Gāluega 27 - Tokelauan New Testament

Kua Kave ia Paulo e nā Fitafita ki Loma

¹ I te tonuga ko ki mātou e tatau ke folau ki Italia, oi tuku atu ai e ki lātou ia Paulo ma iētahi pagotā ki te kikilaga a Iulio, he takitaki o he vaegākau Loma tokalahi e fakaigoa “Ko te Vaegākau a te Kaihala.”

² Na hohopo ki mātou ki he vaka na hau mai Atalamuteno ma kua hāuni ka malaga ki nā taulaga o te itūmālō o Ahia, ma na tukuvaka ai loa ki mātou. Nae fakatahi ki mātou ma Alihitako, he tino Maketonia e hau i Tehalonika.

³ I te aho na hohoko ai na pa ai ki mātou ki Haitonu. Ko Iulio nae agalelei ki a Paulo ma nae ia fakataga ke fano oi kikila ana uō, ke maua ai nā mea e ia fia maua ke ola ai.

⁴ Na fakaauau te mātou malaga mai kinā, kae ona ko te matagi e nofo mai i te muāvaka, ko te mea ia na kui ai ki mātou i te itū ki lalo o te motu ko Kupulona.

⁵ Na kui atu ki mātou i gātai o Kilikia ma Pamefulia, oi pa ai ki mātou ki Mula i Lukia.

⁶ Ko kinā na maua ai e te takitaki o te vaegākau Loma he vaka mai Alehania ka folau ki Italia, oi fakaeke ai loa ki mātou ki luga.

⁷ E faitau aho nae tele mālie lele ai to mātou vaka ona ko te matagi nae nofo mai i te muāvaka, ma na taunuku atu ki gātai o te kakai ko Kinito. E hēki toe mafai ki mātou ke hēleka ki mua i te itū tēnā ona ko te matagi, oi na fakaheke ifo ai ki mātou ki te itū loki o te motu ko Kelete, ma teka ma te Matāfenua ko Halamone.

⁸ Na tele fakatafatafa atu ki mātou i te matāfaga, ma na faigatā lele foki te malaga, oi pa atu ai ki mātou ki he koga e takua ko te Taulaga Loki, e hē mamao ma Lahaia.

⁹ Na mataloa te taimi nae i kinā ai ki mātou, ma na iku lava kua fakapokepoke ke fakaauau pea te malaga, ma kua teka foki te Aho Fakalāina. Oi na fautua vēnei atu ai ia Paulo ki a te ki lātou:

¹⁰ “Taulelea, ko au e kikila ko te tātou malaga e kāmata atu i kinei ka fakapokepoke lele; ka fakakino lahi te uta vēnā foki ma te vaka, ma ka i ei foki ni tino e feoti.”

¹¹ Kae ko te takitaki o te vaegākau kua talitonu lava ki te kupu a te alikivaka ma te tino e o ia te vaka, kae kua hē fakalogo ki te mea e lea ai ia Paulo.

¹² Ko te taulaga tēnei e hē lelei ke taula ai ni vaka i te taimi o te taumālūlū; ko te tokalahiga la o nā tino na fofou ke tuku o lātou vaka ki gātai ma taumafai ke pa ki Foinika pe kāfai e mafai, ke fakatalitali i kinā ke uma te taumālūlū. Ko Foinika he taulaga e i Kelete, e fakahaga ki haute-hihifo ma mātū-hihifo.

Ko te Afā i te Moana

¹³ Na kāmata oi agiagi mālū mai te matagi i te itū ki haute, oi vē ake ai nā taulelea ka mafai ke fakataunuku te lātou fuafuaga, oi na hihi ai te taula o to lātou vaka ma fakatele fakatafatafa atu i gātai o Kelete.

¹⁴ Kae e hēki mataloa kae pa ifo te matagi mālohi — te matagi e takua ko te “Matagi o mātū-hahae” — e fanaifo mai gāuta o Kelete.

¹⁵ I te agiga o te matagi na matuā hē mafai lava te vaka ke fakatūtū ki te matagi, ma ko te mea ia na tīaki ai loa a mātou taumafaiga kae kua tuku te vaka ke kave e te matagi.

¹⁶ Na maua e ki mātou he tamā loki ina kua kui atu ki mātou i haute o te tamā motu ko Kauta. Na mafai ke toe faufau mau te tulula o te vaka i kinā, e ui lava nae fai hina faigatā.

¹⁷ Na fufuti ake e ki lātou te tulula ki luga o te vaka, ma tamau ai i nā maea fakatakamilo i te vaka. Oi tuku ai ki lalo te la o te vaka ka kua tuku te vaka ke pūhia i te matagi, ona nae mātataku nā te vaka e kake i te kauāfua oneone e takua ko Huliti

¹⁸ Na agi pea lava te afā mālohi, ma i te aho na hohoko ai, oi kāmata ai oi toli e ki lātou ki te tai ni vāega o te uta a te vaka,

¹⁹ ma i te aho alafaki na togi e lātou ki te tai iētahi kope o te vaka.

²⁰ E lahi nā aho na hē mafai ai ke ki mātou kitea te la, pe ko nā fetu, oi ko te matagi foki nae agi mālohi lele. Na iku lava kua hēai ho mātou fakamoemoe ko ki mātou e fakahaogia.

²¹ Na mataloa te taimi na hēki mafai ai ke kakai nā tino nae i luga o te vaka, oi tū ai ia Paulo i mua o ki lātou ma lea vē atu, “Taulelea, na tatau lava koutou ke fakalogo mai ki a te au, i toku lea atuga ko ki tātou nahe folau kehe mai i Kelete; moinei ake e hēai he mea e fokotahi e fakakino pe māumau.

²² Ka ko au la e aioi atu nei, ko koutou ke loto tetele! E hēai he tino fokotahi o koutou e māumau tona ola; kae nā ko te vaka oioti te māumau.

²³ Auā ko anapō na hau ai he agelu a te Atua, tē e a ia au, ma e tāpuaki au ki ei

²⁴ oi lea vē mai, ‘Paulo, ia koe nā mataku! Ko koe e tatau ke tū i mua o te Kaihala. Ko te agalelei o te Atua ki a te koe, kua fakahao ai ia ola o nā tino uma e faimalaga fakatahi koutou.’

²⁵ Ko koutou la taulelea, loto tetele! Auā ko au e talitonu ki te Atua, ma ka taunuku lava nā mea e vē ona fakailoa mai e ia ki a te au.

²⁶ Kae ko te tātou vaka ka pūhia ma ake ki gāuta o he motu.”

²⁷ Kua pa ki te pō agafulumāfā, ka koi fefaiaki lava ki mātou e te afā i te Tai Metitelani. I te tau tūlua o te pō, oi vē ai kua hāfia e te kauvaka ko ki mātou kua pili ki he fenua.

²⁸ Oi togi ai e ki lātou he uka ma he mea mamafa e nonoa ki te pito, ma ki lātou iloa ai ko te loloto kua 40 mita; na mataloa mālie ake oi toe fai ai foki e ki lātou te mea tēnei, ma na iloa ai kua 30 mita te loloto.

²⁹ Na mātataku lele ki lātou auā te vaka i na pūhia ki luga o ni papa, ko te mea ia na tukutuku ai e ki lātou ki lalo nā taula e fa i te mulivaka, ma tatalo ke i na ōtea loa.

³⁰ Oi taumafai ai te kauvaka ke hōhola kehe ma te vaka; kua tukutuku e ki lātou te tulula ki te tai, oi fakatagā vē ai e olo oi togi ni taula i te taumua o te vaka.

³¹ Kae kua lea atu ia Paulo ki te takitaki o te vaegākau ma nā fitafita, “Kāfai te kauvaka e hē nonofo pea i luga o te vaka, ko koutou uma lele e feoti.”

³² Oi tipi ai e nā fitafita nā maea nae tau ai te tulula ma tuku ai ke tāfea.

³³ Kua tāli pa ki te vaveao, oi fakamālohi ai ia Paulo ki a te ki lātou uma ke kakai: “Kua fano nei te hefulufa aho e fakatalitali ai koutou, ma i te taimi kātoa tēnei ko hēki i ei lele he mea a koutou e kai.

³⁴ Ko au la e fakamālohi atu, kai ko ni autou meakai kae ke ola koutou. E hēai he lāulu e fokotahi i outou ulu ka māumau.”

³⁵ Kua uma atu tana kupu tēnā, oi tago ai ia Paulo ki ni falaoa, kua fakafetai ki te Atua i mua o ki lātou uma, kua tavaevae ma kāmata oi kai.

³⁶ Na fakalototelegia ki lātou, ma mafai ai ke kai ni meakai e ki lātou uma tau tokatahi

³⁷ E toka 276 ki mātou uma nae i luga o te vaka.

³⁸ Kua uma te kakai o ki lātou, oi toli ai e ki lātou te uta haito kātoa ki te tai ke fakamāmā ai te vaka.

Kua Tukia te Vaka

³⁹ E ōtea ake, e hē matea e te kauvaka te talafātai kua i ei ki mātou, kae kua ki lātou kitea atu he faga ma he matāfaga, ma tonu ai ia te ki lātou, kāfai e mafai, ko te vaka ka fakakake i kinā.

⁴⁰ Oi tatipi ai e ki lātou nā taula ma tuku ke gōgoto, kae tatala nā maea nae tamau ai nā foeuli. Oi fakatū ai te la i te taumua kae ke pūhia te vaka ki mua, ma fakatū ai loa ki mātou ki gāuta.

⁴¹ Kae kua tatū te vaka ki he kauoneone ma kake ai; kua maupagī te taumua ma kua hē gāoioi, ka ko te taumuli kua tamoi likiliki i te mālohi o nā galu.

⁴² Na fai te tonu a nā fitafita ke tāmate uma nā pagotā, kae ke nahe mafai ke faikaukau ki gāuta ma hōhola ai.

⁴³ Kae na fofou te takitaki o te vaegākau ke fakahao ia Paulo, oi na ia tāofia ai te lātou tonu na fai. Ka kua fakatonu e ia nā taulelea uma e iloa kakau ke tūtaoho muamua ki te tai oi kakau ki gāuta;

⁴⁴ ko nā tino e totoe, ka mulimuli atu e lagalagai i nā laupapa loloa pe ni vāega o te vaka kua malepe ma to kehe. Na vēnā la te auala na hao uma ai ki mātou ki gāuta.