Iakopo 3 - Tokelauan New Testament

¹ Te kau uho, e hē tatau ke tokalahi ni tino o koutou e fai ma faiakoga. E vē ona koutou iloa, ko ki mātou nā faiakoga, ka hili atu te mamafa o te fakamahinoga o ki mātou tau tokatahi e fai e Atua, i lo iētahi tino.

² Ko ki tātou uma e tofu ma te hehē. Kae kāfai he tino e hēai lele hona hehē i nā kupu e tautala ai, ko te tino tēnā e kātoatoa te lelei ma e ia mafaia foki oi pūlea tona tino kātoa.

³ Kāfai e ki tātou tukua he fāgutu ki te gutu o he holofanua ke uhitaki mai ai ki a te ki tātou, e takitaki e ki tātou tona tino kātoa ki ho he mea e fofou ki tātou ki ei.

⁴ Pe māfaufau foki ki nā vakafailā: e ui i te lalahi ma e fakatele i nā matagi mālolohi, kae e uliuli e he tamākīkī foeuli, ma e fano ki ho he mea e fofou te kapiteni ke fano ki ei.

⁵ E vēnā foki la te laulaufaiva: e ui e taigole, kae e tautala mimita ki nā mea lalahi. Māfaufau ki te lahi o he togāvao kae e mafai lava ke fakamū e he tamā maloiafi!

⁶ Ma ko te laulaufaiva e vē ko he afi. Ko he lalolagi o mea hehē, ma ko he vāega o nā itū tino o ki tātou, e ia fakakinoa o tātou tagata kātoa. E fakamū e ia o tātou ōlaga kātoa i te afi mai kēna.

⁷ Ko itūkāigā manu fekai ma manulele uma, manu fetolofi i te kelekele ma ika o te tai, e mafai ke pūlea ma kua pūlea e tagata,

⁸ kae e hēai he tagata ola e ia mafaia oi pūlea te laulaufaiva. E hē mafai ke mapu ma e tumu i te kona e mate ai te tino.

⁹ E fakaaogā e ki tātou ke fakafetai ai ki to tātou Aliki ma to tātou Tamana, ma fakaaogā foki e ki tātou ke fetū ai iētahi tino kua gaohia i te fakatuha o te Atua.

¹⁰ Ko nā kupu e fakafetai ai ma nā kupu e fetū ai, e hau ki fafo mai te gutu e fokotahi. Oku uho, ko te mea tēnei e hē tatau ke tupu!

¹¹ E hēai he vaipuna e puna fakatahi mai ai he vai māgalo ma he vai hualua!

¹² Oku uho, e hē mafai e he mati oi fua mai ni ōlive, pe he tōvine ke fua mai ai ni mati? E hē mafai foki e he vaipuna kokona ke puna mai ai he vai māgalo.

Ko te Poto mai te Lagi

¹³ Ko ai te tino o koutou e poto ma mālamalama? E tatau ke ia fakamāoniagia e ala i tona ōlaga lelei, ma ana gāluega lelei e fai i te loto maulalo ma te poto.

¹⁴ Kae kāfai nā loto o koutou e tumu i te fuā, te ita ma te fakapito, koutou nahe gugutu ma talapepelo ke mumuni ai te meamoni.

¹⁵ Ko te itūkāigā poto tēnā e hē mai te lagi, kae e mai te lalolagi. E hē ko he mea tau te agaga, kae he mea tau tēmoni.

¹⁶ Auā ko te mea e i ei te fuā ma te fakapito, ka i ei ai foki te vevehi ma nā itūkāigā āmio kino uma.

¹⁷ Kae ko te poto mai te lagi e mamā, ma e fakatupuagia te fīlēmū, te agamalū ma te loto fiafia; e tumu i te tīgā alofa ma e fua mai ai nā fua o nā gāluega lelei e lahi; e hē i ei he loto kino ma hē fakagutugutulua.

¹⁸ Kāfai e totō nā fatu o te fīlēmū e nā tino e fakatupua te fīlēmū, ka helehele e ki lātou te āmiotonu.