Ioane 20 - Tokelauan New Testament

Ko te Toetū o Iehu

¹ I te taeaopō o te aho Hā ka koi pōuli, na fano ai ia Malia te Makatala ki te tugamau, ma na ia kitea ai ko te fatupae nae pupuni ai kua kave kehe.

² Oi vili ai ki a Himona Petelu ma tētahi hoko nae alofa ki ei ia Iehu, ma lea vē atu ki ei, “Kua kave kehe e ki lātou te Aliki mai te tugamau, ma e hē ki mātou iloa pe kua tuku e ki lātou i fea!”

³ Oi olo ai ia Petelu ma tētahi hoko ki te tugamau.

⁴ Nae fētutuli uma ki lāua, kae na fakahao e tētahi hoko ia Petelu ma na pa muamua ia ki te tugamau;

⁵ ma na punou ifo ki lalo oi ia kitea ai nā kie vavae e tatitia i kinā, kae e hēki fano ki loto.

⁶ Oi hau ai ia Himona Petelu, nae mulimuli mai i ona tua, kua fano hako ki loto o te tugamau; na kitea e ia nā kie vavae e tatitia i kinā,

⁷ ka ko te meakie nae nonoa ai tona ulu e hē i te mea e i ei nā kie vavae, kae kua fetufetu ma tatia kehe mai.

⁸ Oi fano ai foki ki loto o te tugamau tētahi hoko, tē na muamua pa ki ei; na kitea e ia ma na talitonu ai. (

⁹ Ko hēki mālamalama lelei ki lāua i te tuhituhiga paia na lea mai e tatau ia ke toe tū mai i te oti.)

¹⁰ Oi toe olo ai nā hoko ki te mea nae nonofo ai.

Kua Fakailoa ia Iehu ki a Malia te Makatala

¹¹ Ka ko Malia kua tū i fafo o te tugamau kae tagi. E tagi lava ma punou ki lalo oi fātio ki loto o te tugamau,

¹² ma na ia kitea atu ai ni agelu e toka lua e kofu papae, e nonofo mai i te mea nae i ei ai te tino o Iehu, ko tētahi i nā fogāulu ma tētahi i nā vae.

¹³ Kua fehili mai ki lāua ki a te ia, “Te māfine, he ā te tagi ai koe?” Kua lea atu ia Malia, “Auā kua kave e ki lātou toku Aliki, ma e hē kō iloa pe kua tuku e ki lātou i fea!”

¹⁴ Oi liliu ai ia Malia ki ona tua ma ia kitea ai ia Iehu e tū mai; kae e hē ia iloa ko Iehu.

¹⁵ Kua fehili atu ia Iehu ki a Malia, “Te māfine, he ā te tagi ai koe? Ko ai ta koe e hakili?” E vēake lava ia Malia ko te tino tēnei te ia kikilagia nā togālākau, oi lea vē atu ki ei, “Te aliki, kāfai na kē kavea te tino o toku Aliki, taku mai ki a te au te mea kua kave e koe ki ei, kae ke fano au oi kaumai.”

¹⁶ Kua vāgana atu ia Iehu ki a te ia, “Malia!” Kua fakahaga tonu atu ia Malia ki a te ia ma lea vē atu ki ei i te gagana Epelu, “Lāponi.” (Ko tona uiga “Te Faiakoga.”)

¹⁷ Kua vāgana atu ia Iehu ki a Malia “Koe nahe paki mai ki a te au, auā ko au ko hēki fanake ki toku Tamana. Kae fano ki nā uho o oku oi lea ki ei, ko au ka fanake ki toku Tamana ma te koutou Tamana, ki toku Atua ma te koutou Atua.”

¹⁸ Oi fano ai ia Malia te Makatala oi lea ki te hau hoko ko te Aliki na kitea e ia, ma taku ki a te ki lātou te mea na lea ake ai ki a te ia.

Kua Fakailoa ia Iehu ki ona Hoko

¹⁹ I te pō o te aho lava tēnā, te pō o te aho Hā, na potopoto ai te kau hoko i loto fale kae loka te faitotoka, auā e mātataku i nā takitaki o Iutaia. Oi hau ai ia Iehu oi tū i te mea e i ei ai ki lātou, ma vāgana vē mai, “Ke ia te koutou te fīlēmū.”

²⁰ Kua uma te vāgana vēnei atu o Iehu, oi fakaali ai ki a te ki lātou ona lima ma tona itū. Na fakatumulia te hau hoko i te fiafia i te kiteaga e ki lātou o te Aliki.

²¹ Kua toe vāgana atu ia Iehu ki a te ki lātou, “Ke ia te koutou te fīlēmū. E vē ona uga mai au e te Tamana ki te lalolagi, e vēnā foki ona uga atu koutou e au ki te lalolagi.”

²² Oi mānava atu ai ia ki a te ki lātou ma lea vē atu, “Talia te Agaga Paia.

²³ Kāfai e fakamāgalo e koutou nā agahala a nā tino, e vēnā lava ona fakamāgalogia; kāfai e hē fakamāgaloa e koutou, e vēnā foki lava ona hē fakamāgalogia.”

Ko Iehu ma Toma

²⁴ Ko tētahi o te kau hoko e toka hefulu lua, ko Toma (e fakaigoa ko te Māhaga), nae hē i ei fakatahi ma ki lātou i te hauga ki ei o Iehu.

²⁵ Oi taku ai ki ei e iētahi o te kau hoko, kua vē atu ki ei, “Kua kitea e ki mātou te Aliki!” Kua lea atu ia Toma ki a te ki lātou, “Kāfai au e hē kikila ki nā māila o nā fao i ona lima ma tuku ki ei toku muamuālima, ma tuku toku lima ki tona itū, e hē mafai au ke talitonu.”

²⁶ Kua teka atu te vaiaho e fokotahi, nae fakatahi ai foki te kau hoko i loto fale ma nae i ei ai ia ma Toma. Ko nā faitotoka nae loka, kae kua hau ia Iehu oi tū i te mea e i ei ai ki lātou ma vāgana atu vēnei, “Ke ia te koutou te fīlēmū.”

²⁷ Oi vāgana atu ai ki a Toma, “Tuku mai tō muamuālima ki eī, ma kikila ki oku lima; papae mai tō lima ki te māila i toku itū. Ia koe la nahe toe māhalohalo, kae talitonu.”

²⁸ Kua tali atu ia Toma ki a te ia, “Toku Aliki ma toku Atua!”

²⁹ Kua vāgana atu ia Iehu ki a te ia, “Ko koe kua talitonu ona kua kē kiteagia au? Amutia nā tino e talitonu kae hē ki lātou kitea au!”

Ko te Ala na Tūhia ai te Tuhi Tēnei

³⁰ E lahi nā fakailoga na fai e Iehu ka koi fakatahi ai ia ma ona hoko, e hē tūhia i loto o te tuhi tēnei.

³¹ Kae kua tūhia nā mea iēnei kae ke talitonu ai koutou, ko Iehu ko te Mehia, te Ataliki o te Atua, ma e ala i te koutou fakatuatua kia te ia, ka maua ai e koutou te ola fakavavau.