Gāluega 25 - Tokelauan New Testament

Kua Fakatagi ia Paulo ke Fakamahino ia e te Kaihala

¹ Kua tolu ia aho talu te pa mai o Fehetone ki te itūmālō, oi fano ai mai Kaihaleia ki Ieluhalema.

² Kua fakailoa ki a Fehetone e nā ohitāulaga hili ma nā takitaki o Iutaia e uiga ki a Paulo, ma fakatagi ki ei

³ ke kaumai ia Paulo ki Ieluhalema, ona kua uma te taupulepule ke ki lātou tāmatea ia Paulo i te auala kāfai e kavaifo.

⁴ Oi tali atu ai ia Fehetone ki a te ki lātou, “Ko Paulo e tāofi fakapagotā nei i Kaihaleia, ma ko au e tuku e toe foki ki ei i he taimi pili mai.

⁵ Ōmai la nā takitaki o koutou ke olo fakatahi ki mātou ki Kaihaleia ma kāfai e i ei he mea hehē a Paulo na fai, oi kua fai ai loa te lātou mōliga.”

⁶ E valu pe hefulu ia aho na toe nofo ai ia Fehetone i Ieluhalema, oi toe foki ai ki Kaihaleia. I te aho na hohoko ai, oi nofoia ai e ia tona nofoa fakamahino, kae fakatonu ke kaumai ia Paulo ki loto.

⁷ I te pa maiga o Paulo, oi tutū ai nā tino Iutaia na ōmamai mai Ieluhalema i tafa o ia ma kāmata oi fai a lātou mōliga mamafa e lahi e uiga ki a Paulo, kae e hēki ki lātou mafaia oi tuku atu ni fakamāoniaga o a lātou mōliga.

⁸ Ka kua tali vēnei atu ki ei ia Paulo: “E hēai haku mea e fokotahi kua fai e hē tuha ma te Tūlāfono a Iutaia, pe teteke ai ki te Mālumalu pe ko te Kaihala o Loma.”

⁹ Kae ko Fehetone kua fia lelei ki nā tino Iutaia, ko te mea ia na fehili vē atu ai ki a Paulo, “E fia fano la koe ki Ieluhalema ke fakamahino ai koe i nā mōliga iēnei kua kaumai ki a te au?”

¹⁰ Kua lea atu ia Paulo, “Ko au e i mua nei o te fakamahinoga a te Kaihala, te mea e tatau ke fakamahino ai au. E hēai he mea hehē kua kō faia ki nā tino Iutaia, e vē ona iloa lelei lava e koe.

¹¹ Kāfai kua kō holia te tūlāfono ma faia he mea kua tatau ai au ke fakahala i te oti, ko au e hē lea atu ke fakahao au mai te oti. Kae kāfai ko oku mōliga kua ki lātou faia e hē fakamāonia, oi e hēai he tino e ia mafaia oi tuku atu au ki o lātou lima. Ko au la e fakatagi atu ke kave au ke fakamahino e te Kaihala.”

¹² Ina kua uma te talanoa o Fehetone ki ana tino faufautua, oi tali vē atu ai, Ko koe kua fakatagi mai ke kave koe ke fakamahino e te Kaihala, oi ko koe ka kave ki te Kaihala.

Kua Kave ia Paulo ki mua o Akalipa ma Pelenike

¹³ Kua teka atu pe he lua vaiaho, kae ōifo te Tupu ko Akalipa ma Pelenike ki Kaihaleia oi āhiāhi ki a Fehetone.

¹⁴ E hēki leva ni aho talu te i kinā, oi fakamatala ai e Fehetone ki te tupu e uiga ki te mōliga o Paulo ma tana fakatagi ke kave tona fakamahinoga ke fai e te Kaihala: “E i ei he tino i kinei na tuku i te falepuipui e Felika;

¹⁵ ma i toku fanoga ki Ieluhalema, na kaumai ai nā mōliga o ia e te kau ohitāulaga hili ma toeaina o Iutaia, ma lea mai ke fakahala.

¹⁶ Kae ko au na lea ki ei, ko ki tātou nā tino Loma e hē māhani oi tuku atu he tino kua mōlia i he holitūlāfono ke fakamahino, kae ko hēki fakafehagai ki nā tino na ki lātou faia te mōliga, ma tuku ki ei he avanoa ke tali atu ai ki ona mōliga.

¹⁷ I te ōmamaiga la o ki lātou ki kinei, ko au e hēki toe fakatali; na nofoia loa lava e au te nofoa fakamahino i te aho na hohoko ai, ma fakatonu ke kaumai te tino tēnei.

¹⁸ Na tutū ki luga nā tino nae teteke ki a te ia, kae e hēki ki lātou mōliagia ia i he holitūlāfono kino e fokotahi, e vē ona manatu au e ki lātou tuku maia.

¹⁹ Oioti lava te mea na ki lātou taku maia, ko a lātou fefīnauakiga ma tē kua ki lātou mōlia e uiga ki te lātou tāpuakiga ma e uiga ki he tino e igoa ki a Iehu kua oti; kae e lea ia Paulo koi ola.

²⁰ Nae hē mautonu au pe maua vēhea e au ni fakamatalaga e uiga ki nā mea iēnei, ko te mea ia na lea ai au ki a Paulo, pe i na malie ia ke kave ia ki Ieluhalema ke fai ai tona fakamahinoga i nā mōliga iēnei.

²¹ Kae kua kaumai tana fakatagi ke tuku pea ia ki lalo o te leoleoga a nā fitafita, ma ke kave ia ke fakamahino e te Kaihala. Oi na fakatonu ai e au nā fitafita ke leoleo ia Paulo ke pa ki te aho kua fuafua e au, e kave ai ki te Kaihala.”

²² Kua lea atu ia Akalipa ki a Fehetone, “Ko au e fia fakalogo ki te tino tēnei.” Kua tali mai ia Fehetone, “Ko taeao la ka fakalogo ai koe ki a te ia.”

²³ I te aho na hohoko ai, na olo ai ia Akalipa ma Pelenike ki loto o te fale lahi e fai ai te fakamahinoga, fakatahi ma nā takitakikau ma nā takitaki o te kakai, ma na fai ki ei nā fakaaloaloga mamalu. Oi fakatonu ai e Fehetone ke kaumai ia Paulo.

²⁴ Kua lea atu ia Fehetone, “Akalipa te Tupu, ma koutou uma kua i kinei fakatahi ki tātou: Tēnā kua kikila koutou ki te tino kua kaumai ai nā faitioga ki a te au a nā tino Iutaia uma i kinei vēnā ma Ieluhalema. Nae taukalalaga ki lātou ko ia tēnei e he tatau ke ola.

²⁵ Kae e hēai he mea na kō maua na ia faia, e tatau ai ke fakahala i te oti. Kae ona kua fakatagi mai ko ia ke kave ke fakamahino e te Kaihala, kua tonu ai ia te au ke kave ki ei.

²⁶ Kae e hēai he mea e mautinoa e tuha ai ma tona mōliga, ke tuhi ki lalo mo te Kaihala. Ko te mea ia kua kō kaumaia ai ia ki outou mua — kae maihe lava ki mua o koe te Tupu ko Akalipa! — kae ke maua ai he fakamatalaga ke fakamau ki lalo, kāfai e uma te hukehuke o ia.

²⁷ Auā e hē he mea tatau i taku kikila, ke kave he pagotā kae e hēai he fakamatalaga manino, ke kitea ai nā mea kua mōlia ai.”