Ioane 11 - Tokelauan New Testament

Ko te Oti o Lahalo

¹ Nae i ei he tamāloa e igoa ki a Lahalo nae nofo i Petania, na tauale. Ko Petania ko te kakai ia nae nonofo ai ia Malia ma tona uho ko Mafa.

² (Ko Malia tēnei na ia liligia nā lolo manogi ki nā vae o te Aliki ma holo ai i tona laulu, he tuagane e o ia ia Lahalo, tēia e tauale.)

³ Kua kave te faifekau e te uho tēnei ki a Iehu e vē, “Te Aliki, ko tau uō e alofa koe ki ei, e tauale.”

⁴ Kae i te lagonaga e Iehu o te mea tēnei, oi lea vē ai, “Ko te ikuga mulimuli o te tauale o Lahalo e hē ko te oti; ko te mea tēnei kua tupu ke fakaalia ai te mana o te Atua, ma ke vīkia ai te Ataliki o te Atua.”

⁵ Ko Iehu nae alofa ki a Mafa ma tona uho, ma Lahalo.

⁶ Kae i te ia lagonaga ko Lahalo e tauale, na nofo lava i te mea nae i ei ai, mo ni iētahi aho e lua.

⁷ Oi vāgana atu ai ia Iehu ki nā hoko o ia, “Tātou toe olo ki Iutea.”

⁸ Kua lea mai ona hoko ki a te ia, “Te Faiakoga, ko koe nei e hakili e nā tino Iutaia ke fetogi i ni fatu, kae ko koe e toe fia fano ki ei?”

⁹ Kua tali atu ia Iehu, “E hē luahefulu fa nei ia itūlā o te aho? Ko nā tino e havavali i te ao e hē tūhigahiga, auā e ki lātou kitea te mālamalama o te lalolagi tēnei.

¹⁰ Kae ko nā tino e havavali i te pō e tūhigahiga, auā ko te mālamalama e hē i loto o ki lātou.”

¹¹ Kua uma te lea atu vēnei o Iehu, oi toe lea atu ai, “Ko te tātou uō ko Lahalo e moe, kae ko au ka fano oi fafagu.”

¹² Kua tali mai ona hoko, “Te Aliki, kāfai ia Lahalo e moe, e toe mālohi.”

¹³ Kae ko te uiga o te kupu a Iehu, ko Lahalo kua oti, kae e vēake ki lātou, na lea ake ko Lahalo e moe.

¹⁴ Oi fakamanino ai e Iehu ki te ki lātou, kua lea vē atu, “Ko Lahalo kua oti;

¹⁵ ma ko au e fiafia ko au nae hē i ei ma ia, kae ke mafai ai koutou ke talitonu mai ki a te au. Keina tātou olo loa ki a Lahalo.”

¹⁶ Kua lea atu ia Toma (tēia e fakaigoa ko te Māhaga) ki iētahi o te kau hoko, “Tātou olo uma fakatahi ma te Faiakoga, kae ke oti fakatahi ki tātou ma ia.”

Ko Iehu te Toetū ma te Ola

¹⁷ I te taunuku atuga o Iehu, na ia iloa ai kua kātoa te fa o aho, talu te tuku o te tino o Lahalo ki te tugamau.

¹⁸ Ko Petania e tai lua maila te mamao ma Ieluhalema,

¹⁹ ma e tokalahi nā tino Iutaia na ōmamai oi fakamāfanafana ki a Mafa ma Malia, ona ko te oti o to lā tuagane.

²⁰ I te lagonaga e Mafa ko Iehu kua hau, oi fano ai oi fakafetaui ki ei, kae ko Malia kua nofo i te fale.

²¹ Kua lea atu ia Mafa ki a Iehu, “Te Aliki, anei ake koe nae i kinei, ko toku tuagane e hēki oti!

²² Kae e pa foki lava nei, e iloa e au ka fōki atu e te Atua ki a te koe, ho he mea lava e gogō atu ai koe ki te ia.”

²³ Kua lea mai ia Iehu ki ei, “Ko tō tuagane ka toe fakatū ki te ola.”

²⁴ Kua tali atu ia Mafa “E iloa e au ka toe fakatū ki te ola, i te aho mulimuli”

²⁵ Kua vāgana atu ia Iehu, “Ko au ko te toetū ma te ola. Ko nā tino e talitonu mai ki a te au ka ola, e ui lava e oti;

²⁶ ma ko nā tino e ola ma talitonu mai ki a te au, ka hē oti lele. E talitonu koe ki te mea tēnei?”

²⁷ Kua tali mai ia Mafa, “Io, te Aliki. Ko au e talitonu ko koe ko te Mehia, te Ataliki o te Atua, na tuku e hau ki te lalolagi.”

Kua Tagi ia Iehu

²⁸ Kua uma te lea vēnā o Mafa, oi toe liliu ai ki tona uho ko Malia, ma lea mālie atu ki ei, “Ko te Faiakoga kua i kinei, ma e fia kikila ki a te koe.”

²⁹ I te lagona atuga e Malia o te mea tēnei, oi tū vave ai loa ki luga kua fano oi fakafetaui ia Iehu. (

³⁰ Ko Iehu ko hēki pa ki te kakai, kae koi i ei lava i te mea na fakafetaui ai e Mafa.)

³¹ Ko nā tino Iutaia nae fakamāfanafana ki a Malia i loto o te fale, kua mulimuli ki a Malia i te taimi na ki lātou kitea atu ai kua tū ki luga ma fano vave ki fafo. Na vēakē, ko Malia e fano ki te tugamau oi tagi ai.

³² Kua pa atu ia Malia ki te mea e i ei ia Iehu, ma i te ia kitea atuga o Iehu, oi fakapakū ai ki lalo ki tafa o ona vae ma lea vē atu, “Te Aliki, anei ake koe nae i kinei, ko toku tuagane e hēki oti.”

³³ I te kitea atuga e Iehu ko Malia e tagi, ma ko nā tino Iutaia foki nae i ei ma ia e faitatagi, oi tīgā lahi ai tona loto, ma kua maua i te fakanoanoa lahi.

³⁴ Kua fehili atu ia Iehu, “Ko fea te kua tanu ai e koutou ia Lahalo?” Kua tali mai ki lātou, “Te Aliki, hau oi kikila.”

³⁵ Oi tagi ai ia Iehu.

³⁶ Kua lea vē nā tino Iutaia, “Kikila ki te lahi lele o te alofa o Iehu ki a Lahalo!”

³⁷ Kae ko iētahi tino kua lea vē, “Na fakapupula e ia nā mata o te tāuaho. He ā la te hēki ia mafaia ai oi puipuia ia Lahalo ke nahe oti?”

Kua toe Fakatū ia Lahalo ki te Ola

³⁸ Na toe lagona e Iehu te loto tīgā lahi, oi fano ai ki te tugamau; ko te tugamau ko he ana, ma e i ei he fatu e tapuni ai te faitotoka.

³⁹ Kua lea atu ia Iehu ki nā tino, “Kave kehe te fatu!” Kae kua tali mai ia Mafa, te tuafafine o te tamāloa kua oti, “Te Aliki, kua kātoa nei te fa o aho talu te tanu, ma kua manogi kino.”

⁴⁰ Kua lea atu ia Iehu ki a Mafa, “E hēki lea atu au e mafai ke kitea e koe te mana o te Atua, kāfai koe e talitonu?”

⁴¹ Oi kave kehe ai e ki lātou te fatu. Kua kikila ake ia Iehu ki te lagi ma vē ake, “Te Tamana, ko au e fakafetai atu ki a te koe, auā kua kē lagona mai au.

⁴² E iloa e au e kē lagona mai au i taimi uma. Kae ko au kua lea vēnei atu mo nā tino iēnei i kinei, ke mafai ai ki lātou ke talitonu, ko au na kē uga maia.”

⁴³ Kua lea vēnā atu ia, oi kalaga leo lahi ai vē, “Lahalo, hau ki fafo!”

⁴⁴ Kua hau ki fafo ia Lahalo, ko ona vae ma ona lima e fuhi i ni fuhi, ma nā mata e pulupulu i he kie. Oi lea atu ai ia Iehu ki a te ki lātou “Tatala kehe nā fuhi, oi tuku ai ke fano.”

Kua Lama ia Iehu ke Tāmate

⁴⁵ E tokalahi nā tino Iutaia na ōmamai oi āhi ia Malia, na ki lātou kitea te mea na fai e Iehu, ma na talitonu ai ki a te ia.

⁴⁶ Kae ko iētahi o ki lātou na olo ki te kau Falehaio, oi taku ki ei te mea na fai e Iehu.

⁴⁷ Oi na fono ai te kau Falehaio ma nā ohitāulaga hili fakatahi ma te Taupulega, ma kua lea vē ki atu lātou, “He ā ta ki tātou ka fai? Kikila ki te lahi o nā fakailoga kua fai e te tagata tēnei!

⁴⁸ Kāfai ka fakataga e ki tātou te tagata tēnei ke fai pea ana mea iēnei, ko nā tino uma lele ka talitonu ki a te ia, ma ka fakahaga mai ai te mālō o Loma oi fakakino te tātou Mālumalu, vēnā ma te tātou mālō!”

⁴⁹ Ko tētahi o ki lātou, ko Kaiafa tona igoa, ko ia te nae Ulu Ohitāulaga i te tauhaga tēnā, kua lea vēia, “Kai koutou te vālelea ātili!

⁵⁰ E hē koutou iloa e hili lele atu mo koutou te oti o he tino e fokotahi mo nā tino uma, i lo te fakakino o te mālō kātoa?”

⁵¹ Ko te mea moni, e hē mai ia te ia lava nā kupu iēnei; kae ona ko ia ko te Ulu Ohitāulaga i te tauhaga tēnā, na vavalo ai e ia, ko Iehu e oti mo nā tino Iutaia,

⁵² ma e hē nā mo nā tino Iutaia oioti, kae ka vēnā foki ona fakamāopoopo e ia nā tino uma o te Atua e takape i atunuku kehekehe, ke kavea e vē ko he tino e tahi.

⁵³ Na kāmata mai i te aho tēnā, oi lama ia Iehu e nā takitaki o Iutaia ke tāmate.

⁵⁴ Ko te mea ia na hēki toe feoaki ai ia Iehu i nā mea e kitea ai ia e nā tino Iutaia, kae kua fano ki he mea e pili ki te togāvao, ki te kakai e igoa ki a Efalaima, ma na nonofo ai i kinā ma ona hoko.

⁵⁵ Kua tafapili ki te taimi o te Kaiga Fakamanatu o te Pāheka, ma e tokalahi nā tino na oatu mai nā nuku i tua ki Ieluhalema, ke fakataunuku nā mea e tatau ke fai ke mamā ai ki lātou i nā mea tau tāpuakiga, ka ko hēki kāmata te Pāheka.

⁵⁶ Nae ki lātou hakilia ia Iehu, ma i te maopoopoga o ki lātou i te Mālumalu, oi taufai fehili atu ai tētahi ki tētahi, “He ā tō manatu? E i nā ka hē hau nei ki te Pāheka?”

⁵⁷ Oi fai ai te fakatonuga a nā ohitāulaga hili ma te kau Falehaio, ho he tino e ia iloa te mea e i ei ia Iehu, e tatau ke fakailoa ake, kae ke mafai ai e ki lātou oi puke.