Gāluega 18 - Tokelauan New Testament

Kua Folafola e Paulo te Tala Lelei i Kolinito

¹ Kua teka atu nā mea iēnā, oi fano ai ia Paulo mai Atenai ki Kolinito.

² I kinā, na fetaui ai ma he tino Iutaia e igoa ki a Akula, na fānau i Ponitoho, ma na fātoā ōmamai i Italia ma tana āvaga ko Pihila, ona ko te fakatonuga a Kaihala Kalautiona, ko nā tino Iutaia uma i Loma ke olo kehe. Na fano ia Paulo oi fakahula ki ei,

³ oi nofo ai ma faigāluega ma te toka lua tēnei, auā ko tana gāluega nae fai ke ola ai ia ko te fai falekie, e vē foki lava ko nā gāluega a te toka lua tēnei.

⁴ Nae fai ana talatalanoaga i te hūnako i nā Hāpati takitahi uma, i ana taumafaiga ke talitonu nā tino Iutaia ma nā tino Eleni ki nā mea e akoako ake ai ki lātou e ia.

⁵ I te taunuku ifoga o Hila ma Timoteo mai Maketonia, oi tuku ai loa e Paulo nā gāluega a ia nae fai kae kua fakaaogā tona taimi kātoa ke folafola ai te fekau ma fakamanino lelei ki tagata Iutaia, ko Iehu ko te Mehia.

⁶ Na teteke ki lātou ki a Paulo ma faikupu kino ki ei, oi na tali vēnei atu ai ia Paulo ki a te ki lātou ma lūlū kehe te pefu i ona kofu, “Kāfai koutou e momotu kehe mai te Atua, ko koutou lava te na māfua ai! E hē ko he hehē e o oku. E kāmata atu nei, ko au ka fano oi tālaki ki tagata nukukehe.”

⁷ Oi na fano ai loa kua nofo i te fale o he tino nukukehe e igoa ki a Titiona Iuhito, he tino nae tāpuaki ki te Atua i te lotu Iutaia; ko tona fale nae tū i tafa o te hūnako.

⁸ Ko Kilihipo te takitaki o te hūnako, na talitonu ki te Aliki, vēnā ma tona kāiga kātoa; ma e tokalahi foki iētahi tino i Kolinito na fakalogo ki te fekau ma talitonu, ma na papatihogia.

⁹ I tētahi pō, na kitea ai e Paulo te Aliki i he fakaaliga e lea vē mai ki a te ia, “Ia koe nahe mataku, kae tautala pea lava ki a te ki lātou, ma nahe kē fakavāivai lele,

¹⁰ auā ko au e i ei fakatahi ma koe. E hēai he tino e ia mafaia oi fai he mea ke ogohia ai koe, auā i te kakai tēnei, e tokalahi oku tagata e nonofo ai.”

¹¹ Oi na nofo ai ia Paulo i kinā i he tauhaga ma te āfa, ma akoako atu te kupu a te Atua ki tagata.

¹² I te kaveaga o Kaliono ma kōvana o Akaia, oi kau fakatahi ai ia tagata Iutaia ma puke e ki lātou ia Paulo, ma kave ki te fakamahinoga.

¹³ Kua lea vēnei atu ki lātou, “Ko te tino tēnei kua taumafai ke tauanau ia tagata ke tāpuaki ki te Atua, i he auala e hē tuha ma te tūlāfono!”

¹⁴ E tau fai atu he fakamatalaga a Paulo, kae lea vē atu ia Kaliono ki nā tino Iutaia, “Anei ake te mea tēnei ko he holitūlāfono kino pe he mea hehē kua fai, e tatau la au ke onohai ma fakalogo ki a te koutou tagata Iutaia.

¹⁵ Kae ona ko koutou e fai fīnauga e uiga ki ni kupu ma ni igoa ma tautou lava tūlāfono, e tatau la ke fai lava e koutou he fakaikuga ki ei. E hē faia au ma fakamahino ki nā mea iēnā!”

¹⁶ Oi tuli kehe ai ki lātou e ia mai loto o te fale fakamahino.

¹⁷ Kua puke e ki lātou uma ia Hohetene te takitaki o te hūnako, ma kini i mua o te fakamahinoga. Kae e hēki tokaga lele ki ei ia Kaliono.

Kua toe Foki ia Paulo ki Anitioka

¹⁸ Na nonofo fakatahi ia Paulo ma te kau Kelihiano i Kolinito i ni aho e lahi, oi tukua ai e ia ki lātou, kae folau ma Pihila ma Akula ki Hulia. Ka ko hēki folau kehe ia Paulo mai Kegeleaiha, na tafi tula tona ulu ona he tautōga e a ia na fai.

¹⁹ Kua taunuku atu ki lātou ki Efeho, oi tuku ai i kinā ia Pihila ma Akula e Paulo kae fano ki te hūnako, ma talatalanoa ai ma nā tino Iutaia.

²⁰ Na fakatālohaga nā tino ki a Paulo ke nofo mataloa i kinā, kae e hēki fofou ia ki ei.

²¹ Ka kua lea vēnei atu ki ei i te taimi ka fano kehe ai, “Kāfai ko te finagalo ia o te Atua, e toe foki mai lava au ki a te koutou.” Oi folau kehe ai loa mai Efeho.

²² I te pa atuga o ia ki Kaihaleia, oi fano ai ki Ieluhalema oi feiloaki ma te Ekalehia, ma toe fano ai ki Anitioka.

²³ Na mataloa malie i kinā, oi fano ai kua kui loto i te kogāfenua o Kalatia ma Fulugia, ma fakamākeke atu ki te kau Kelihiano uma.

Kua Folafola atu e Apolo te Auala o te Aliki i Efeho ma Kolinito.

²⁴ I te taimi tēnā na fano ai ki Efeho ia Apolo, he tino Iutaia na fānau i Alehania. He tino poto tautala, ma mālamalama lelei i nā Tuhituhiga Paia.

²⁵ Na fakaako lelei ia e uiga ki te Ala o te Aliki, ma nae fiafia lahi lele oi folafola ma fakailoa hako atu nā fakamatalaga e uiga ki a Iehu. Kae oioti lava te mea na ia iloa ko te papatihoga a Ioane.

²⁶ Na kāmata loa oi tautala atu ia Apolo ma te hē mataku i loto o te hūnako. I te lagonaga e Pihila ma Akula te tautalaga a Apolo, oi kave ai e ki lāua ki to lā fale ma fakamālamalama hako ki ei e uiga te Ala o te Atua.

²⁷ Na fai te tonu a Apolo ko ia ka fano ki Akaia, oi kave ai te tuhi a te kau Kelihiano i Efeho ki te kau Kelihiano i Akaia, ke ki lātou talia i Apolo kāfai e pa ake. I te taunukuga o Apolo ki Akaia, na fai ia ma fehoahoani lahi ki a te ki lātou kua talitonu, e ala i te alofa tūnoa o te Atua.

²⁸ Auā nae fīnau mālohi ma nā tino Iutaia i mua o tagata, ma na fakailoa ai e ia te hehē o ki lātou. Na fakamāonia e ia ki a te ki lātou e ala i nā Tuhituhiga Paia, ko Iehu ko te Mehia.