Ioane 10 - Tokelauan New Testament

Ko te Talafakatuha o te Leoleomāmoe

¹ Kua vāgana ia Iehu, “E takutino atu e au ki a te koutou te meamoni: ko te tino e hē ulu i te faitotoka ki loto o te lōtoā o nā māmoe, kae kake ki loto kui i hētahi auala, ko he tino kaihohoa ma fāomea tēnā.

² Ko te tino e ulu ki loto kui i te faitotoka, ko ia tēnā ko te leoleomāmoe o nā māmoe.

³ E tatala ki a te ia te faitotoka e te leoleo faitotoka, ma e lagona e nā māmoe tona leo. E kalaga ki ana māmoe i o lātou igoa, ma e ia takitakia ki lātou ki fafo.

⁴ Kāfai e kave e ia nā māmoe ki fafo, e fano ki mua o ki lātou, oi mulimuli ai ki lātou ki a te ia auā e ki lātou matea tona leo.

⁵ Ka hē mulimuli ki lātou ki hētahi tino; kae ka fētutuli kehe ki lātou mai he tino vēnā, auā e hē ki lātou mateagia tona leo.”

⁶ Na fai e Iehu te talafakatuha tēnei ki a te ki lātou, kae e hēki mālamalama ki lātou pe he ā tona uiga.

Ko Iehu te Leoleomāmoe Lelei

⁷ Oi toe vāgana atu ai ia Iehu, “E takutino atu e au ki a te koutou te meamoni: ko au ko te faitotoka mo nā māmoe.

⁸ Ko iētahi tino uma lele na muamua mai ia te au, ni tino kaihohoa ma ni tino fāomea, kae e hēki fakalogo ki ei nā māmoe.

⁹ Ko au ko te faitotoka. Ko nā tino e kui mai ia te au, ka fakahao; ka ōmamai ki loto ma olo ki fafo ma ki lātou maua te vao lelei.

¹⁰ Ko te tino kaihohoa e hau oioti ke kaihohoa, ke tāmate ma ke fakatāugā. Ko au na hau kae ke maua ai e ki lātou te ola — te ola e kātoatoa i mea uma.

¹¹ “Ko au ko te leoleomāmoe lelei. Ko te leoleomāmoe lelei e ofo atu e ia tona ola, mo ana māmoe.

¹² Ko te tino faigāluega totogi kae e hē ko he leoleomāmoe, ma e hē a ia nā māmoe, e vili kehe kae tīaki nā māmoe kāfai e ia kitea he luko; oi ohofaki ai e te luko nā māmoe ma fakatākapekape ai ki lātou.

¹³ E vili kehe te tino faigāluega, auā ko ia kua nā ko he tino faigāluega, ma e hēai hona popole ki nā māmoe.

¹⁴ Ko au ko te leoleomāmoe lelei. E vē ona iloa au e te Tamana ma iloa e au te Tamana,

¹⁵ e vēnā foki ona iloa e au aku māmoe, ma ki lātou iloa au. Ma e ofo atu e au toku ola, mo ki lātou.

¹⁶ E i ei iētahi aku māmoe e hē i loto o te lōtoā tēnei. E tatau ke kō kaumaia foki ki lātou, ma ka uhitaki ki lātou ki toku leo. Oi ka tahi ai te lafu māmoe, ma tahi foki te leoleomāmoe.

¹⁷ “Ko te Tamana e alofa mai ki a te au, ona e ofo atu e au toku ola, kae ke toe maua ai e au.

¹⁸ E hēai he tino e ia kave kehea toku ola mai ia te au, kae e kō ofo atua i toku loto malie. E ia te au te pule ke ofo atu ai toku ola, ma e ia te au foki te pule e toe kaumai ai. Ko te mea tēnei kua fakatonu mai e toku Tamana ke kō faia.”

¹⁹ Ma na toe i ei ai foki he fekehekeheakiga i nā tino Iutaia, ona ko nā kupu iēnei.

²⁰ E tokalahi ki lātou na lea vē, “Ko te tagata tēnei e ulufia e he tēmoni! E hē lelei te māfaufau. He ā la te fakalogo tauanoa ai koutou ki ei?”

²¹ Kae ko iētahi na lea vē, “E hē ni kupu iēnei e tautala ai he tino e ulufia e he tēmoni! E mafai vēhea e he tino e ulufia e he tēmoni, oi toe fakapupula nā mata o nā tino tāuaho?”

Kua Teteke ia Tagata ki a Iehu

²² Kua pa ki te taumālūlū, te taimi e fakamanatu ai i Ieluhalema te Fakapaiaga o te Mālumalu.

²³ Ko Iehu nae havalivali i loto o te poletito e takua ko te Poletito o Holomona i loto o te Mālumalu,

²⁴ kae ōmamai nā tino Iutaia kua fakapotopoto fakatāmilo ia te ia ma fehili vē mai ki ei, “He ā te mataloa ka mumuni ai pea e koe te meamoni mai ia te ki mātou? Kāfai ko koe ko te Mehia, taku hako mai la ki a te ki mātou!”

²⁵ Kua tali atu ia Iehu, “Kua uma toku lea atu ki a te koutou, ka ko koutou e hē fia talitonu mai ki a te au. Ko nā gāluega e kō faia i te igoa o toku Tamana, e molimau ki a te au;

²⁶ kae ko koutou e hē talitonu, auā ko koutou e hē ni māmoe e āku.

²⁷ E lagona e aku māmoe toku leo, ma e iloa e au ki lātou, ma e mulimuli mai ki a te au.

²⁸ E kō fokia ki a te ki lātou te ola e fakavavau, ma ka hē fakaumatiagia lele ki lātou. E hē mafai e he tino oi hamu kehe atu ki lātou mai taku tauhiga.

²⁹ Ko te mea kua fōki mai e toku Tamana ki a te au e hili lele atu ma e hē mafai ke hamu kehe e he tino mai te tauhiga a te Tamana.

³⁰ Ko te Tamana ma au, e tahi ki māua.”

³¹ Oi toe papae ifo ai nā tino Iutaia ki ni fatu ka fetogi ai ia Iehu.

³² Kua lea atu ia Iehu ki a te ki lātou, “Kua fakailoa atu e au ki a te koutou te lahi o nā gāluega lelei na tuku mai e te Tamana ki a te au ke fai; tēfea la te gāluega o nā gāluega iēnei ka fetogi ai au e koutou?”

³³ Kua tali mai nā tino Iutaia, “Ko koe e hē fia fetogia e ki mātou ona ni gāluega lelei e a koe na fai, kae ona ko koe kua fāifāi ki te Atua. Ko koe kua nā ko he tagata, kae ko koe e taumafai ke kavea koe ma Atua.”

³⁴ Oi tali atu ai ia Iehu, “E tūhia i nā Tūlāfono a koutou ko te Atua na vāgana vē, ‘Ko koutou ni atua.’

³⁵ E iloa e ki mātou ko te mea e lea mai ai te tuhituhiga paia e hē mafai ke toe kave keheagia; ma na tākua e te Atua nā tino na kaumaia tana kupu, ni atua.

³⁶ Kae vē la ki a te au, ko te Tamana lava ia te na ia filifiliagia au, ma na ia uga maia au ki te lalolagi. E vēhea la ona lea koutou ko au e fāifāi ki te Atua ona ko au na lea atu, ‘Ko au ko te Ataliki o te Atua?’

³⁷ Kāfai e hē faia e au nā mea e fai e toku Tamana, ia koutou la nahe talitonu mai ki a te au.

³⁸ Kae kāfai e fai e au nā mea iēnei, e ui lava ko koutou e hē talitonu mai ki a te au, kae e tatau lava ke talitonu koutou ki nā gāluega na fai e au, kae ke koutou iloa ai ma te mautinoa, ko te Tamana e ia te au, ma ko au e i te Tamana.”

³⁹ Oi toe taumafai ai foki ki lātou ke puke ia Iehu, kae kua hola kehe ia mai ia te ki lātou.

⁴⁰ Oi toe fano ia Iehu ki tētahi itū o te Vaitafe ko te Iolitana, ki te mea nae fai ai te papatihoga a Ioane, ma nofo ai i kinā.

⁴¹ E tokalahi nā tino na ōmamai ki a te ia, ma nae lea vē ki lātou, “E hēki faia e Ioane ni fakailoga, kae ko nā mea uma lele na lea mai ai e uiga ki te tino tēnei, kua hako lava.”

⁴² E tokalahi foki ki lātou nae i kinā, na talitonu ki a te ia.