Ioane 1 - Tokelauan New Testament

Ko te Kupu o te Ola

¹ Nae i te kāmataga te Kupu, ma nae i ei fakatahi ma te Atua, ma ko te Kupu ko te Atua.

² Nae i ei ia i te kāmataga ma te Atua,

³ ma na fai e te Atua nā mea uma e ala i te Kupu; e hēai foki he mea e fokotahi i te lagi ma te lalolagi na fai, kae hē i ei te Kupu.

⁴ Ko te Kupu ko te puna o te ola, ma ko te ola tēnei na kaumaia te mālamalama ki tagata.

⁵ Ko te mālamalama e huhulu i loto te pōuliuli, ma e hēki mafai lele e te pōuliuli oi tāmate.

⁶ Na uga mai e te Atua tana kavefekau, ko Ioane tona igoa,

⁷ na hau ke fai ma molimau, ma fakailoa atu ki tagata e uiga ki te mālamalama, kae ke talitonu uma ai ki lātou ona ko ia.

⁸ E hē ko ia te mālamalama; kae na hau ke molimau e uiga ki te mālamalama.

⁹ Ko te mālamalama moni tēnei — ko te mālamalama e hau ki te lalolagi ma huhulu atu ki tagata uma, kae ke ki lātou kitea ai te meamoni.

¹⁰ Ko te Kupu nae i te lalolagi, ma ko te lalolagi na gaohia e ala ia te ia, kae e hēki iloa ia e te lalolagi.

¹¹ Na hau ki tona nuku, kae e hēki talia ia e ona tagata.

¹² Kae ko ki lātou uma na taliagia ia ma talitonu ki ei; na ia tuku atua ki ei te haolotoga, ke kavea ai ki lātou ma fānau a te Atua.

¹³ E hēki kavea ki lātou ma fānau a te Atua, e vē ko te tūlaga māhani fakatetagata, e fānanau mai ni fānau e a he tamana; kae ko te Atua lava ia, ko to lātou Tamana.

¹⁴ Na liu tino tagata te Kupu ma nae mau fakatahi ma ki mātou, ma tumu i te alofa tūnoa ma te fakamāoni. Na kikila ki mātou ki tona mamalu, te mamalu o te Ataliki e tokatahi o te Tamana.

¹⁵ Na molimau ia Ioane e uiga ki a te ia, ma nae taukalaga vēia, “Ko tēnei te tino na lea atu ai au, i toku lea atuga vē, ‘E hau mulimuli ia ia te au, kae e hili atu tona mamalu i lo au, auā nae i ei ia ka ko hēki fānau mai au.’ ”

¹⁶ Ona ko te lahi o tona alofa tūnoa, kua fakamanuia ai ki tātou uma e ia, ma maua ai e ki tātou nā fakamanuiaga hautualahi.

¹⁷ Ko nā Tūlāfono, na tuku mai e te Atua kui mai ia Mohe; kae ko te alofa tūnoa ma te meamoni, na kui mai ia Iehu Keliho.

¹⁸ E hēai he tino na kua ia kitea te Atua. Ka ko te Ataliki e tokatahi e nofo i tafa o te Tamana, ko ia te kua ia fakailoa maia te Atua.

Ko te Molimau a Ioane te Papatiho

¹⁹ Ko tēnei te molimau a Ioane, i te uga atuga e nā takitaki o Iutaia i Ieluhalema ni ohitāulaga ma ni ha-Levī ke fehili vē ki ei, “Ko ai koe?”

²⁰ E hēki fakafiti ia Ioane oi tali ki ei, kae kua ia fakamaninoa lelei lava ki a te ki lātou, i te leaga vē ki ei, “E hē ko au te Mehia.”

²¹ “Ko ai la koe?” kua fehili vē mai ki lātou. “Ko koe nei ko Elia?” “Hēai, e hē ko au,” kua tali atu ia Ioane. “Ko koe nei la ko te Pelofeta?” kua lea mai ki lātou. “Hēai,” kua tali atu ia Ioane.

²² “Taku mai la ki a te ki mātou pe ko ai koe,” kua toe lea atu ki lātou. “E tatau ke olo ki mātou ma he tali ki nā tino na uga maia ki mātou. Lea mai ake pe ko ai koe?”

²³ Ka kua tali atu ia Ioane i nā kupu a te pelofeta ko Ihaia: “Ko au ‘ko te leo e taukalaga i te vao: Fakahakohako he auala mo te Aliki ke kui ai!’ ”

²⁴ Ko nā kavefekau na uga atu e te kau Falehaio,

²⁵ kua fehili vē atu ki a Ioane, “He ā la te papatiho ai e koe nā tino kāfai ko koe e hē ko te Mehia, pe ko Elia pe ko te Pelofeta?”

²⁶ Kua tali mai ia Ioane, “E kō papatihoa koutou i te vai, kae e i kinā ia te koutou he tino, e hē koutou iloa.

²⁷ E mulimuli mai ia ia te au, kae e hē aogā au ke kō tatala ona hēvae.”

²⁸ Ko nā talatalanoaga iēnei, nae fai i Petania i te itū i hahae o te Vaitafe ko Iolitana, te mea nae fai ai te papatihoga a Ioane.

Ko te Punuamāmoe a te Atua

²⁹ I te aho alafaki na kitea atu ai e Ioane ia Iehu e agai mai ki a te ia, oi lea ai vē, “Kikila, tēia te Punuamāmoe a te Atua e kave keheagia ia agahala a te lalolagi!

³⁰ Ko ia tēnei na lea atu ai au, ‘E i ei he tino e mulimuli mai ia te au, kae e hili atu ia i lo au, auā nae i ei ia ka ko hēki fānau mai au.’

³¹ Nae hē kō iloa pe he tino vēhea, kae ko au na hau ke papatiho i te vai, kae ke fakailoa atu ai ia, ki tagata o Ihalaelu.”

³² Oi fai ai te molimau a Ioane: “Na kō kitea te Agaga Paia e fanaifo mai te lagi e vē he lupe, ma nofo i ona luga.

³³ Nae hē kō iloa pe he tino vēhea, kae ko te Atua, na ia uga maia au ke papatiho i te vai, na vāgana mai ki a te au, vē mai, ‘Ka kitea e koe te Agaga e fanaifo oi nofo i luga o he tino; ko ia tēnā te ia papatihoa i te Agaga Paia.’

³⁴ Kua kō kitea,” kua lea vēnā atu ia Ioane, “ma e lea atu au ki a te koutou, ko ia tēnei ko te Ataliki o te Atua.”

Ko nā Hoko Muamua o Iehu

³⁵ I te aho alafaki, na toe tū ai foki ia Ioane i kinā fakatahi ma ona hoko e toka lua,

³⁶ ma i te ia kitea atuga o Iehu e havali ake, oi lea ai vē, “Kikila, tēia te Punuamāmoe a te Atua!”

³⁷ Kua lagona atu e nā hoko e toka lua o ia te mea tēnei, oi olo ai kua mulimuli ki a Iehu.

³⁸ Kua fāliu mai ki tua ia Iehu, oi kitea ai e ia te toka lua e mulimuli ake ki a te ia, oi fehili atu ai ki ei, “He ā ta koulua e hakili?” Kua tali mai ki lāua, “Lāpi, ko koe e nofo i fea?” (Ko te uiga o te kupu tēnei, “Te Faiakoga.”)

³⁹ “Ōmai oi kikila,” kua tali atu ia Iehu. I te taimi tēnā kua ta te fa i te afiafi. Oi olo ai te toka lua ma Iehu, ma na ki lā kitea ai te mea e nofo ai Iehu, oi nonofo ai lava fakatahi ma ia i kinā, i te aho tēnā.

⁴⁰ Ko tētahi o ki lāua iēnei, ko Anitelea, te uho o Himona Petelu.

⁴¹ Na maua muamua e ia tona uho ko Himona, oi lea vē atu ai ki ei, “Kua maua e ki māua te Mehia” (Ko te uiga o te kupu tēnei “Keliho.”)

⁴² Oi kave ai e ia ia Himona ki a Iehu. Kua kikila atu ia Iehu ki a Himona, oi vāgana atu ai ki ei, “Ko tō igoa ko Himona te ataliki o Ioane, kae ko koe ka fakaigoa ki a Kepa.” (Ko he kupu i te gagana Alamaika e tutuha ma te igoa Petelu i te gagana Eleni, ko tona uiga “papa.”)

Kua Kalaga ia Iehu ki a Filipo ma Natanielu

⁴³ I te aho alafaki, na tonu ai ia Iehu ko ia ka fano ki Kalilaia. Na maua e ia ia Filipo, oi lea vē atu ai ki ei, “Mulimuli mai ki a te au.”

⁴⁴ Ko Filipo e hau mai Petehaita, te kakai e nonofo ai ia Anitelea ma Petelu.

⁴⁵ Kua maua e Filipo ia Natanielu, oi lea atu ai ki ei, “Kua maua e ki mātou te tino na lea ai ia Mohe i te tuhi o te Tūlāfono, ma na tākua foki i nā tuhituhiga a te kau pelofeta. Ko Iehu tona igoa, te ataliki o Iohefa mai Nahaleta.”

⁴⁶ Kua lea atu ia Natanielu “Kogā e i ei he mea lelei e mafai ke hau mai i Nahaleta?”. “Hau oi kikila,” kua tali mai ia Filipo.

⁴⁷ I te kitea atuga e Iehu ko Natanielu e hau ki a te ia, oi lea ai vēia, “Kikila, he Ihalaelu moni tēnei; he tino e hē mafai ke pepelo!”

⁴⁸ Kua fehili atu ia Natanielu ki a Iehu, “Na kē iloa vēhea au?” Kua tali mai ia Iehu, “Na kō kitea koe i lalo o te mati, ka ko hēki kalaga atu ia Filipo ki a te koe.”

⁴⁹ “Te Faiakoga,” kua tali atu ia Natanielu, “ko koe ko te Ataliki o te Atua! Ko koe ko te Tupu o Ihalaelu!”

⁵⁰ Kua lea atu ia Iehu, “Ko koe nei kua talitonu ona ko au na lea atu, na kō kitea koe i lalo o te mati? Ka kē kiteagia nā mea e tutupu, e hili atu lele te ofoofogia i lo te mea tēnei!”

⁵¹ Oi toe lea atu ai ia Iehu, “E takutino atu e au ki a te koutou te meamoni; ka kitea e koutou te lagi e matala, ma nā agelu a te Atua e ōake ki luga ma ōifo ki lalo i luga o te Ataliki o te Tagata.”