Iakopo 4 - Tokelauan New Testament

¹ He ā te tauaimiha ma fakavāvā ai koutou? E māfua ona ko koutou e tumu i nā manakoga o te lalolagi, e tauva pea lava i loto ia te koutou?

² E fofou koutou ki nā mea, kae e hē mafai ke maua e koutou, oi kua oho ai he manatu kua fia tāmate tino; e naunau lahi koutou ki ni mea kae e hē mafai ke maua e koutou, oi fakavāvā ai koutou ma tauaimiha. E hē maua e koutou nā mea e fofou koutou ki ei auā ko koutou e hē gogō atu ki te Atua.

³ Ma kāfai koutou e gogō atu ki te Atua, e hē koutou maua auā ko te mea e fakavae ai outou manatu e hehē; ko koutou e gogō ki nā mea o te lalolagi e fakaaogā ke fiafia ai lava koutou.

⁴ Ko koutou e vē ni tino kua mulilua. E hē koutou iloa ko te fakauō ma te lalolagi ko te teteke tēnā ki te Atua? Ko nā tino e fofou ke kavea ki lātou ma uō a te lalolagi, kua ki lātou faia lava ki lātou ma fili o te Atua.

⁵ Koutou nahe vēakē e hē moni te tuhituhiga paia e lea vē mai, “Ko te agaga na tuku mai e te Atua ki a te ki tātou, e tumu i nā manakoga mālolohi.”

⁶ Kae ko te alofa tūnoa o te Atua e hili atu tona mālohi. E vēia oi lea mai te tuhituhiga paia, “Ko te Atua e teteke ki nā tino fakamaualuga kae fakaali tona alofa tūnoa ki nā tino loto maulalo.”

⁷ Ko te mea ia, e tatau koutou ke uhiuhitaki lelei ki te Atua. Teteke atu ki te Tiāpolo, oi ka hola kehe ai ia ma koutou.

⁸ Fakatafapili ki te Atua, oi fakatafapili mai ai ia ki a te koutou. Fafano outou lima, koutou nā tino agahala! Fakamamā outou loto, koutou nā tino fakagutugutulua!

⁹ Faitatagi ma fakanoanoa ma lauē; hui tautou kata ki te tagi, ma te fiafia ki te faūū!

¹⁰ Fakamaulalo i mua o te Aliki, oi hiki ake ai koutou e ia ki luga.

Nahe Fakamahino Tētahi ki Tētahi

¹¹ Te kau uho, nahe faitio tētahi ki tētahi. Kāfai e faitio pe fakamahino e koe hētahi tino, kua faitio ma fakamahino e koe te Tūlāfono. Kāfai e fakamahino e koe te Tūlāfono, ko tona uiga ko koe ko he tino e hē i lalo o te Tūlāfono, kae ko he tino e fakamahino e ia.

¹² E fokotahi oioti lava te faitūlāfono ma te fakamahino, ko te Atua. Nā ko ia oioti te ia mafaia oi laveakia he tino pe fakahala. Ko ai la koe, ke fakamahino ai e koe hētahi tino?

Lapatakiga ke Nahe Fāfifia

¹³ Fakalogo mai ki a te au koutou iē e lea vē, “I te aho nei pe ko taeao, ko ki tātou ka olo ki he kakai pe ko fea lava, ma nonofo i kinā mo he tauhaga, ma fai ni a tātou pihinihi ke lahi a tātou tupe,”;

¹⁴ oi kae e hē koutou iloa pe he ā te ka pa ki ei te koutou ola i te aho taeao. Ko koutou e vē ko te puao, e hula oioti mo he taimi pukupuku oi toe mou kehe ai.

¹⁵ Kae ko koutou e tatau ke lea vē, “Kāfai e tuha ai ma te finagalo o te Aliki, ko ki tātou ka ola ma fai te mea tē ma te mea tē.”

¹⁶ Kae ko koutou e fāfifia ma gugutu. Ko nā itūkāigā gugutu uma vēnā e kino.

¹⁷ Ko te mea ia, kāfai kua iloa e ki tātou te mea e tatau ke fai kae hē ki tātou faia, ko ki tātou la kua agahala.