Ioane 13 - Tokelauan New Testament

Kua Fulufulu e Iehu nā Vae o ona Hoko

¹ Kua pa ki te aho e hohoko ki te Kaiga Fakamanatu o te Pāheka, ma kua iloa e Iehu ko te itūlā kua pa mai, ke tukua ai e ia te lalolagi kae fano ki te Tamana. Nae alofa pea lava ia ki ona tagata i te lalolagi, ma nae alofa ki a te ki lātou ke pa lava ki te ikuga.

² I te taimi tēnā ko Iehu ma ona hoko nae fai te lātou katiga o te afiafi. Kua uma ai foki te galuegia e te Tiāpolo te loto o Iuta te ataliki o Himona Ihikaliota, ke fakalata e ia ia Iehu.

³ Kua uma ai te iloa e Iehu ko te pule kātoa kua tuku ake e te Tamana ki a te ia, ma ko ia na hau mai te Atua ma e toe fano foki lava ki te Atua,

⁴ na tū ai ki luga mai te laulau kai, kua tatala kehe tona kofutatao, ma nonoa te holo ki tona taugātiti.

⁵ Oi liligi ai e ia ni vai ki he pēhini ma kāmata oi fulufulu nā vae o ona hoko, ma holo i te holo i tona taugātiti.

⁶ Kua fano ki a Himona Petelu, kae kua lea mai ki ei ia Himona Petelu, “Te Aliki, ko oku vae ka fulufulu e koe?”

⁷ Kua tali atu ia Iehu, “Ko koe e hē mālamalama i te mea tēnei e kō faia i te taimi nei, kae ka mālamalama koe i he taimi mulimuli.”

⁸ Ka kua lea vē mai ia Petelu ki ei, “E hē tatau lele ke fulufulu e koe oku vae!” “Kāfai e hē kō fulufulua ō vae, ko koe la e hē āku,” kua tali atu ia Iehu.

⁹ Kua tali mai ia Himona Petelu, “Te Aliki, nahe fulufulua la nā ko oku vae. Fulufulu foki ma oku lima ma toku ulu!”

¹⁰ Kua lea atu ia Iehu, “Ko te tino kua uma te tākele e mamā kātoa, ma e hē tatau ke toe tākele, vaganā ai lava ona vae. Ko koutou e mamā, kae e hē ko koutou uma.”

¹¹ Kua uma te iloa e Iehu te tino ka ia fakalatagia ia; ko te mea ia na lea vē ai, “E hē ko koutou uma e mamā.”

¹² Kua uma te fulufulu e Iehu o nā vae o ki lātou, oi toe fai ai tona kofutatao ma toe fano ai ki te nofoaga nae nofo ai i te laulau. Oi fehili atu ai ia Iehu, “E mālamalama koutou i te mea na fātoā uma te kō faia ki a te koutou?

¹³ Ko au e fakaigoa e koutou ko te Faiakoga ma ko te Aliki, ma e hako lava koutou, auā ko tēnā lava au.

¹⁴ Kāfai la ia au, te Aliki ma te Faiakoga o koutou, na fulufulu e au outou vae, e tatau foki la koutou ke fulufulu e tētahi ia vae o tētahi.

¹⁵ Kua kō faia he fakatakitakiga mo koutou, kae ke fai ai foki e koutou, e vē lava oi fai e au mo koutou.

¹⁶ E lea atu au ki a te koutou i te meamoni: e hē hili atu nā pologa i lo to lātou matai, ma e hē hili atu nā kavefekau i lo te tino na ia uga atua ki lātou.

¹⁷ Nei la kua koutou iloa te moni o nā mea iēnei, amutia koutou kāfai e fakatakitaki koutou ki ei!

¹⁸ “Ko au e hē tautala e uiga ki a te koutou uma; E iloa e au nā tino kua kō filifiliagia. Kae e tatau ke taunuku te tuhituhiga paia e lea mai, ‘Ko te tino na kakai fakatahi ki māua i aku meakai, kua fakahagatau mai ki a te au.’

¹⁹ Ko au kua lea atu i te mea tēnei i te taimi nei, ka ko hēki pa ki te taimi e tutupu ai. E pa atu la ki te taimi e tutupu ai, ka talitonu koutou ‘Ko Au Ko Au Lava Au.’

²⁰ E takutino atu e au ki a te koutou te meamoni: ko ai lava e talia e ia he tino e uga atu e au, kua ia talia foki au; ma ko ai lava e ia talia au, kua ia talia foki tē na ia uga maia au.”

Kua Vavalo e Iehu te mea ka Tupu ki a te Ia

²¹ Kua uma te lea atu vēnei o Iehu, oi lagona ai e ia te loto fakanoanoa lahi, ma fai ai tana takutinoga e vēnei, “E takutino atu e au ki a te koutou te meamoni: e i ei te tino o koutou ka ia fakalatagia au.”

²² Ko te kau hoko, kua taufai kikila tētahi ki tētahi, e hē ki lātou hāfia lele pe ko ai te tino e fakauiga ki ei tana kupu.

²³ Ko tētahi o te kau hoko, te tino nae alofa ki ei ia Iehu, nae nofo i tafa o Iehu.

²⁴ Kua geno atu ki ei ia Himona Petelu ma lea vē atu ki ei, “Fehili ki ei pe ko ai te fakauiga ki ei tana kupu!”

²⁵ Oi hōhō lele ai te hoko ki tafa o Iehu ma fehili vē atu, “Te Aliki, ko ai nei te lea ai koe?”

²⁶ Kua tali mai ia Iehu, “Ko te tino ka fōki e au ki ei te mea falaoa kāfai e uma te kō lolōa ki loto o te ipu, ko ia tēnā.” Oi tago ai ki te mea falaoa, kua lolō ma foki ki a Iuta, te ataliki o Himona Ihikaliota.

²⁷ Ko te taimi na tago ai ia Iuta ki te mea falaoa, ko te taimi foki tēnā na ulu ai ia Hātani ki a te ia. Kua lea atu ki ei ia Iehu, “Fai vave loa tau mea e tatau ke fai!”

²⁸ E hēai he tino o ki lātou nae i te laulau, na mālamalama i te uiga na lea vē ai ia Iehu ki a Iuta.

²⁹ Ona ko Iuta te nae kikilagia te taga tupe, na vēake ai iētahi o te kau hoko, ko Iehu na lea ki ei ke fano oi fakatau nā mea e manakomia e ki lātou mo te Kaiga Fakamanatu o te Pāheka, pe ke kave he mea ma nā tino mātitiva.

³⁰ Kua talia e Iuta te mea falaoa, oi fano vave ai loa ki fafo, ma ko te taimi tēnā kua pō.

Ko te Fakatonuga Fou

³¹ Kua fano kehe ia Iuta, oi vāgana atu ai ia Iehu, “Ko te taimi nei e fakaalia ai te mamalu o te Ataliki o te Tagata; ko te taimi nei e fakaalia ai te mamalu o te Atua e ala i te Ataliki o te Tagata.

³² Ma kāfai te mamalu o te Atua e fakaalia e ala i te Ataliki o te Tagata, ka fakaalia foki e te Atua te mamalu o te Ataliki o te Tagata e ala ia te ia, ma ka ia faia i te taimi nei lava.

³³ Taku fānau, kua hē mataloa hoku taimi ma koutou. Ka koutou hakilia au; kae ko te mea na lea ai au ki nā takitaki o Iutaia, ka lea atu ai foki au ki a te koutou, ‘E hē koutou mafaia oi olo ki te mea e fano au ki ei.’

³⁴ Ma i te taimi nei, e kō tuku atua ki a te koutou he fakatonuga fou: ke alofa tētahi ki tētahi. E vē ona alofa atu au ki a te koutou, ke vēnā foki ona alofa tētahi ki tētahi.

³⁵ Kāfai koutou e alofa tētahi ki tētahi, ka iloa ai e tagata uma, ko koutou ni hoko e ōku.”

Kua Vavalo e Iehu te Fakafiti a Petelu

³⁶ Kua fehili atu ia Himona Petelu. “Te Aliki, ko koe e fano ki fea?” Kua tali mai ia Iehu, “E hē kē mafaia oi mulimuli mai ki te mea e fano au ki ei i te taimi nei, kae e hau te taimi oi mulimuli mai ai koe ki a te au.”

³⁷ Kua fehili atu ia Petelu, “Te Aliki, aiheā te hē mafai ai au ke mulimuli atu ki a te koe i te taimi nei? Ko au kua hāuni ke oti mo koe!”

³⁸ Kua tali mai ia Iehu, “Ko koe moni kua hāuni ke oti mo au? E takutino atu e au ki a te koe te meamoni: ka ko hēki vivini ia moa ka kua fakafiti fakatolu koe, e hē kē iloa au.”