Ioane 14 - Tokelauan New Testament

Ko Iehu ko te Ala ki te Tamana

¹ Kua vāgana atu ia Iehu ki ona hoko, “Koutou nahe popole pe mātataku; talitonu ki te Atua, ma talitonu mai foki ki a te au.

² E lahi nā potu i te fale o toku Tamana, ma ko au e fano oi hāuni he mea ke nonofo ai koutou. E hē mafai au ke lea atu vēnei, anei ake e hēai.

³ Ma kāfai au e fano oi hāuni he mea ke nonofo ai koutou, ko au e toe hau oi kavatu koutou, kae ke i ei ai koutou fakatahi ma au, i te mea e i ei ai au.

⁴ E iloa e koutou te ala ki te mea e fano au ki ei.”

⁵ Kua lea atu ia Toma ki a te ia, “Te Aliki, e hē ki mātou iloa te mea e fano koe ki ei, kae e vēhea la ona iloa e ki mātou te ala e fano ki ei?”

⁶ Oi tali mai ai ia Iehu ki ei, “Ko au ko te ala ma te meamoni ma te ola; e hēai he tino e fano ki te Tamana, vaganā e kui mai ia te au.

⁷ Nei la kua koutou iloa au,” kua lea atu ia Iehu ki a te ki lātou, “ka koutou iloa foki toku Tamana, ma e kāmata atu nei, e koutou iloa ia, ma kua koutou kiteagia ia.”

⁸ Kua lea atu ia Filipo ki a Iehu, “Te Aliki, fakahino mai ki a te ki mātou te Tamana; oioti lava te mea e fofou ki mātou ki ei.”

⁹ Kua tali mai ia Iehu, “Filipo, kai te mataloa lele o te taimi talu te fakatahi o au ma koutou, kae ko hēki kē iloa lava au? Ko ai lava e ia kitea au, kua ia kiteagia te Tamana. He ā la te lea ai koe, ‘Fakahino mai ki a te ki mātou te Tamana’?

¹⁰ Ko koe e hē talitonu ko au e tahi i te Tamana ma ko te Tamana e tahi ia te au?” Oi vāgana atu ai ia Iehu ki ona hoko, “Ko nā kupu e tautala atu ai au ki a te koutou e hē mai ia te au. Ka ko te Tamana tē e tūmau ia te au, e fai lava e ia ana gāluega.

¹¹ Talitonu mai ki a te au kāfai au e lea atu ki a te koutou, ko au e tahi i te Tamana ma ko te Tamana e tahi ia te au. Ka hēai, talitonu la ona ko nā mea e kō faia.

¹² E takutino atu e au ki a te koutou te meamoni, ko nā tino e talitonu mai ki a te au, ka ki lātou faia nā mea e kō faia; ma ka ki lātou faia nā mea e hili atu te lalahi, auā ko au e fano ki te Tamana.

¹³ Ho he mea lava e gogō atu koutou ki ei i toku igoa, e fai e au, kae ke fakailoa ai te mamalu o te Tamana, e ala i te Ataliki.

¹⁴ Kāfai koutou e gogō mai ki a te au ki ho he mea i toku igoa, e fai e au.

Kua Folafola e Iehu te Fehoahoani a te Agaga Paia

¹⁵ “Kāfai koutou e alolofa mai ki a te au, tauhi la ki aku fakatonuga.

¹⁶ Ko au ka tatalo ki te Tamana, ma ka ia fōki atua ki a te koutou hētahi Fehoahoani, ke fakatahi pea ma koutou ke pa ki te fakavavau.

¹⁷ Ko ia ko te Agaga e fakailoagia te meamoni e uiga ki te Atua. E hē mafai ke talia ia e tagata o te lalolagi, auā e hē ki lātou kitea pe iloa ia. Kae e koutou iloa ia, auā e tūmau ia ma koutou, ma e i loto ia, ia te koutou.

¹⁸ “Ko koutou e hē kō tuku tiakia ke vē ni tamaiti mātua oti; ko au e toe hau ki a te koutou.

¹⁹ Toeititi oi hē toe kitea au e te lalolagi, kae ka koutou kitea au; ma ona ko au e ola, ka ola ai foki koutou.

²⁰ Kāfai e pa ki te aho tēnā, ka iloa e koutou ko au e tahi i te Tamana ma ko koutou e tahi ia te au, e vē lava ona tahi au ia te koutou.

²¹ “Ko nā tino e talia e ki lātou aku fakatonuga ma uhitaki ki ei, ko ki lātou iēnā e alolofa mai ki a te au; ma ko nā tino e alolofa mai ki a te au, ka alofa ki ei toku Tamana; ma ka vēnā foki ona alofa au ki ei, ma kō fakailoa au ki a te ki lātou.”

²² Kua lea atu ia Iuta (e hē ko Iuta Ihikaliota), “Te Aliki, e vēhea ona mafai ke kē fakailoa mai koe ki a te ki mātou, kae hē fakailoa ki te lalolagi?”

²³ Kua tali mai ia Iehu ki ei, “Ko nā tino e alolofa mai ki a te au, ka uhitaki ki aku akoakoga. Ka alofa toku Tamana ki a te ki lātou, ma ka oatu ki māua ma toku Tamana ki a te ki lātou ma nonofo fakatahi ma ki lātou.

²⁴ Ko nā tino e hē alolofa mai ki a te au, e hē uhitaki foki ki aku akoakoga. Ma ko nā akoakoga kua fakalogo koutou ki ei, e hē āku, kae e mai te Tamana na ia uga maia au.

²⁵ “Ko au kua lea vēnei atu i nā mea iēnei ka koi fakatahi au ma koutou.

²⁶ Ko te Fehoahoani, te Agaga Paia, tē ka uga mai e te Tamana i toku igoa, ka ia akoakoa atua ki a te koutou nā mea uma lele, ma ka koutou manatua ai nā mea uma na lea atu ai au.

²⁷ “Ko te fīlēmū e tuku e au ma koutou; ko taku fīlēmū e tuku atu e au ki a te koutou. E hē kō tuku atua ki a te koutou e vē ona fai e tagata o te lalolagi. Nahe atuatuvale outou loto; nahe koutou mātataku.

²⁸ Kua uma te koutou lagona toku lea atuga, ‘Ko au e fano kehe, kae ko au e toe hau ki a te koutou.’ Kāfai koutou e alolofa moni mai ki a te au, e tatau koutou ke fiafia ko au e fano ki te Tamana; auā e hili atu tona tāua i lo au.

²⁹ Ko au kua lea atu nei ki a te koutou i nā mea uma iēnei ka ko hēki tutupu, kae ke talitonu mai ai koutou ki a te au, kāfai e pa ki te taimi e tutupu ai.

³⁰ Ka hē toe mafai ke fai atu ni aku tala ki a koutou, auā te pule o te lalolagi nei kua hau. E hē ia mafaia oi pule mai ki a te au,

³¹ kae e tatau ke iloa e te lalolagi ko au e alofa ki te Tamana; ko te mea ia e fai ai e au nā mea uma e fakatonu mai e ia. “Tutū loa, keina tātou olo kehe ma kinei.”