Gāluega 2 - Tokelauan New Testament

Ko te Afio Ifo o te Agaga Paia

¹ Kua pa ki te aho o te Penitekoho, oi fakapotopoto ai ki lātou uma kua talitonu, ki he mea e fokotahi.

² Kae teki lava kua fanaifo he leo mai te lagi e vē ko te agi a he matagi mālohi, kua agi ki loto o te fale ma fakatumulia ai te fale kātoa e maopoopo ai ki lātou.

³ Ma ki lātou kitea ai nā mea e vēia ni laulaufaiva afi kua i luga o ki lātou tau tokatahi uma nae i kinā.

⁴ Na fakatumulia ai ki lātou uma i te Agaga Paia, oi kāmata ai oi tautatala i iētahi gagana, e vē ona tuku atu e te Agaga ki a te ki lātou te mana ke tautatala ai.

⁵ Nae i ei ni tino Iutaia nae nonofo i Ieluhalema, ni tino lolotu i te lotu Iutaia, na ōmamai i nā atunuku uma o te lalolagi.

⁶ I te ki lātou lagonaga o te leo tēnei, oi na potopoto ai he kaifenua e tokalahi. Na tēteki uma ki lātou auā na lagona atu e ki lātou tau tokatahi uma, ko nā tino kua talitonu ki a Iehu e tautatala i nā gagana a ki lātou tau tokatahi.

⁷ Oi na taufai ōfo uma lele ai ki lātou ma lea vē, “Ko nā tino iēnei e tautala vēia, ni tino Kalilaia!

⁸ E vēhea la oi mafai ke lagona atu e ki tātou uma ki lātou e tautatala i nā gagana a ki tātou?

⁹ Ko ki tātou ni tino e ōmamai mai Pahoi, Mētoi ma Elamitai; mai Mehopotamia, Iutea ma Kapatokia; mai Ponitoho ma Ahia,

¹⁰ mai Fulugia ma Pamefulia, mai Aikupito ma nā koga o Lipuē e pili ki Kulene; ko iētahi o ki mātou e ōmamai mai Loma,

¹¹ ni tino Iutaia ma ni tino nukukehe kua talitonu ki nā tāpuakiga faka-Iutaia; ka ko iētahi e ōmamai mai Kelete ma Alapi — kae na fakalogo uma lava ki tātou ki a te ki lātou e tautatala i nā gagana a ki tātou, ki te uiga kehe o nā mea kua fai e te Atua!”

¹² Ona ko te ōfo lahi ma te nunumi o nā māfaufau o ki lātou, na fakatau fehili ai lava tētahi ki tētahi vēia, “He ā te uiga o te mea tēnei?”

¹³ Kae ko iētahi tino kua faikupu fakatauemu ma lea vē, “Ko nā tino iēnei e konanā!”

Kua Tautala ia Petelu ki te Kaifenua

¹⁴ Oi tū ai ki luga ia Petelu fakatahi ma iētahi apohitolo e toka hefulutahi, ma kāmata oi tautala leo lahi vēnei atu ki te kaifenua, “Oku uho Iutaia ma koutou uma iēnā e nonofo i Ieluhalema, fakalogo mai ke lea atu au i te mea tēnei.

¹⁵ Ko nā tino iēnei e hē konanā e vē ko nā manatu o koutou; ko tēia fātoā ta te iva i te taeao;

¹⁶ kae ko te mea tēnei te na tautala fakatatau ki ei te pelofeta ko Ioelu:

¹⁷ ‘Kua vāgana te Atua: Ko tēnei te mea ka kō faia i nā toe aho: Ka kō liligia toku Agaga ki luga o tagata uma. Ka tālaki e autou fānau taku fekau; ka kitea e outou taulelea talavou ni fakaaliga, ma ka fai miti nā tino mātutua.

¹⁸ Io, ke pa foki lava ki aku kaukauna, nā taulelea ma nā fafine, ka kō liligia ki o lātou luga toku Agaga i nā aho iēnā, ma ka ki lātou tālakia taku fekau.

¹⁹ Ka kō faia ni vāvega i te lagi i luga, ma ni fakailoga i te lalolagi i lalo. Ka i ei te toto, te afi, ma te ahu māfiafia;

²⁰ ka pōulitia te la, ma ka mu toto te māhina, ka ko hēki pa mai te Aho tāua lahi ma te mamalu o te Aliki.

²¹ Ma ko ai lava e kalaga ki te igoa o te Aliki mo he fehoahoani ka fakaolagia.’

²² “Koutou nā tino o Ihalaelu, fakalogo mai ki nā kupu iēnei! Ko Iehu te Nahaleta, ko he tino na filifilia e te Atua e vē ona fakaali tino atu ki a te koutou, e ala i nā gāluega mamana, nā vāvega, ma nā fakailoga na fai e te Atua kui mai ia te ia. E iloa lelei lava e koutou te mea tēnei, auā ko nā mea iēnei na tutupu lava i kinei i te mea e i ei koutou.

²³ Ko he peleni lava e a te Atua te na ia tukulima atu ai ia Iehu ki a te koutou; ma na tāmate e koutou i te kua fakataga e koutou nā tino agahala, ke ki lātou fakahātauloagia.

²⁴ Kae na toe fakatū e te Atua ia Iehu mai te oti, ma fakahaoloto mai nā tīgā matuitui o te oti, auā e hē mafai e te oti oi tāofi fakapagotā ia Iehu.

²⁵ Auā na lea vē ia Tavita e uiga ki a Iehu; ‘Na kō kitea te Aliki i mua o oku i taimi uma lava; auā e i oku tafa i toku itū taumatau, kae ke nahe i ei ai he mea e mataku ai au.

²⁶ Ma ko te mea ia e fiafia ai toku loto, ma ko aku kupu e tumu i te fiafia. Ma e ui ko au, he tagata e fano e mate, ka nofo au ma te fakamoemoe mautinoa,

²⁷ auā ka hē tuku tiakia au e koe te Atua, i te lalolagi o tagata oti; ka hē tukua e koe te tino o tau kaukauna fakamāoni ke pala i te tugamau.

²⁸ Kua kē fakahinoa mai ki a te au nā auala e maua ai te ola, ma ko tō fakatahi mai, ka fakatumulia ai au i te fiafia.’

²⁹ “Te kau uho, e tatau ke fakamanino atu e au e uiga ki to tātou tupuna takutakua, te Tupu ko Tavita. Ko Tavita na oti ma na tanu, ma ko tona tugamau e i kinei lava ke pa mai ki te aho nei.

³⁰ Nae he pelofeta ka koi ola ai, ma na ia iloa te folafolaga a te Atua na fai e uiga ki a te ia: na fai te tautōga a te Atua ka ia faia he lāpuna o Tavita ke kavea ma tupu e vē foki lava ko Tavita.

³¹ Na kitea e Tavita te mea e tuku e fai e te Atua i he taimi i mua, ma na tautala ai e uiga ki te toetū o te Mehia mai te oti, i te leaga vē, ‘E hēki tuku tiakia ia e te Atua i te lalolagi o tagata oti; e hēki pala tona tino i loto o te tugamau.’

³² Kua toe fakatū mai i te oti e te Atua te Iehu lava tēnei, oi ko ki mātou uma iēnei ni molimau ki te mea tēnā.

³³ Kua hikitia ake ia ki te itū taumatau o te Atua tona Tamana, ma kua tuku atu ki a te ia te Agaga Paia, e vē oi folafola e tona Tamana ki a te ia. Ko te mea la kua kikila ma fakalogo koutou ki ei nei, ko tana meaalofa tēnā kua liligi ifo ki o mātou luga.

³⁴ Auā e hē ko Tavita te na hikitia ki te lagi; kae na lea vēia, ‘Kua vāgana te Aliki te Atua ki toku Aliki: Nofo i toku itū taumatau

³⁵ ke pa ki te taimi e kō faia ai ō fili, ma nofoa e mapu ki luga ō vae.’

³⁶ “Ko te mea ia e tatau ai ke iloa ma mautinoa e koutou nā tino Ihalaelu uma, ko te Iehu tēnei, tēia na koutou fakahātauloagia, ko te tino ia kua fai e te Atua ma Aliki, ma ko ia ko te Mehia!”

³⁷ Na tuia lahi lele nā loto o tagata i te fakalogo atuga ki te mea tēnei, oi na lea vē atu ai ki lātou ki a Petelu ma iētahi apohitolo, “O mātou uho, he ā nei ta ki mātou ka fai?”

³⁸ Oi lea atu ai ia Petelu ki a te ki lātou, “Ko koutou uma tau tokatahi e tatau ke liliu kehe mai autou agahala ma papatihogia i te igoa o Iehu Keliho, kae ke fakamāgalo ai autou agahala; ma koutou maua ai te Agaga Paia, te meaalofa mai te Atua.

³⁹ Auā ko te folafolaga a te Atua, na fai ki a te koutou ma autou fānau vēnā ki nā tino uma lele e nonofo mamao — ki lātou uma kua valakaugia e te Atua to tātou Aliki, ke ōake ki a te ia.”

⁴⁰ E hē ko iēnei oioti nā mea na lea ai ia Petelu ki a te ki lātou, na fautua mālohi lele ki a te ki lātou i te lahi o iētahi kupu, kua lea vē atu, “Koutou la ke hao mai te fakahalaga ka pa ki ei tēnei tupulaga kino!”

⁴¹ E tokalahi na talitonu ki tana fekau ma na papatihogia, ma na maua te tai toluafe o ki lātou na fakaopoopo ki te vāega kua talitonu, i te aho tēnā.

⁴² Na fakafano to lātou taimi lahi ke akoako ai ki lātou e te kau apohitolo, ma māfuta fakatahi, kakai fakatahi, ma fai talohaga fakatahi.

Ōlaga o nā Tino kua Talitonu ki a Iehu

⁴³ E lahi nā vāvega ma nā fakailoga na fai e ala i te kau apohitolo, ma na mātataku lele ai ia tagata uma.

⁴⁴ Na tūmau pea lava te māfuta fakatahi o nā tino kua talitonu ki a Iehu, ma fakaaogā fakatahi a lātou meatōtino.

⁴⁵ Nae fai ma fakatau atu o lātou fenua ma a lātou meatōtino, ma fakahoahoa te tupe mā ki lātou fakatahi, fuafua ki o lātou manakoga tau tokatahi.

⁴⁶ I aho takitahi uma, e fakapotopoto fakatahi ki lātou i loto o te Mālumalu ma kakai fakatahi fakaholoholo i nā fale o ki lātou, i te agaga fiafia ma te loto maulalo,

⁴⁷ ma viviki ake ki te Atua ma na talia fiafia ki lātou e tagata uma. Ma ko aho uma lava e fakaopoopo e te Aliki ki te lātou vāega nā tino kua fakaolagia.