Ioane 12 - Tokelauan New Testament

Kua Fakauku ia Iehu i Petania

¹ Kua toe ono ia aho oi pa ki te Pāheka, oi fano ai ia Iehu ki Petania, ki te fale o Lahalo, te tamāloa na fakatū e ia mai te oti.

² Na hāunia e ki lātou i kinā he kaiga mo Iehu, ma nae fehoahoani ia Mafa ki te laulauga o te meakai; ka ko Lahalo nae nonofo i te laulau ma Iehu, fakatahi ma iētahi tino.

³ Oi kave ai e Malia ni lolo manogi taugatā pe ko te nato mamā, kua liligi ki nā vae o Iehu oi holo ai i tona laulu. Ko te manogi manaia o nā lolo kua fakatumulia ai te fale kātoa.

⁴ Ko tētahi hoko o Iehu, ia Iuta te Ihikaliota — tēia ka fakalata e ia ia Iehu, kua lea vē atu,

⁵ “He ā te hēki fakatau ai te lolo manogi tēnei mo he toluhelau tupe hiliva, oi kave ai te tupe ma nā tino mātitiva?”

⁶ Ko Iuta na lea vēnā, e hē ona ko hona alofa moni ki nā tino mātitiva, kae ona nae ia kikilagia te taga e teu ai a lātou tupe, ma nae māhani oi ia kaihohoa mai ai ni tupe.

⁷ Kae kua vāgana atu ia Iehu, “Tuku vē te fafine ke tāofi e ia te mea kua ia te ia, mo te aho e tanu ai au.

⁸ Ka i ei pea lava nā tino mātitiva ma koutou, kae ka hē i ei pea lava au ma koutou.”

Kua Taupulepule nā Ohitāulaga Hili ke Tāmate ia Lahalo

⁹ I te lagonaga e te tokalahi o tagata Iutaia ko Iehu e i Petania oi olo ai ki ei, e hē ona ko Iehu oioti, kae na fia kikila foki ki a Lahalo, tēia na fakatū e Iehu mai te oti.

¹⁰ Oi taupulepule ai nā ohitāulaga hili ke tāmate foki ia Lahalo,

¹¹ ona ko te mea na tupu ki a te ia, kua teteke ake ai te tokalahi o tagata Iutaia ki a te ki lātou, ka kua talitonu ki a Iehu.

Kua Tali Fiafia ia Iehu e Tagata i te Ulufale atuga ki loto o Ieluhalema

¹² I te aho alafaki, na lagona ai e te kaifenua tokalahi na ōmamai ki te Kaiga Fakamanatu o te Pāheka, ko Iehu e hau ki Ieluhalema.

¹³ Oi kave ai e ki lātou nā launiu ma oatu kua fakafetaui ki a te ia, ma taufai kālalaga vē, “Ke vīkia te Atua! Ke fakamanuia e te Atua ki tē e hau i te igoa o te Aliki! Ke fakamanuia e te Atua te Tupu o Ihalaelu!”

¹⁴ Kua maua e Iehu he tamā āhini, oi hopo ai ki luga e vē lava oi tūhia,

¹⁵ “Koutou nā tino o Hiona, koutou nahe mātataku! Tēnei te koutou tupu kua hau e tiketike i luga o he tamā āhini.”

¹⁶ E hēki mālamalama nā hoko o ia i te mea tēnei i te taimi tēnā; kae i te fakatū akega o Iehu ki tona mamalu, na manatua ai e ki lātou ko te tuhituhiga paia na lea mai vēnei e uiga ki a te ia, ma ko nā mea iēnei na fai e ki lātou mo ia.

¹⁷ Ko te kaifenua nae i ei fakatahi ma Iehu i te kalagaga ki a Lahalo ke hau ki fafo o te tugamau, ma ia fakatūa ai mai te oti, na ki lātou fakailoa ki tagata te mea tēnei na tupu.

¹⁸ Ko te mea ia na olo ai ia tagata oi fakafetaui ia Iehu — ona kua ki lātou lagona na ia faia te fakailoga tēnei.

¹⁹ Oi fakataufai ai te kau Falehaio ma lea vē tētahi ki tētahi, “E kē iloa, kua hē aogā lele a tātou taumafaiga! Kikila atu, ko te lalolagi kātoa e mulimuli ki a te ia!”

Kua Hakili ia Iehu e ni Tino Eleni

²⁰ E i ei ni tino Eleni nae i te vāega na olo ki Ieluhalema ke tāpuaki ai i te taimi o te Kaiga Fakamanatu o te Pāheka.

²¹ Kua olo ki a Filipo (e hau mai Petehaita i Kalilaia) oi fehili vē ki ei, “Te aliki, ko ki mātou e fia feiloaki ma Iehu.”

²² Kua fano ia Filipo oi lea ki a Anitelea, oi na olo uma ai ki lāua kua lea ki a Iehu.

²³ Kua tali mai ia Iehu ki a te ki lātou, “Kua pa mai te itūlā e fakatū ake ai te Ataliki o te Tagata ki tona mamalu.

²⁴ E takutino atu e au ki a te koutou te meamoni: ko te fuāhaito e fokotahi e tūmau lava ma fuāhaito e fokotahi, vaganā e pakū ki te kelekele ma mate. Kāfai e mate, oi ka lahi nā fua e maua mai ai.

²⁵ Ko ai lava e fakapelepele ki tona ola, ka hē ia mauagia; ma ko ai lava e inoino ki tona ola i te lalolagi nei, ka ia te ia pea lava mo te ola e fakavavau.

²⁶ Ko ai lava he tino e fia kaukauna mai ki a te au, e tatau ke mulimuli mai ki a te au, ma ko te mea e i ei au, ka i ei ai foki taku kaukauna. Ko ai lava e kaukauna mai ki a te au, ka vīkia ia e toku Tamana.

Kua Tautala ia Iehu e uiga ki tona Oti

²⁷ “Te popole o toku loto i te taimi nei. Ka vēhea ake nei au? Ka lea nei au, ‘Te Tamana, fakahao ko au mai tēnei itūlā.’? Hēai, ko tēnei tonu lava te mea na hau ai au — ke maua au i nā puapuagā i te itūlā tēnei.

²⁸ Te Tamana, fakaali ko tō mamalu ke kitea e tagata!” Oi tautala ifo ai he leo mai te lagi kua vē ifo, “Kua uma te kō fakaaliagia o toku mamalu, ma e toe kō fakaalia foki.”

²⁹ Na lagona e te kaifenua nae tutū i kinā te leo, ma na lea iētahi ko he faititili, ka ko iētahi na lea vē, “Ko he agelu na tautala ki a Iehu.”

³⁰ Kae kua vāgana atu ia Iehu ki a te ki lātou, “Ko te leo tēnei na tautala mai, e hē mo au kae mo koutou.

³¹ Ko tēnei te taimi e fakamahino ai te lalolagi; ko tēnei te taimi e fakatōkilalo ai te pule o tēnei lalolagi.

³² Kāfai au e hiki ake ki luga mai te kelekele, ka kavea tēnā ma mea e ōmamai ai ia tagata uma ki a te au.”

³³ (Na lea vēnei ia Iehu kae ke fakailoa ai te itūkāigā oti ka pa ia ki ei.)

³⁴ Kua tali mai te kaifenua, “E lea mai te mātou Tūlāfono, ko te Mehia ka ola pea lava ke pa ki te fakavavau. E vēhea la ona lea mai koe, ko te Ataliki o te Tagata e tatau ke hiki ake ki luga? Ko ai te Ataliki o te Tagata?”

³⁵ Kua tali atu ia Iehu, “Ko te mālamalama ka i ei fakatahi ma koutou mo hina taimi. Havavali loa ka koi i ei fakatahi te mālamalama ma koutou, kae ke nahe maua koutou i te pōuli; auā ko te tino e havali i te pōuli, e hē ia iloa te mea e fano ia ki ei.

³⁶ Talitonu la ki te mālamalama ka koi ia te koutou, kae ke kavea ai koutou ma tagata o te mālamalama.” Kua uma atu nā kupu iēnei a Iehu, oi fano kehe ai ma kinā, kua fano oi mumuni ke hē iloa ia e ki lātou.

Ko te Hē Talitonu o Tagata

³⁷ E ui na ia faia nā fakailoga uma iēnei i mua o tagata, e hēki talitonu ki lātou ki a te ia,

³⁸ kae ke taunuku ai te kupu a te pelofeta ko Ihaia: “Te Aliki, ko ai nei te talitonu ki ta mātou fekau na folafola? Ko ai te na fakaali ki ei e te Aliki, tona mālohi?”

³⁹ Ma e hēki mafai ke talitonu ki lātou, auā na lea vē foki ia Ihaia,

⁴⁰ “Kua fakatauahogia e te Atua o lātou mata ma tapunia o lātou māfaufau, kae ke hē mafai o lātou mata oi kikila, ma hē mafai o lātou māfaufau oi mālamalama, ma hē liliu mai ai ki lātou ki a te au, kua lea ai te Atua, ke kō fakamālōlōa ki lātou.”

⁴¹ Na lea vēnei ia Ihaia auā na kitea e ia te mamalu o Iehu, ma nae tautala ki tagata e uiga ki ei.

⁴² E ui i tēia, e tokalahi ia takitaki o Iutaia na talitonu ki a Iehu; kae ona ko to lātou mātataku i te kau Falehaio, na hēki fofou ai ke fakailoa ki tagata to lātou talitonuga, auā nā ki lātou e tutulia ki fafo o te hūnako.

⁴³ E hili atu to lātou fiafia ke maua ni o lātou vīkiga mai tagata i lo ni o lātou vīkiga mai te Atua.

Ko nā Kupu a Iehu ka Fakamahino ai ia Tagata

⁴⁴ Na leo lahi lele ia Iehu ma lea vē atu, “Ko ai lava e talitonu mai ki a te au, e hē talitonu mai oioti ki a te au, kae e talitonu foki ki tē na ia uga maia au.

⁴⁵ Ko ai lava e ia kitea au, e ia kitea foki tē na ia uga maia au.

⁴⁶ Ko au kua hau ki te lalolagi e vē he mālamalama, kae ke nahe tūmau ai i te pōuli, ki lātou uma e talitonu mai ki a te au.

⁴⁷ E hē fakamahinoa e au nā tino e ki lātou lagona aku kupu, kae hē uhitaki ki ei. Ko au e hēki hau ke fakamahino ia tagata o te lalolagi, kae ke fakaola.

⁴⁸ Ko nā tino e teteke mai ki a au ma hē ki lātou talia taku kupu, ka i ei te tino e ia fakamahinoa ki lātou. Ko nā kupu kua tautala ai au, ka kavea ma fakamahino mo ki lātou, i te aho mulimuli!

⁴⁹ Auā e hē āku nā kupu e tautala ai au, kae ko te Tamana na ia uga maia au, e ia fakatonu maia nā kupu e tatau ke tautala ai au.

⁵⁰ Ma e iloa e au ko tana fakatonuga e maua ai te ola e fakavavau. Ko nā mea e tautala ai au, ko nā mea ia e lea mai ai te Tamana ke tautala ai au.”