoagia foki e toku Tamana he tino. Kua fōki e ia ki tona Ataliki te pule kātoa ke fakamahino ai,

²³ kae ke vīkia ai e tagata uma te Ataliki e vē oi vīkia e ki lātou te Tamana. Ko te tino e hē ia vīkia te Ataliki, e hē ia vīkia foki te Tamana na ia uga maia te Ataliki.

²⁴ “E takutino atu e au ki a te koutou te meamoni; ko nā tino e fakalogo ki taku kupu ma talitonu ki tē na ia uga maia au, ka maua e ki lātou te ola e fakavavau. E hē fakamahinoa ki lātou, kae kua teka atu ki lātou mai te oti, ki te ola.

²⁵ E takutino atu e au ki a te koutou te meamoni; e hau te taimi — kua i kinei te taimi tēnā — ka lagona ai e tagata oti te leo o te Ataliki o te Atua, ma ko nā tino e fakalogo ki ei, ka ola ki lātou.

²⁶ Auā ko te Tamana lava ia te puna o te ola, ma kua vēnā foki oi kavea e ia tona Ataliki, ke fai ma puna o te ola.

²⁷ Kua tuku atu foki e te Tamana ki te Ataliki, te pule ke ia fakamahinoa ai ia tagata uma, auā ko ia ko te Ataliki o te Tagata.

²⁸ Koutou nahe tēteki i te mea tēnei! E hau te taimi ka lagona ai e tagata oti uma, te leo o te Ataliki o te Tagata,

²⁹ ma ōake ai ki luga mai o lātou tugamau. Ko ki lātou nae faia nā mea lelei, ka fakatutū ma fakaolagia, ka ko ki lātou nae faia nā mea kino, ka fakatutū ma fakahalagia.

Ko nā Tino na Molimau e uiga ki a Iehu

³⁰ “E hēai he mea e kō mafaia i haku pule tautahi; e kō fakamahinoa e vēia ona fakatonu mai ai au e te Atua. Ko taku fakamahinoga la e tonu, auā ko au e hē taumafai ke fai te mea e fofou au ki ei, ka ko te mea e fofou ki ei tē na ia uga maia au.

³¹ “Kāfai au e molimau ki a te au lava, ko nā kupu e tautala ai au e hē mafai ke fakamāonia.

³² Kae e i ei te tino e molimau e uiga ki a te au, ma e iloa e au ko tana molimau e hako.

³³ Ko Ioane te tino na uga e koutou ki ei nā kavefekau, ma na molimau ia ki te meamoni.

³⁴ E hē vē la e manakomia e au te molimau a he tino; kae ko au kua lea atu vēnei, kae ke fakaola ai koutou.

³⁵ Ko Ioane nae vē ko he mōlī e mumū ma huhulu atu, ma nae fiafia koutou i he vāitaimi, ki tona mālamalama.

³⁶ Kae e i ei te molimau e uiga kia te au e hili atu i lo te molimau na fai e Ioane: ko nā mea e fai e au, pe ko nā gāluega na tuku mai e toku Tamana ki a te au ke fai, e molimau ki a te au ma fakailoa ai ko te Tamana te na ia uga maia au.

³⁷ Ma ko te Tamana na ia uga mai au, e molimau foki ki a te au. E hēki lagona lele e koutou tona leo, pe kitea e koutou ona fōliga,

³⁸ ma e hē teua i outou loto tana kupu, auā ko koutou e hē talitonu ki tē na ia uga maia.

³⁹ E hukehuke koutou ki nā Tuhituhiga Paia ona e vēake koutou, ko te mea ia ka maua ai e koutou te ola e fakavavau. Ko nā Tuhituhiga Paia foki lava iēnei te molimau e uiga ki a te au,

⁴⁰ kae e hē fia ōmamai lava koutou ki a te au, kae ke koutou maua ai te ola.

⁴¹ “Ko au e hē fofou ki ni vīkiga mai tagata.

⁴² Kae e iloa e au te itūkāigā tino e i ei koutou, ma e iloa e au e hē i outou loto, he alofa ki te Atua.

⁴³ E hau au ma te pule a toku Tamana, kae hē koutou talia au; kae kāfai hētahi tino e hau i tana lava pule, e talia e koutou.

⁴⁴ E fofou koutou ke maua ni vīkiga o tētahi mai tētahi, kae e hē taumafai lele koutou ke koutou maua te vīkiga, e nā ko te Atua lava oioti te maua mai ai. E mafai vēhea la ke talitonu mai koutou ki a te au?

⁴⁵ Koutou foki nā vēakē, ko au te mōliagia koutou ki toku Tamana. Ko Mohe, tēia kua tuku kātoatoa ki ei te koutou fakamoemoe, ko ia lava te ka ia mōliagia koutou.

⁴⁶ Kana he mea na talitonu koutou ki a Mohe, na talitonu mai foki koutou ki a te au, auā na tūhia e Mohe e uiga ki a te au.

⁴⁷ Kae kāfai koutou e hē talitonu ki ana tuhituhiga, e vēhea la ona talitonu mai koutou ki nā kupu e tautala atu ai au?”