Gāluega 3 - Tokelauan New Testament

Kua Fakamālōlō he Pipili

¹ I tētahi aho na olo ai ia Petelu ma Ioane ki te Mālumalu i te tolu i te afiafi, ko te itūaho ia e fai talohaga ai ia tagata.

² I kinā i te Faitotoka Gali, e vē ona fakaigoa ai e tagata, nae i ei ai he tino nae pipili i tona ōlaga kātoa. Ko aho uma e hauhau mai ai ki te faitotoka tēnei ke kaitagōgō tupe ai ki tagata e holo ki loto o te Mālumalu.

³ I te ia kitea atuga o Petelu ma Ioane ka ulu atu ki te Mālumalu, oi gogō ai ki ei ki hana mea.

⁴ Kua kikila hako atu ki ei te toka lua, oi lea atu ai ia Petelu ki ei, “Kikila mai ki a te ki māua!”

⁵ Oi kikila ai te pipili ki te toka lua, ma tona manatu lava ka fōki ake hana mea.

⁶ Kae kua lea vē atu ia Petelu ki ei, “E hēai haku tupe e fokotahi, kae ka kō fōki atua te mea e ia te au; i te igoa o Iehu Keliho o Nahaleta, e lea atu ai au ki a te koe, tū ki luga oi havali!”

⁷ Oi tago atu ai ia Petelu ki te lima taumatau o te pipili oi fakatū ki luga. Ko te taimi lava tēnā na mālohi ai nā vae ma nā tapuvae o te pipili;

⁸ na oho loa ki luga te pipili, kua tū ki luga ma kāmata oi havalivali. Oi fano ai ki loto o te Mālumalu fakatahi ma te toka lua, e havali ma tūtaoho ma viviki ki te Atua.

⁹ Kua kitea atu ia e tagata e havali ma viviki ki te Atua;

¹⁰ ma i te matea atuga e ki lātou ko te tino tēnei ko te pipili nae nofo i te Faitotoka Gali ma kaitagōgō ki tagata, na matuā tēteki lele ma ōfo ki te mea kua tupu ki ei.

Ko te Fakamālamalamaga a Petelu ki Tagata i loto o te Mālumalu

¹¹ Ka koi pipiki atu te pipili ki a Petelu ma Ioane i loto o te Poletito o Holomona, e vē ko te igoa nae fakaigoa ai e tagata, na ōfo lahi lele ia tagata ma na lolofi fakatahi mai ai ki a te ki lātou.

¹² Kua kitea atu e Petelu nā tino, oi lea vē atu ai ki ei, “Oku uho Ihalaelu, he ā te tēteki ai koutou i te mea tēnei, ma he ā foki te kikila vēnā mai ai outou mata ki a te ki māua? E vēake koutou ko he mana e o ki māua lava, pe ko ki māua e lelei i te kikila a te Atua, te na mafai ai e ki māua oi fakahavali te tino tēnei?

¹³ Ko te Atua o Apelaamo, o Ihaako ma Iakopo, te Atua o nā tupuna o ki tātou, na ia fōkia te mamalu ki a Iehu tana kaukauna. Kae kua koutou tukulima atua ia ki takitaki o Iutaia, ma teteke e koutou i mua o Pilato, e ui lava na tonu ia Pilato ke fakahaoloto.

¹⁴ Ko Iehu nae paia ma lelei, kae na teteke koutou ki a te ia ma lea koutou ki a Pilato ke tatala ma fakahaoloto te tino tāmate tino.

¹⁵ Na tāmate e koutou te tino e takitaki e ia ia tagata ki te ola moni, kae kua toe fakatū e te Atua mai te oti — ma ko ki mātou ni molimau ki te mea tēnei.

¹⁶ Ko te mana o Iehu te na mālohi ai te pipili. Ko te mea kua kikila koutou ki ei ma iloa e koutou, na fai e ala i te fakatuatua ki tona igoa; ko to mā fakatuatua ki a Iehu, te na mafai ai ke fakamālōlō te pipili i mua o koutou uma.

¹⁷ “Ko te mea ia oku uho Ihalaelu, e iloa e au ko te mea a koutou ma outou takitaki na fai ki a Iehu, na māfua ona ko koutou e hē mālamalama.

¹⁸ Na folafola e te Atua i nā aho kua leva e ala i te kau pelofeta uma, ko tana Mehia e tatau ke maua i nā puapuagā; ma na ia fakataunukuagia tēnei vāloaga i te auala tēnei.

¹⁹ Ko te mea ia, halamō loa i autou agahala ma liliu ki te Atua, kae ke fakamāgalo ai autou agahala. Kāfai e koutou faia te mea tēnei,

²⁰ ka mafai ke kavatu e te Aliki ki a te koutou he taimi mo te fakafougia o nā agaga o koutou, ma ka ia uga maia ia Iehu, ko ia te Mehia kua uma te ia tōfiagia mo koutou.

²¹ E tatau ke nofo pea ia i te lagi ke pa ki te taimi e fakafougia ai ia mea uma, e vē ona folafola e te Atua e ala i te kau pelofeta paia nae tautua mo ia i nā aho kua loa.

²² Auā na lea vēia ia Mohe, ‘Ko te Aliki te Atua ka ia uga atua he pelofeta ki a te koutou, e vē foki lava ko te ia uga atuga o oku, ma ko he tino lava mai ia te koutou. E tatau koutou ke fakalogo ki ei i ho he mea e lea atu ai.

²³ Ho he tino e hē fakalogo ki te mea e lea atu ai te pelofeta tēnā, ka fakateka kehegia ia mai tagata o te Atua, ma fakaumatia.’

²⁴ Ma ko nā pelofeta uma na ki lātou fakailoa maia te fekau mai te Atua, e aofia ai ia Hamuelu ma ki lātou i tua mai, na folafola foki e ki lātou nā mea e tutupu i nā aho nei.

²⁵ Ko nā folafolaga a te Atua na kui mai i nā pelofeta, e mo koutou, ma ko koutou e aofia i te feagaiga na ohi e te Atua ma outou tupuna. E vē ona vāgana te Atua ki a Apelaamo, ‘Ka kō fakamanuiagia ia tagata uma i te lalolagi, e ala atu i nā lāpuna o koe.’

²⁶ Ma na filifilia ai la e te Atua tana Kaukauna ko Iehu ma uga muamua atu ki a te koutou, ke fakamanuia ki a te koutou e ala i te takitaki kehega o koutou uma mai outou uiga kino.”