Gāluega 24 - Tokelauan New Testament

Ko nā Mōliaga o Paulo

¹ Kua teka nā aho e lima, oi olo ai ia Anania te Ulu Ohitāulaga ma ni toeaina, ma he loia e igoa ki a Tetulo ki Kaihaleia. Kua tutū ki lātou i mua o Felika, ma fai ki ei a lātou mōliga e uiga ki a Paulo.

² Oi fekau ai ia Paulo ke hau ki loto, ma na kāmata ai loa oi tōlaulau e Tetulo nā mōliga, e vēnei: “Tau Afioga te Kōvana! Ko te lelei o tau takitakiga kua maua ai e ki mātou te fīlēmū mo he taimi mataloa, ma e lahi na hūiga tāua e fai mo te lelei o to mātou nuku.

³ E talia ma te fiafia e to mātou nuku kātoa nā mea iēnei ma ko taimi uma lava, e lagona e ki mātou te agaga fakafetai ki a te koe.

⁴ E hē fofou au ke fakalavelave atu ki tō taimi, kae ko au e fakatagi atu ke mafai ho taimi ke fakalogo ai koe ki ta mātou fakamatalaga pukupuku.

⁵ Kua maua e ki mātou ko te tagata tēnei, he tino e fakapokepoke ma fakatupu fakalavelave; kua fakatupu e ia nā vevehitū i te mea e i ei ia tagata Iutaia i te lalolagi kātoa uma, ma ko ia foki ko he takitaki o te vāega a te kau ha-Nahaleta.

^6-8 Na taumafai foki ia ke fakahēaogā te mamalu paia o te Mālumalu, kae na puke e ki mātou. Kāfai koe e fehili ki te tagata tēnei, oi ka mafai ke iloa e koe mai ia te ia, nā mea uma kua mōlia ai ia e ki mātou.”

⁹ Na kaukau fakatahi foki nā tino Iutaia ki nā mōliga tēnei, ma lea ko nā mea uma iēnei e hako.

Kua Tali atu ia Paulo ki ona Mōliga

¹⁰ Oi geno atu ai te kōvana ki a Paulo ke tautala ma na lea vē atu ai ia Paulo, “Ko au e fiafia oi tali atu ki nā mōliga o oku, auā e iloa e au ko koe ko te fakamahino o te nuku kātoa tēnei mo nā tauhaga e lahi.

¹¹ E vē ona iloa e koe, ko hēki hili atu i te hefululua aho talu toku fano ki Ieluhalema ke tāpuaki ai.

¹² E hēki maua au e nā tino Iutaia e fai fīnauga ma he tino e fokotahi i loto o te Mālumalu, pe na ki lātou maua au e fakatupu vevehi ki tagata i loto o nā hūnako, pe i ho he koga i loto o te kakai.

¹³ E hē ki lātou mafaia foki oi tuku atu ki a te koe he fakamāoniga o a lātou mōliga kua fai mai nei e uiga ki a te au.

¹⁴ Kae ko au e io atu ki a te koe i te mea tēnei: Ko au e tāpuaki ki te Atua o nā tupuna o ki mātou, e ala i toku mulimuli ki te Ala o te Aliki, tēia e lea ki lātou e hehē. Ko au foki e talitonu ki nā mea uma e tūhia i te Tūlāfono a Mohe, vēnā ma nā tuhi a te kau pelofeta.

¹⁵ E ia te au te fakamoemoe ki te Atua e vē foki lava ko te fakamoemoe o ki lātou e uiga ki te mea tēnei: ko tagata uma lele, nā tino āmio lelei ma tino āmio kino, ka toe tutū uma mai i te oti.

¹⁶ Ma ko au la e taumafai i taimi uma ki te mea e gata mai ai toku mafai, ke mamā toku lotofuatia i mua o te Atua ma tagata.

¹⁷ “Ina kua teka ni nai tauhaga talu toku fano kehe ma Ieluhalema, oi toe fano ai au ki ei oi kave ni tupe ki oku tagata Iutaia, ma ke ofo ake ni tāulaga.

¹⁸ Ko koi fai e au te mea tēnei i te Mālumalu, kae maua ake au e ki lātou ka kua uma ai te fakataunuku e au o te hāuniga o te fakamamāgia. Nae hēai he kaifenua nae i ei ma au, nae hēai foki he vevehi.

¹⁹ Kae nae i kinā ni tino Iutaia mai te itūmālō o Ahia; ko ki lātou iēnā te na tatau ke kaumai ki mua o koe ke fakailoa atu a lātou mōliga, pe kāfai e i ei haku mea hehē na fai.

²⁰ Pe lea foki lava kinā nā tino iēnei i kinei, pe ni holitūlāfono vēhea te na ki lātou fakahalagia ai au, i toku kavega ki mua o te Taupulega —

²¹ vāganā ai te mea e fokotahi tēnei na kalaga ai au i toku tūga i mua o ki lātou: ‘Ko au kua fakamahino e koutou i te aho nei, ona ko toku talitonuga ko nā tino kua oti e toe tutū mai ki te ola.’ ”

²² Ko Felika nae mālamalama lele i nā fakamatalaga e uiga ki te Ala o te Aliki, ma kua fakaiku e ia te fakamahinoga. Kua lea vēnei atu ki a te ki lātou “Kāfai e pa mai ia Luhia te takitakikau, oi kua fai ai taku fakaikuga.”

²³ Oi fakatonu ai e ia te ofiha e kikilagia ia Paulo, ke leoleo pea ia Paulo kae ke tuku ki ei ni fakatagaga i loto o te falepuipui, ma ke fakataga foki ana uō ke fehoahoani ki ei i ho he mea e ia fia mauagia.

Kua Kave ia Paulo ki mua o Felika ma Tolouhile

²⁴ Kua teka atu ni nai aho, oi ōmamai ai ia Felika ma tana āvaga ko Tolouhile, he fafine Iutaia. Na fekau e ia ia Paulo, oi fakalogologo ai kae kua tautala ia Paulo e uiga ki te fakatuatua ki a Keliho Iehu.

²⁵ Ka koi tautala ia Paulo e uiga ki te āmiotonu, te loto pūlea, ma te aho e fakamahino ai e te Atua ia tagata uma, ka ko Felika kua mataku ma lea vēia, “Fano loa nei oi kua toe fekau atu ai koe e au kāfai e maua hoku avanoa.”

²⁶ I te taimi foki tēnā, na fofou lele ke fōki ake ni ana tupe e Paulo; ko te mea ia nae tūfekau ho ai e ia ia Paulo, ke faitatala ki lāua.

²⁷ Kua teka te lua tauhaga, oi hui ai ia Felika e Pokiono Fehetone ke fai ma kōvana. Ko te fialelei o Felika ki nā tino Iutaia, na ia tukua ai ia Paulo i te falepuipui.