Gāluega 23 - Tokelauan New Testament

¹ Na kikila hako lava ia Paulo ki te Taupulega ma lea vē atu ki ei, “Te kau uho! Ko toku lotofuatia e mamā lele e tuha ai ma te ōlaga kua ola ai au i mua o te Atua, ke pa mai lava ki te aho nei.”

² Oi fakatonu ai e te Ulu Ohitāulaga ko Anania nā tino nae tutū i tafa o Paulo, ke po te gutu o Paulo.

³ Oi lea vē atu ai ia Paulo ki a Anania, “Ka mautinoa lava te taia o koe e te Atua — ia koe tēnā e vē he puipui kua vali ke fakapaepae! E nofo mai koe i kinā ke fakamahino mai au e tuha ai ma te Tūlāfono, kae kua holi foki lava e koe te Tūlāfono i tau fakatonuga ki nā tino ke po au!”

⁴ Kua lea vē mai nā tino nae i tafa o Paulo, “Ko koe kua fai kupu kino ki te Ulu Ohitāulaga a te Atua!”

⁵ Oi tali vē atu ai ia Paulo, “Oku uho Ihalaelu, e hē kō iloa ko ia ko te Ulu Ohitāulaga. E lea mai te tuhituhiga paia, ‘Ia koe nahe fai kupu kino ki te takitaki o tagata o tō nuku.’ ”

⁶ Kua kitea atu e Paulo ko iētahi tino o ki lātou ni Falehaio ma ko iētahi ni Hatukaio, oi kalaga atu ai i loto o te fono, “Oku uho Ihalaelu! Ko au he Falehaio, te ataliki o ni Falehaio. Ko au e i mua o te fakamahinoga tēnei, ona ko toku fakamoemoe mautinoa, ko nā tino kua oti ka toe fakatutū e te Atua ki te ola!”

⁷ Na uma lava te lea vēnei atu o Paulo, oi kāmata loa na fīnauga i te va o te kau Falehaio ma te kau Hatukaio, ma na vaelua ai te potopotoga.

⁸ (Auā e lea te kau Hatukaio ko nā tino e hē toe tutū mai i te oti, ma e hēai ni agelu pe ni agaga; kae ko te kau Falehaio e talitonu ki nā mea uma e tolu iēnei.)

⁹ Kua fakalalahi te piha, oi tutū ai ki luga iētahi faiakoga o te Tūlāfono i te itū o te kau Falehaio, kua faitio lahi lele ma lea vē atu: “E hēai he mea kua ki mātou maua e hala ai te tagata tēnei! Hōvē moni he agaga pe he agelu na tautala ki ei!”

¹⁰ Kua matuā fakalalahi lele na fīnauga, ma na popole lele te takitakikau nā ia Paulo e hae likilikiagia. Ko te mea ia na ia fakatonua ai ana fitafita, ke olo ki lalo oi kave kehe mai ia Paulo, ma kave ki te olo.

¹¹ I te pō tēnā, na tū ai te Aliki i tafa o Paulo ma vāgana vē atu ki ei, “Ia koe nā mataku! E vē ona molimau koe e uiga ki a te au i kinei i Ieluhalema, e tatau foki ke kē faia te mea tēnei i Loma.”

Kua Lama ia Paulo ke Tāmate

¹² I te taeao na hohoko ai, na fono fakatahi ai ni tino Iutaia ma na fai ai te lātou tonu. Na fai te lātou tautōga ko ki lātou e hē kakai lele pe inu, heiloga ko Paulo kua tāmate e ki lātou.

¹³ E hili i te toka fahefulu ki lātou na taupulepule fakatahi.

¹⁴ Oi olo ai ki nā ohitāulaga hili ma nā toeaina oi lea vē ki ei, “Kua fai te mātou tautōga fakatahi, e hēai he tino o ki mātou e kai heiloga kua tāmate e ki mātou ia Paulo.

¹⁵ E vēnei la, kave he fekau mā koutou ma te Taupulega ki te takitakikau Loma, ke kavaifo ia Paulo ki a te koutou ma fakatagāfai ki ei ko koutou e fofou ki ei ona e fia koutou mauagia ni iētahi fakamatalaga hako e uiga ki ei. Kae ka hāuni ki mātou ke tāmate ka ko hēki pa mai ki kinei.”

¹⁶ Kae na lagona e te ataliki o te tuafafine o Paulo na taupulepulega iēnei; oi na fano ai ki te olo ma taku ki a Paulo.

¹⁷ Oi kalaga ai ia Paulo ki hētahi o nā ofiha ma lea vē atu ki ei, “Kave te taumalo tēnei ki te takitakikau; e i ei te mea e fia lea ai ki ei.”

¹⁸ Oi kave ai e te ofiha te taumalo ki te takitakikau ma lea vē atu ki ei, “Ko Paulo te pagotā, na kalaga mai ki a te au ke kaumai te taumalo tēnei ki a te koe, ona e i ei he mea e fia lea atu ai.”

¹⁹ Kua puke atu te takitakikau ki te lima o te taumalo, oi tataki kehe ai e ia, ma fehili vē ki ei, “He ā te fia lea mai ai koe ki a te au?”

²⁰ Kua tali atu te taumalo, “Kua fai te tonu a nā takitaki Iutaia, ke talohaga atu ki a te koe taeao ke kavake ia Paulo ki lalo ki te Taupulega, ma fakapeku vē ko ki lātou e fofou ki ni fakamatalaga e hili atu te hako e uiga ki te ia.

²¹ Kae ia koe nā fakalogo ki ei, auā e hili atu i te fahefulu taulelea ka mumuni ke fakatali mai ki ei. Kua fai te lātou tautōga e hēai he tino e kai pe inu, heiloga kua ki lātou tāmatea ia Paulo. Kua hāuni mai nei ke fakataunuku te mea tēnei, kae e fakatalitali pe vēhea tau tonu e fai.”

²² Oi lea atu ai te takitakikau ki ei, “Nahe kē lea lele ki he tino ko koe kua lea mai ki a te au e uiga ki te mea tēnā.” Oi uga ai e ia te taumalo ke fano.

Kua Kave ia Paulo ki mua o te Kōvana ko Felika

²³ Oi fekau ai e te takitakikau nā tino ofiha a ia ma lea vē ai ki ei, “Hāuni ni fitafita e toka lua helau ke olo ki Kaihaleia fakatahi ai ma ni fitafita tiketike holofanua e toka fitu hefulu, ma he luahelau fitafita e fakakaukupega i nā tao, ma hāuni ke teka kehe i te iva i te pō nei.

²⁴ Hāuni ni holofanua ke tiketike ai ia Paulo, ma ke mautinoa ko Paulo e taunuku ma te haogalēmū ki te kōvana ko Felika.”

²⁵ Oi tuhi ai te tuhi a te takitakikau e vēnei:

²⁶ “Mai ia Kalautio Luhia ki te Afioga a Felika te kōvana: E fakatālofa atu ki a te koe.

²⁷ Ko te tagata tēnei na puke e nā tino Iutaia ma na mea lava ka tāmate e ki lātou. Na maua e au te fakamatalaga ko ia nei ko he tagatānuku Loma, oi olo ai loa ki mātou ma aku fitafita oi laveaki.

²⁸ Na kō fia iloagia pe he ā te holitūlāfono kua mōlia ai ia e ki lātou, oi na kave ai e au ki lalo ki te lātou Taupulega.

²⁹ E hēki maua e au e i ei hana mea na fai e tatau ai ke fakahala oti, pe falepuipui; ko te mea na mōlia ai he mea lava tau ki ta lātou tūlāfono.

³⁰ Ma i te kō iloaga kua lemati e nā tino Iutaia ke tāmate, oi tonu ai loa lava ia te au ke kavatu ki a te koe. Kua uma toku lea ki nā tino na ki lātou mōliagia, ke o atu ki a te koe ma ta lātou mōliga.”

³¹ Na fakataunuku e nā fitafita o lātou fakatonuga. Na kave e ki lātou ia Paulo i te pō tēnā ma na pa lava te mamao o te malaga ki Anitapatelia.

³² I te aho alafaki oi toe foki ai ki te olo nā fitafita havavali, kae totoe ai nā fitafita tiketike holofanua ke olo ma Paulo.

³³ Na kave e ki lātou ia Paulo ki Kaihaleia, kua fōki te tuhi ki te kōvana ma tukulima atu ai ki ei ia Paulo.

³⁴ Kua faitau te tuhi e te kōvana, oi fehili ai ki a Paulo pe ko te fea te itūmālō e hau ai ia. I te ia iloaga ko Paulo e hau mai Kilikia,

³⁵ oi lea vē ai ki a Paulo, “Ko au ka fakalogo ki nā mōliga o koe, kāfai nā tino na ki lātou mōlia koe e taunuku mai.” Oi fakatonu ai e ia nā fitafita ke leoleo ia Paulo, i te fale o te kōvana.