Gāluega 28 - Tokelauan New Testament

Ko te Mea na tupu ki a Paulo i Melite

¹ Kua taunuku haogalēmū ake ki mātou ki gāuta, oi ki mātou iloa ai ko te igoa o te motu tēnei ko Melite.

² Na alofagia ki mātou e tagata o te fenua. Na kāmata oi ua ma mālūlū, oi tafu ai e ki lātou he afi ma tali lelei ki mātou.

³ Na ao mai e Paulo he fakaputuga mealākau ma e tuku atu e ia ki luga o te afi, kae totolo mai ki fafo he gata mai loto o te fakaputuga mealākau ona ko te vevela, ma kati tona lima ma mau ai lava ki ei.

⁴ Kua kitea atu e nā tino o te fenua te gata e tautau i te lima o Paulo, oi lea vē ai tētahi ki tētahi, “Ko te tagata nei hōvē he tino tāmate tino, ka ko te atua o te faimeatonu ka he ia fakahaoagia ia, e tuha lava pe na hao mai i te tai.”

⁵ Kae kua lūlū e Paulo te gata ki luga o te afi, e aunoa ma he mea kua tupu ki a te ia.

⁶ Na fakatalitali nā tino ke puputa tona tino pe pakū fakafuaheki ki lalo kua mate. Kae ina kua mataloa te fakatali kae e hēai lele he hūiga e pa ki ei ia Paulo, oi na hui ai o lātou māfaufau ma lea vē, “Ko te tagata tēnei ko he atua!”

⁷ Nae hē mamao ma kinā ni fatoaga e o Popilio, te aliki pule hili o te motu. Na talia fiafia ki mātou e ia, ma e tolu ia aho na nonofo ai ki mātou i tona fale.

⁸ Ko te tamana o Popilio nae takoto i te moega e maua i te fiva ma te manava tatā. Oi fano ai ia Paulo ki te potu e i ei ai, kua tatalo ma fakaeke atu ona lima ki ona luga ma fakamālōlō ai mai ona tauale.

⁹ I te tupuga o te mea tēnā, oi ōmamai ai nā tino tauale uma i te fenua, ma na fakamālōlō uma ki lātou e ia.

¹⁰ E lahi a mātou meaalofa na ki lātou fōki maia, ma i te taimi ka malaga kehe ai ki mātou, na fakauta ake e ki lātou ki luga o te vaka nā mea uma nae manakomia e ki mātou mo te faiga malaga.

Mai Melite ki Loma

¹¹ E tolu māhina na nonofo ai ki mātou i kinā, oi malaga ai ki mātou i luga o he vaka mai Alehania e igoa ko “Te Māhaga Atua”, nae fakatalitali i te motu ke uma te taumālūlū.

¹² Na taunuku ki mātou ki Hulakuha, oi nonofo ai ki mātou i kinā i ni aho e tolu.

¹³ Na fakaauau te mātou malaga mai kinā ma na taunuku atu ai ki te kakai ko Legiona. I te aho na hohoko ai ko te matagi na agi mai i haute, ma e lua ia aho kae pa ki mātou ki te taulaga ko Potioli.

¹⁴ I kinā, na fetaui ai ki mātou ma ni tino Kelihiano na lea mai ke nonofo ki mātou ia te ki lātou i he vaiaho. Ma na olo ai loa lava ki mātou ki Loma.

¹⁵ Kua logotala te kau Kelihiano i Loma e uiga ki a te ki mātou, oi na ōmamai ai mai nā tamā kakai, ke pa lava ki nā tamā kakai e tau mamao mālie kehe atu e vē ko te Māketi o Apiou ma nā Faletalimālō e Tolu, ke feiloaki ki mātou. I te kitea atuga e Paulo nā tino iēnei, oi fakafetai ake ai ki te Atua ma na matuā fakalototelegia ai ia.

Kua Tālaki te Tala Lelei i Loma

¹⁶ I te taunuku atuga o ki mātou ki Loma, na fakataga ia Paulo ke nofo nā ko ia kae leoleo e he fitafita auā ei na hola kehe.

¹⁷ Kua teka nā aho e tolu, oi kalaga ai e Paulo he lātou fono ma nā takitaki Iutaia i Loma. I te maopoopo maiga, oi lea vē atu ai ki ei, “Te kau uho, e ui lava e hēai haku mea hehē na fai ki o tātou tagata pe ki nā tū na ki tātou maua mai o tātou tupuna, ko au na fai ma pagotā i Ieluhalema, ma tukulima atu ki nā tino Loma.

¹⁸ I na kua uma te hukehukegia o oku, na fofou nā tino Loma ke tatala au ma fakahaoloto, auā kua ki lātou iloa e hēai haku mea hehē na fai e tatau ai ke fakahala au i te oti.

¹⁹ Kae i te tetekega o nā tino Iutaia ki te mea tēnei, na fai tēnā ma mea na fakatagi ai au ki te Kaihala, e ui lava e hēki i ei he mōliga na kō faia e uiga ki oku lava tagata.

²⁰ Ko te mea ia kua lea atu ai au ko ki tātou ke feiloaki ma talanoa. Ko te mea moni lava, ko au e noanoa vēnei i nā filifili ona ko te tino tēia e fakamoemoe ki ei ia tagata o Ihalaelu.”

²¹ Oi lea vē atu ai ki lātou ki a Paulo, “E hēki maua e ki mātou ni tuhi mai Iutea e uiga ki a te koe, oi e hēai foki he tino o nā tino o ki tātou na ōmamai mai kinā e hau ma he tala, pe he fakamatalaga e fakakino ai tō igoa.

²² Kae ko ki mātou e fia fakalogo atu ki nā manatu o koe, auā e iloa e ki mātou ko nā tino i ho he koga lava, e teteke lele ki te fakalapotopotoga tēnā kua i ei koe.”

²³ Oi filifili ai e ki lātou ma Paulo he aho ke feiloaki ai, ma na tokalahi lele nā tino na ōmamai i te aho tēnā, ki te mea nae nofo ai ia Paulo. Mai te taeao ke pa ki afiafipō, nae fakamālamalama lava e Paulo ki a te ki lātou tana fekau e uiga ki te Mālō o te Atua, ma nā taumafai ke ia fakamāonia ki a te ki lātou te tala e uiga ki a Iehu, e ala i nā kupu e ia hiki maia i te Tūlāfono a Mohe, ma nā tuhituhiga a te kau pelofeta.

²⁴ E i ei nā tino na talitonu ki ana kupu, kae ko iētahi e hēki talitonu.

²⁵ Oi na fekehekeheaki ai lava ki lātou ma tākape ai lava, ka kua uma ai te lea vē atu o Paulo i te mea tēnei e fokotahi: “Kai te hako lele o te vāgana a te Agaga Paia ki nā tupuna o koutou, na kui mai i te pelofeta ko Ihaia!

²⁶ Na vāgana vē, ‘Fano oi lea ki tagata o te nuku tēnei: Ka fakalogo ma fakalogo koutou, kae hē koutou hāfia; ka kikila ma kikila koutou, kae hē koutou kitea,

²⁷ auā ko nā māfaufau o tagata o te nuku tēnei kua tuka, ma kua ki lātou pupunia o lātou taliga ma tapuni o lātou mata. Auā moinei ake e kitea e o lātou mata, e lagona e o lātou taliga, e mālamalama o lātou māfaufau, ma e liliu mai ki lātou ki a te au, kua vāgana ai te Atua, ma kō fakamālōlōa ai ki lātou.’ ”

^28-29 Kua fakaiku te tautalaga a Paulo oi lea vē ai: “E tatau la ke koutou iloagia, ko te fekau e uiga ki te fakaolataga a te Atua, kua kave ki nā tino nukukehe! Ka fakalogo ki lātou ki ei!”

³⁰ E lua ia tauhaga nae nofo totogi ai ia Paulo i he fale, ma nae talia fiafia e ia nā tino uma nae ōake oi āhi ake ia.

³¹ Nae folafola atu e ia te fekau e uiga ki te Mālō o te Atua ma akoako atu e uiga ki te Aliki ko Iehu Keliho, i he agaga hē mataku ma haoloto.