Iakopo 5 - Tokelauan New Testament

¹ Ma i te taimi nei, koutou nā tino maukoloa, fakalogo mai ki a te au. Faitatagi ma taukekē ona ko nā puapuagā ka pakū atu ki outou luga!

² Ko autou koloa kua pala ma outou kofu kua kai e mogamoga.

³ Ko autou aulo ma autou hiliva kua tumu i te palatoki, ma ko te palatoki tēnei ka kavea ma fakamāoniga e uiga ki a te koutou, ma ka kaia outou tino e vē he afi. Kua koutou fakaputua nā koloa i nā toe aho.

⁴ Kikila, kua hē totōgia e koutou nā tino faigāluega i nā fatoaga o koutou. Fakalogo atu ki a lātou faitioga! Ko te faitatagi a nā tino na ki lātou fakaputuagia na fua o autou fatoaga, kua lagona e te Atua, te Aliki Hilihilikehe.

⁵ Ko te ōlaga o koutou i te lalolagi nei, kua tumu i nā mea lelei taugatā ma fiafiaga o te ōlaga. Kua koutou fakapepetia lava koutou mo te aho e tafahi ai.

⁶ Kua fakahala ma tāmate e koutou nā tino e hēai ni agahala, ma nae hē teteke atu ki a te koutou.

Onohai ma Tatalo

⁷ Koutou la ke onohai, te kau uho, ke pa ki te aho e haele mai ai te Aliki. Kikila ki te onohai o nā faifatoaga ka koi fakatalitali ke maua mai ni fua tāua mai o lātou fenua! E fakatalitali ma te onohai ke pa ki te vāitaimi e ua ai i te kāmataga ma i te vāitaimi ka helehele ai.

⁸ Ko koutou foki la e tatau ke onohai. Ke tūmau te koutou fakamoemoe, auā ko te aho e haele mai ai te Aliki kua pili mai.

⁹ Te kau uho, nahe mūimui tētahi ki tētahi, kae ke nahe fakamahinoa ai koutou e te Atua. Kikila, ko te fakamahino kua tū i te faitotoka, kua hāuni ka hau.

¹⁰ Te kau uho, ke manatua e koutou nā pelofeta na tautatala i te igoa o te Aliki. Ke kavea ki lātou ma fakatakitakiga ki a te koutou e uiga ki te onohai i nā puapuagā.

¹¹ Ko nā tino e onohai e lea ki tātou e fiafia. Kua fakalogo koutou ki te onohai o Iopu, ma e koutou iloa nā mea na fai e te Aliki mo ia i te fakaikuga. Ko te Aliki e tīgā alofa ma alofa fakamāgalo.

¹² Kae fakamuamua i nā mea uma te kau uho, nahe koutou tautō kāfai e fai he koutou folafolaga. Nahe koutou tautō i te igoa o te lagi pe o te lalolagi pe o hētahi lava mea. Lea vē oioti, “Io” pe kāfai koe e loto ki ei, ma “Hēai” kāfai koe e hē loto ki ei, kae ke nahe kavea ai koutou ki lalo o te fakamahinoga a te Atua.

¹³ E i ei ni tino o koutou e maua i ni mafatiaga? E tatau koutou ke tatalo ki te Atua. E i ei ni tino o koutou e fiafia? E tatau koutou ke pepehe i nā viviki ki te Atua.

¹⁴ E i ei ni tino o koutou e tauale? E tatau koutou ke lea ki nā toeaina o te Ekalehia ke ōmamai ke tatalo mo koutou, ma uku koutou i te lolo, i te igoa o te Aliki.

¹⁵ Ko te tatalo tēnei o te fakatuatua ka fakamālōlō ai nā tauale; ka fakafoki e te Aliki to lātou mālohi, ma fakamāgalo e ia a lātou agahala.

¹⁶ Ko te mea ia, e tatau ke fakamāhani koutou i te takutaku atu o agahala a tētahi ki tētahi ma tatalo tētahi mo tētahi, kae ke mālōlō ai koutou. Ko te tatalo a te tino lelei, e mālohi ma e fehoahoani lahi lele ki a te ia.

¹⁷ Ko Elia ko he tino e vē lava ko ki tātou. Na tatalo fakatauanau ke nahe ua, ma na kātoa te tolu ma te āfa tauhaga e hēki i ei he ua na pakū ki luga o te kelekele.

¹⁸ Oi toe tatalo ai foki, ma to ai loa ia uaga ma fua mai ai nā lākau o te kelekele.

¹⁹ Te kau uho, kāfai he tino o koutou e fano kehe mai te meamoni kae toe kaumai e he tino o koutou,

²⁰ ke koutou manatua te mea tēnei: ko ai lava e ia toe kaumaia he tino agahala mai te auala hehē, ka fakahao e ia te agaga o te tino tēnā mai te oti ma ka fai tēnā ma auala e fakamāgalo ai ia agahala e lahi.