Ioane 3 - Tokelauan New Testament

Ko Iehu ma Nikotemo

¹ Nae i ei hētahi takitaki o Iutaia, ko Nikotemo te igoa, he tino o te kau Falehaio.

² Kua pa ki tētahi pō, oi fano ai ki a Iehu ma lea vē atu ki ei, “Te Faiakoga, e ki mātou iloa ko koe he faiakoga na uga mai e te Atua. E hēai he tino e ia mafaia oi fai nā fakailoga e fai e koe, vaganā ko te Atua e i ei fakatahi ma ia.”

³ Kua tali mai ia Iehu, “E takutino atu e au ki a te koe te meamoni, e hēai he tino e mafai ke ia kitea te Mālō o te Atua, heiloga kua toe fānau fougia.”

⁴ Kua fehili atu ia Nikotemo, “E vēhea ona mafai ke toe fānau mai he tino kua matua? E ia mafaia vēhea oi toe fano ki loto o te manava o tona mātua, ma toe fānau mai ai”

⁵ Kae kua tali mai ia Iehu, “E takutino atu e au ki a te koe; e hēai he tino e mafai ke hao atu ki te Mālō o te Atua, heiloga kua fānau mai i te vai ma te Agaga.

⁶ E fānanau e tagata ola a lātou fānau. Kae nā ko te Agaga oioti te ia mafaia oi hūia koutou, ke kavea ma fānau a te Atua.

⁷ Koe la nā teki auā ia au e lea atu, ko koutou e tatau ke toe fānau fougia.

⁸ Ko te matagi e agi lava ki te mea e loto ia ki ei; e lagona e koe tana agi kae e hē kē iloa pe hau i fea, pe ko fea foki te fano agai ki ei. E vēnā foki lava ho he tino e fānau mai i te Agaga.”

⁹ Kua fehili atu ia Nikotemo, “E vēhea ona mafai he mea vēnā?”

¹⁰ Kua tali mai ia Iehu, “Ko koe he faiakoga iloa i Ihalaelu, ka ko koe e hē mālamalama i nā mea iēnei?

¹¹ E takutino atu e au ki a te koe te meamoni: ko ki mātou e tautatala i nā mea e ki mātou iloa, ma fakailoa atu nā mea kua ki mātou kitea, kae e hē koutou fia taliagia lele ta mātou takutinoga.

¹² Kāfai au kua lea atu ki a te koutou i nā mea tau te lalolagi kae hē talitonu koutou, e vēhea la ona talitonu koutou, kāfai au e lea atu i nā mea tau te lagi?

¹³ E hēai he tino na kua fanake ki te lagi, vaganā ai te Ataliki o te Tagata, na fanaifo mai te lagi.”

¹⁴ Ma e vē ona hiki ake ki luga e Mohe te gata apamemea i te vao, e tatau foki te Ataliki o te Tagata ke hiki ake ki luga,

¹⁵ kae ke maua ai e ho he tino e talitonu ki a te ia, te ola e fakavavau.

¹⁶ Auā ko te alofa lahi o te Atua ki te lalolagi, na ia kaumaia ai tona Ataliki e tokatahi, kae ke nahe oti ai ho he tino e talitonu ki ei, kae ke maua e ia te ola e fakavavau.

¹⁷ Auā e hēki uga maia e te Atua tona Ataliki ke fakamahino ia tagata o te lalolagi, kae na uga mai ke fakaola, e ala ia te ia.

¹⁸ Ko nā tino e talitonu ki te Ataliki, e hē fakamahinoa; ka ko nā tino e hē talitonu, kua uma to lātou fakamahinoga, auā kua hē talitonu ki lātou ki te Ataliki e tokatahi o te Atua.

¹⁹ Ko tēnei la te fakamahinoga: kua hau te mālamalama ki te lalolagi, kae ko tagata e fiafia ki te pōuli i lo te mālamalama, auā ko a lātou āmio e kino.

²⁰ Ko nā tino e faia nā mea e kino, e inoino ki te mālamalama ma e hē mafai ke ōmamai ki te mālamalama, auā e hē fofou ke kitea a lātou āmio kino.

²¹ Ka ko nā tino e ki lātou faia te mea e tonu, e ōmamai ki te mālamalama kae ke kitea ai i te mālamalama, ko nā mea e ki lātou faia, e fai i luga o te uhitaki ki te Atua.

Ko Iehu ma Ioane te Papatiho

²² Kua uma atu te mea tēnei, oi olo ai ia Iehu ma ona hoko ki Iutea. Ko kinā na nofo ai fakatahi ma ona hoko mo he vāitaimi, ma papatiho ai e ia ia tagata.

²³ Nae fai foki te papatihoga a Ioane i Ainona, e hē mamao ma Haleimi, auā e lahi lele te vai i kinā. Nae holo atu nā tino ki a te ia, ma na papatiho ai ki lātou e ia.

²⁴ Ko nā mea iēnei nae fai e Ioane, ka ko hēki falepuipui ai.

²⁵ Ko iētahi hoko o Ioane, kua kāmata oi fai fīnauga ma he tino Iutaia e uiga ki te fakamamāgia.

²⁶ Oi olo ai ki a Ioane ma lea vē atu ki ei, “Te Faiakoga, e kē iloa te tino nae fakatahi koulua i te itū ki hahae o te Iolitana, tēia na molimau koe e uiga ki ei? E fai nei tana papatihoga, ma kua gāholo uma atu ki ei ia tagata.”

²⁷ Kua tali atu ia Ioane, “E hēai he mea e fokotahi e mafai ke maua e he tino, vaganā te mea e fōki ki ei e te Atua.

²⁸ Ko koutou lava iēnā na molimau i toku leaga vē, ‘E hē ko au te Mehia, kae ko au na uga mai ke muamua mai ia te ia.’

²⁹ Ko te tama fakaipoipo, ko te tino ia e a ia te teine fakaipoipo; ko te uō a te tama fakaipoipo e tū i ona tafa ma fakalogologo ki ei, e fiafia lele kāfai e ia lagona atu te leo o te tama fakaipoipo. Nei la, ko toku fiafia kua kātoatoa.

³⁰ E tatau ke kāmata oi fakatāua lahi ia, kae fakaitiitia te tāua o oku.”

Ko Tē e Fanaifo mai te Lagi

³¹ Ko tē e fanaifo mai lagi, e hili atu tona tāua i lo tagata uma. Ko tē e hau mai te lalolagi, e o te lalolagi ia, ma e tautala i nā mea o te lalolagi. Ka ko tē e fanaifo mai te lagi, e hilihili lava ia i tagata uma.

³² E molimau ia kinā mea na kitea ma lagona e ia, kae e hēai he tino e ia talia tana takutinoga.

³³ Kae ko ai lava e ia taliagia tana takutinoga, kua ia fakamāonia te moni o te Atua.

³⁴ Auā ko tē na uga mai e te Atua, e tautala i te kupu a te Atua, auā kua tuku atu kātoa ki ei, te Agaga o te Atua.

³⁵ Ko te Tamana e alofa ki tona Ataliki, ma kua ia tukuatua ki ei nā mea uma.

³⁶ Ko ai lava e talitonu ki te Ataliki, e ia maua te ola e fakavavau; ko ai lava e hē uhitaki ki te Ataliki, e hē ia maua te ola, kae ka tūmau i lalo o te fakahalaga a te Atua.