Iakopo 2 - Tokelauan New Testament

¹ Te kau uho, ko koutou kua talitonu ki to tātou Aliki mamalu ko Iehu Keliho, ma e hē tatau ai la koutou ke fakailoga tino fua i te kikila atu i fafo.

² Auā kāfai he tino e fai ni ona mama aulo ma ni kofu mānanaia e fanatu ki loto o te mea e maopoopo ai koutou, ma fanatu foki ki loto ma he tino mativa i ni kofu gāhaehae,

³ ma kāfai koutou ka tuahā oioti ki te tino e mānanaia ona kofu ma lea vē atu ki ei, “Nofo mai ki te nofoa tēnei fakamolemole,” kae lea vē atu koutou ki te tino mativa, “Tū i kinā,” pe “Nofo ki luga o te fola o te fale ki tafa o oku vae.”

⁴ Kāfai e koutou faia te mea tēnā, ko tona uiga ko koutou kua fakailoga tino ma kua kavea koutou ma fakamahino kino.

⁵ Fakalogo mai koutou te kau uho pele! Na filifilia e te Atua nā tino mātitiva o tēnei lalolagi ke mau koloa i te fakatuatua, ma ke fai mo ki lātou te Mālō o te Atua, tēia kua folafola e ia mo ki lātou e alolofa ki a te ia.

⁶ Kae kua fai e koutou te mea e fakamahiahi ai nā tino mātitiva. Ko ai te honafaia koutou ma kavea koutou ki te fakamahinoga? Ko nā tino mau koloa!

⁷ Ko ki lātou lava iēnei te fāifāi ki te igoa lelei o te Aliki tēia kua uma te fakamanuiagia ai o koutou.

⁸ Ko he mea e tatau lava ke koutou faia, te uhitaki ki te tūlāfono o te Mālō o te Atua e vē oi tūhia i te tuhituhiga paia, “Alofa ki tō tuākoi e vē oi alofa koe ki a te koe lava.”

⁹ Kae kāfai koutou e fakailoga tino fua ki te kikila atu i fafo, ko koutou la kua hala i te agahala, ma e fakahalagia koutou e tuha ai ma nā kupu kua tūhia ai te Tūlāfono a te Atua.

¹⁰ Auā ko ai lava e tauhi ki nā tūlāfono uma, kae ia holia he tūlāfono e fokotahi, kua hala ia i te holi o nā tūlāfono uma.

¹¹ Auā ko te Atua foki lava te na lea vē, “Nahe kē mulilua,” ma na lea vē foki, “Nahe kē tāmate tino.” E tuha lava la pe ko koe e hē mulilua, kae kāfai koe e tāmate tino, kua kavea koe ko he tino holi tūlāfono.

¹² Tautatala la ma gālulue ke kitea ai e iloa e koutou ko koutou e fakamahino e te Tūlāfono, tēia e maua ai e tagata te haolotoga.

¹³ Fai te mea tēnei auā i te aho fakamahino, e hēai he alofa fakahao e fakaalia mo he tino nae hē alofa fakahao ki iētahi tino. Kae e pa foki lava ki te faiga o tana fakamahinoga, ko te Atua e alofa fakahao.

Fakatuatua ma Fakatinoga

¹⁴ Te kau uho, he ā nei te aogā pe kāfai he tino o koutou e lea ko ia e fakatuatua, kae e hēai ni fakatinoga ke fakamāonia ai? E mafai nei e te fakatuatua tēnā ke fakaola e ia te tino tēnei?

¹⁵ Kāfai he uho pe he tuafafine e hē lava ona kofu ma hē lava ana meakai i nā aho takitahi,

¹⁶ ma e lea vē atu he tino o koutou ki ei, “Ke fakamanuia te Atua ki a te koe. Fakamāfanafana lelei ma ke lava tau mea e kai,” kae hē fōkia ki ei nā mea e manakomia e ia ke ola ai, he ā nei te aogā?

¹⁷ E vēnā foki la te fakatuatua; kāfai e nā ko te fakatuatua oioti kae hēai ni gāluega, e hēai he aogā.

¹⁸ Kae ka lea vē he tino, “E mafai ke fakatuatua tētahi tino kae fai ni gāluega e tētahi.” Ko taku tali ki ei, “Fakahino mai pe vēhea ona i ei he fakatuatua i he tino kae hē faia ni ana gāluega? Ka fakahino atu e au toku fakatuatua e ala ai aku gāluega.”

¹⁹ E talitonu koe e fokotahi oioti te Atua? Te lelei! Ko nā tēmoni foki e talitonu — ma e tete o lātou tino i te mātataku.

²⁰ Kai koe te valea! E fofou koe ke fakahino atu ki a te koe ko te fakatuatua e aunoa ma ni gāluega, e hēai he aogā?

²¹ Na vēhea ona fakaleleia te va o to tātou tupuna ko Apelaamo ma te Atua? Na mafai ona ko ana gāluega nae fai, e vē ko te ofo atuga o tona ataliki ko Ihaako ma tāulaga ki te Atua, i luga o te fata faitāulaga.

²² E kē kitea la, ko te fakatuatua o Apelaamo ma ana gāluega nae olo fakatahi lava. Kua ia fakamāonia ai la ko tona fakatuatua e moni e ala i ana gāluega nae fai.

²³ Ma kua taunuku ai te tuhituhiga paia e lea mai, “Ko Apelaamo nae fakatuatua ki te Atua, ma ko tona fakatuatua na fakaleleia ai e te Atua tona va ma ia.” Ma na takua ai ia he uō e a te Atua.

²⁴ Kua koutou kitea la, ko nā gāluega a ki tātou te fakalelei ai to tātou va ma te Atua, kae e hē nā ko te fakatuatua oioti.

²⁵ Na vēnā foki ia Lahapa te fafine talitāne. Na fakalelei tona va ma te Atua i ana gāluega nae fai, i te kua taliagia e ia o nā hipai Ihalaelu ki loto o tona fale, ma fehoahoani ki te fakahoholaga kui i hētahi auala.

²⁶ Ko te tino e hē mānava kua mate, ma e vēnā foki te fakatuatua e aunoa ma ni gāluega, kua mate.