Iakopo 1 - Tokelauan New Testament

¹ Mai ia Iakopo, he kaukauna e a te Atua ma e a te Aliki ko Iehu Keliho: E fakatālofa atu ki nā puikāiga e hefululua e takape i te lalolagi kātoa.

Ko te Fakatuatua ma te Poto

² Te kau uho, koutou ke fiafia kāfai koutou e maua i te lahi o itūkāigā tofotofoga kehekehe,

³ auā e iloa e koutou, kāfai e manumālō te koutou fakatuatua, ka kavea tēnā ma mea e maua ai te onohai.

⁴ Ma ke mautinoa e mafai e koutou oi onohai i nā mea uma, kae ke lelei kātoatoa ai koutou ma hēai he mea e pakū ai.

⁵ Kae kāfai he tino o koutou e hē ia te ia te poto, tatalo ki te Atua, ma ka ia fōki atu ki a te koe. Auā ko te Atua e kaimakoi ki ho he tino.

⁶ Kāfai koutou e tatalo, e tatau koutou ke talitonu ma nahe i ei lele he māhalohalo. Auā ko te tino e māhalohalo, e fakatuha ia ki he galu o te moana e fetolifaki holo e te matagi.

^7-8 Ko te tino e vēnā, e hē ia mafaia oi fai he tonu ma e hē mautū tona māfaufau i nā mea uma e ia faia. E hē tatau he tino vēnei ke manatu e maua hana mea mai te Aliki.

Ko te Mativa ma te Maukoloa

⁹ Ko nā tino Kelihiano mātitiva, e tatau ke fiafia kāfai ki lātou e hiki ake e te Atua ki luga,

¹⁰ ma ko nā tino Kelihiano maukoloa, e tatau ke fiafia kāfai ki lātou e fakamātitiva e te Atua. Auā ko nā tino maukoloa ka mou kehe atu e vē ko tiale o lākau o te vao.

¹¹ E oho ake te la ma tona vevela lahi ma mamae ai te lākau; e malili kehe ona tiale ma fakakino ai tona manaia. Ka vēnā foki lava oi fakakino nā tino maukoloa, ka koi fai a lātou hakilikiliga koloa.

Tofotofoga ma Fakaohoohoga

¹² Amutia nā tino e onohai i nā taimi o tofotofoga, auā kāfai e manumālō ki lātou i nā tofotofoga vēnei, ka ki lātou maua te taui, ko te ola tēia kua uma te folafola e te Atua mo nā tino e alolofa ake ki a te ia.

¹³ Kāfai ki tātou e fakaohoohogia e nā tofotofoga, e hē tatau ki tātou ke lea vē, “Ko te Atua te na ia fakaohoohoa ki mātou.” Auā ko te Atua e hē mafai ke fakaohoohogia e he kino, ma e hē ia fakaohoohoa foki he tino.

¹⁴ Kae ko ki tātou e fakaohoohogia kāfai ki tātou e takitaki kehea ma haihaitia i o tātou lava tuinanauga.

¹⁵ Ko o tātou tuinanauga kino e ola ake ma fānau mai ai te agahala: ma ko te agahala, kāfai e matua, e fānau mai ai te oti.

¹⁶ Te kau uho pele, ia koutou nahe fakahehēagia.

¹⁷ Ko nā meaalofa uma lele e lelei ma kātoatoa, e mai te lagi. E fanaifo ki lalo mai te Atua, tē na faia ia mea pupula uma i te lagi, ma e tūmau pea lava ma hēai hona hūiga, pe he ataata kāfai e liliu.

¹⁸ Ko tona finagalo lava te na maua ai e ki tātou te ola e ala i te kupu moni, kae ke fakatūlaga muamua ai ki tātou i lo nā meaola uma na ia gaohia.

Fakalogo ma Fakatino

¹⁹ Te kau uho pele, ke koutou manatua te mea tēnei! Ko koutou e tatau ke vave te fakalogo, kae tuai te tautala ma tuai te ita.

²⁰ Auā kāfai he tino e ita, ka hē ia mafai oi fakataunuku he mea e fokotahi o nā mea e fofou te Atua ke ia faia.

²¹ Ko te mea ia e tatau ai ke tīaki e koutou nā āmio mātagā ma nā uiga kino uma, kae talia ma te loto maulalo te kupu kua uma te ia totōagia i outou loto ke maua ai e koutou te fakaolataga.

²² E tatau ke fakatino e koutou te kupu a te Atua, kae hē nā ko te fakalogo oioti ki ei, auā ko te mea ia te ka fakahehē ai koutou.

²³ Kāfai he tino e fakalogo oioti ki te kupu a te Atua kae hē ia fakatinoa, e vē lava ia ko he tamāloa e kikila ki he fakaata ma ia kitea lava ia;

²⁴ ma e vave puli lele ia te ia, pe vēhea ona fōliga i te taimi e fano kehe ai ma te fakaata.

²⁵ Kae ko nā tino e kikila ki te tūlāfono e kātoatoa te lelei, tēia e fakahaoloto ai ia tagata, ma tūmau to lātou uhitaki ki ei kae hē nā ko te fakalogo oioti ki ei ma toe puli, kae fakatino — ka fakamanuia ki lātou e te Atua i nā mea e ki lātou faia.

²⁶ Kāfai he tino o koutou e manatu ko ia ko he tino tāpuaki ki te Atua kae hē tāofiofia tona laulaufaiva, e hēai lele he aogā o tau tāpuakiga, ma e fakahehē lava koe e koe.

²⁷ Ko te mea e mamā i mua o te Atua ma ko te tāpuakiga moni ia, ko tēnei: ko te fehoahoani ki tamaiti mātua oti ma fafine kua feoti a lātou tāne, i nā mea e puapuagā ai, ma ke nahe pīhia lele koutou i nā uiga kino o te lalolagi.