Ioane 21 - Tokelauan New Testament

Kua Fakailoa ia Iehu ki ona Hoko i Kalilaia

¹ Kua uma atu te mea iēnei, oi toe fakailoa ai ia Iehu ki ona hoko i te matāfaga o te Vaitūloto ko Tipelia. E vēnei te auala na fakailoa ai ia ki a te ki lātou.

² Nae fakapotopoto i kinā ia Himona Petelu, ko Toma (tē e fakaigoa ko te Māhaga), ko Natanielu mai Kana i Kalilaia, ko nā ataliki o Hepetaio, ma iētahi hoko e toka lua.

³ Kua lea atu ia Himona Petelu ki tētahi vāega, “Ko au ka fano oi fāgota.” “Ki mātou e oatu i tau kau,” kua lea mai ki lātou. Oi olo ai i te vaka, kae i te pō kātoa, e hēki maua he lātou ika e fokotahi.

⁴ I te taimi kua oho ake ai te la, ko Iehu e tū ifo i te matāfaga, kae e hē matea atu e ona hoko.

⁵ Oi fehili atu ai ia Iehu, “Nā taumalo, e i ei hautou ika?” “E hēai!” kua tali mai ki lātou.

⁶ Oi vāgana atu ia Iehu, “Togi te koutou kupega ki te itū taumatau o te vaka, oi maua ai ni autou ika.” Oi togi ai e ki lātou te kupega, ma kua hē ki lātou mafaia oi toe toho mai, ona kua tumu i te lahi o nā ika.

⁷ Kua lea atu te hoko, tē e alofa ki ei ia Iehu, ki a Petelu, “Ko te Aliki tēnei!” I te lagona atuga e Himona Petelu ko te Aliki, oi toe fai ai tona kofu pito ki fafo ona na ia tatala kehea, kae oho ki te tai.

⁸ Ka ko iētahi hoko na ōake ki gāuta i te vaka, ma toho ake te kupega e tumu i te ika. Nae hē mamao lahi ki lātou ki gātai, pe tuha ma he helau mita te mamao.

⁹ I te pa akega ki gāuta, na ki lātou kitea ai he afi malala e i luga ai ni ika, ma ni falaoa.

¹⁰ Oi vāgana atu ai ia Iehu ki a te ki lātou, “Kaumai ake ni ika i nā ika a koutou na fātoā maua.”

¹¹ Oi fano ai ia Himona Petelu ki luga o te vaka ma toho ake te kupega ki gāuta e tumu i nā ika fuaefa, e maua te helau lima hefulu tolu te aofaki. E ui i te lahi o nā ika, kae e hēki gahae te kupega.

¹² Kua vāgana atu ia Iehu ki a te ki lātou, “Ōmamai oi kakai.” E hēai he tino o ki lātou na loto toa ke fehili vē ki ei, “Ko ai ko koe?” auā kua iloa e ki lātou ko te Aliki.

¹³ Oi fano ai ia Iehu kua tago ki te falaoa ma foki ki a te ki lātou; kua vēnā foki ona fai e ia kinā ika.

¹⁴ Ko te fakatolu tēnei o taimi kua fakailoa ai ia Iehu ki ona hoko, talu tona toetū mai te oti

Ko Iehu ma Petelu

¹⁵ Kua uma te lātou kakai, oi fehili atu ai ia Iehu ki a Petelu, “Himona te ataliki o Ioane, e hili nei tō alofa mai ki a te au i lo ki lātou iēnei?” Kua tali mai ia Petelu, “Io, te Aliki, e iloa lava e koe ko au e alofa atu ki a te koe.” Kua vāgana atu ia Iehu, “Tauhi aku punuamāmoe.”

¹⁶ Kua fakalua oi fehili atu ia Iehu, “Himona, te ataliki o Ioane, e alofa mai koe ki a te au?” Kua tali mai ia Petelu, “Io, te Aliki, e kē iloa lava ko au e alofa atu ki a te koe.” Kua vāgana atu ia Iehu, “Tauhi aku māmoe.”

¹⁷ Kua fakatolu oi fehili atu ia Iehu, “Himona, te ataliki o Ioane, e alofa mai koe ki a te au?” Kua lagona e Petelu te fakanoanoa ona kua fakatolu oi fehili ake ia Iehu, “E alofa mai koe ki a te au?” oi lea vē atu ai, “Te Aliki, e iloa e koe nā mea uma; e iloa e koe ko au e alofa atu ki a te koe!” Kua vāgana atu ia Iehu ki ei, “Tauhi aku māmoe.

¹⁸ E takutino atu e au ki a te koe te meamoni; ka koi tamaiti koe, nae fai lava e koe tō fuhipaku ma fano ki ho he mea e fia fano koe ki ei; kae kāfai koe e matua, ka falōlō atu ō lima, oi ōmamai ai nā tino oi fai tō fuhipaku, ma kave koe ki he mea e hē fia fano koe ki ei.”

¹⁹ (Na lea vēnei ia Iehu ke fakailoa ai te auala ka oti ai ia Petelu, ma maua ai he vīkiga mo te Atua.) Oi vāgana atu ia Iehu ki a Petelu, “Mulimuli mai ki a te au!”

Ko Iehu ma Tētahi ona Hoko

²⁰ Kua fufuli ki tua ia Petelu oi ia kitea ai tētahi hoko, tē e alofa ki ei ia Iehu, e mulimuli ake — ko ia tē na nofo i tafa o Iehu kae fai te lātou katiga ma fehili vē ki ei, “Te Aliki, ko ai te ka ia fakalata koe?”

²¹ I te kitea atuga o ia e Petelu, oi fehili ai ia Petelu ki a Iehu, “Te Aliki, kae fai vēhea te tino tēnei.”

²² Kua tali mai ia Iehu ki a te ia, “Kāfai au e fofou ke ola pea ia ke toe hau au, he ā te popole ai koe ki ei? Mulimuli mai ki a te au!”

²³ Oi piha ai te tala i nā tino kua talitonu ma mulimuli ki a Iehu, ko te hoko tēnei e hē oti lele. Ka ko Iehu e hēki lea ko te hoko tēnei e hē oti lele; na lea, “Kāfai au e fofou ke ola pea ia ke toe hau au, he ā te popole ai koe ki ei?”

²⁴ Ko te hoko tēnei na molimau ki nā mea iēnei, ma ko ia te na ia tuhituhiagia ki lalo; ma e iloa e ki tātou ko tana takutinoga e hako.

Fakaikuga

²⁵ Kae e lahi iētahi mea na fai e Iehu. Anei e tuhituhi uma ki lalo nā mea iēnei, hōvē ei na hē ofi te lalolagi kātoa i nā tuhi e fakamaumau ai.