Gāluega 17 - Tokelauan New Testament

Kua Fakahāuāgia ia Paulo ma ona hoa e Tagata i Tehalonika

¹ Na fakaauau pea te malaga a Paulo ma Hila, kua kui loto atu i Amefipoli ma Apolonia, oi taunuku ai ki Tehalonika, te mea nae i ei ai he hūnako.

² Na fano ia Paulo ki te hūnako, e vē lava ko tana māhani. I kinā, e tolu ia Hāpati nae talatalanoa ai ma tagata ma na hiki mai e ia ni kupu mai nā Tuhituhiga Paia,

³ ke fai ma fakamāoniga ko te Mehia e tatau ke maua i nā puapuagā, ma toe tū mai i te oti. Kua lea vē atu ia Paulo, “Ko te Iehu tēnei e kō folafola atua, ko te Mehia ia.”

⁴ Ko iētahi tino o ki lātou na talitonu ma na kau fakatahi ai ma Paulo ma Hila; na vēnā foki te tokalahi o nā fafine takutakua i te kakai ma nā tino Eleni, kua talitonu ma tāpuaki ki te Atua.

⁵ Kae ko iētahi tino Iutaia kua maua i te lotokino, ma kua ki lātou fakamāopoopo maia he kaifenua o nā tino tataka holo i nā auala. Kua fakatupu e ki lātou te piha ma te vevehi i loto o te kakai kātoa ma ohofaki e ki lātou te fale o he tamāloa e igoa ki a Iahona, i he taumafaiga ke hakili ia Paulo ma Hila ke kaumai ki tagata.

⁶ Kae e hēki maua e ki lātou te toka lua ki kinā, ma ko te mea ia na toho ai e ki lātou ia Iahona ma iētahi tino kua talitonu ma kave ki mua o te taupulega ma taufōlulua vē, “Ko nā tino iēnei kua ki lātou fakatupuagia te vevehi i ho he koga e olo ki ei! Nei, kua ōmamai ki to tātou kakai,

⁷ ma kua talia ki lātou e Iahona ki loto o tona fale. Kua holi e ki lātou uma nā tūlāfono a te Kaihala, ma na lea e i ei tētahi tupu, ko tona igoa ko Iehu.”

⁸ Ko a lātou fakakupuga iēnei na faitapiha ai te kaifenua ma te taupulega.

⁹ Oi fakatonu ai ia Iahona ma iētahi tino e te taupulega, ke totogi te tupe e mafai ke tatala ai ki lātou ki tua, ma tuku ai ke olo.

Ko Paulo ma ona hoa i Peloia

¹⁰ Na pa loa lava ki te pō, oi uga ai ia Paulo ma Hila e nā uho Kelihiano ke olo ki Peloia. Kua taunuku atu ki lāua ki kinā, oi olo ai ki te hūnako o tagata Iutaia.

¹¹ Na hili atu te tali aloakia o ki lāua e nā tino i kinā, i lo nā tino i Tehalonika. Na fakalogologo ki lātou ki te fekau ma te loto naunau lahi, ma nae hukehuke e ki lātou nā Tuhituhiga Paia i aho uma, ke ki lātou iloa ai pe moni te mea e lea ai ia Paulo.

¹² E tokalahi nā tino na talitonu; ma e tokalahi nā fafine Eleni mai nā kāiga tūtūlelei ma tokalahi nā taulelea Eleni na talitonu foki.

¹³ Kae i te lagonaga e nā tino Iutaia i Tehalonika kua folafola foki e Paulo te kupu a te Atua i Peloia, oi olo ai foki ki ei ma kāmata oi fakaohooho ki nā tino kae ke tupu ai foki he vevehi.

¹⁴ Oi na uga ai loa e te kau Kelihiano ia Paulo ma ni iētahi taulelea ke olo ki he koga tū matāfaga; kae kua nonofo ia Hila ma Timoteo i Peloia.

¹⁵ Ko nā taulelea na ki lātou kavea ia Paulo, na olo ma Paulo ke pa ki Atenai, oi toe foki ifo ai ki Peloia ma te fakatonuga mai ia Paulo ki a Hila ma Timoteo, ke o ake vave ki te mea e i ei ia.

Ko Paulo i Atenai

¹⁶ Ka koi fakatalitali ia Paulo ki a Hila ma Timoteo i Atenai, na lagona lava e ia te matuā hē fiafia lahi, i te ia kiteaga ko te kakai e tumu i nā tupua.

¹⁷ Ko te mea ia nae talatalanoa ai ma nā tino Iutaia i te hūnako fakatahi ma nā tino nukukehe nae tāpuaki ki te Atua. Na talatalanoa foki ma nā tino i te māketi vēnā ma ki lātou na kui atu i kinā.

¹⁸ Nae i kinā ni tino o te talitonuga faka-Epikuleionu ma ni tino o te talitonuga o Hitōikō. Kua fehili vē iētahi o ki lātou, “E vēhea ake ko te mea e lea ai te tagata fiapoto tēnā?” Kua tali mai iētahi tino, “E vē lava e tautala fakatatau ki ni atua kehe.” Na lea vēnā ki lātou, ona ko Paulo nae folafola e ia e uiga ki a Iehu ma te toetū.

¹⁹ Ko te mea ia na kave ai e ki lātou ia Paulo ki mua o te taupulega a te kakai e fakaigoa ko te Aleiopakono, ma kua lea vē atu ki lātou ki a Paulo, “E fia iloa e ki mātou pe vēhea te akoakoga fou tēnā e tautala ai koe.

²⁰ Ko iētahi mea e lagona e ki mātou e lea ai koe, e vēia e kehe i ta mātou fakalogo, ma e fia iloa e ki mātou te uiga o nā mea iēnā.”

²¹ (Auā ko tagatānuku uma lele o Atenai, ma nā tino kehe e nonofo ai, e fiafia ke nonofo oi faitatala ma fakalogologo ki nā mea fou.)

²² Na tū ki luga ia Paulo i mua o te Aleiopakono ma lea vē atu, “I taku kikila, ko koutou tagata Atenai, ni tino e aloā e lolotu.

²³ Auā i te kui atuga o oku i te koutou kakai ma kikila ki nā mea e tāpuaki ai koutou, na kō kitea ai he fata faitāulaga e tuhi ai, ‘Ki he Atua e Hē Iloa.’ Ko te Atua la tēnā e tāpuaki koutou ki ei, e ui lava e hē koutou iloa, ko te Atua ia e folafola atu nei e au ki a te koutou.

²⁴ Ko te Atua, tē na faia te lalolagi ma nā mea uma e i ei, ko te Aliki ia o te lagi ma te lalolagi, ma e hē nofo i ni mālumalu e fau i nā lima o tagata.

²⁵ E hēai foki he mea e fia maua e ia mai ia te ki tātou, e ala i to tātou kaukauna ki a te ia, auā ko ia lava te fōki maia te ola ma te mānava ma iētahi mea valevale, ki tagata uma.

²⁶ Mai te tamāloa e fokotahi, na ia faia ia tagata lanu kehekehe uma ke nonofo i te lalolagi kātoa. Ko ia lava te na ia fuafuagia muamua nā taimi ma nā gataaga o nā mea e nonofo ai ki lātou.

²⁷ Na fai e ia te mea tēnei kae ke hakili ai ia e ki lātou, ma ātonu ka tau fāfā ki lātou ki a te ia ma mafai ai ke maua ia e ki lātou. Oi ka ko te Atua e hē mamao lele ma ho he tino o ki tātou;

²⁸ e vē oi lea ai hētahi tino, ‘E ala ia te ia, kua ola ma gāoioi ma tūmau ai pea ki tātou.’ E vē foki ko nā kupu a iētahi tino fatuholo o koutou, ‘Ko ki tātou uma ni fānau lava e a ia.’

²⁹ Ona ko ki tātou ni fānau e a te Atua, e hē tatau la ki tātou ke manatu ko te Atua e tāi fōliga ki he fakatuha e fai i te aulo, pe i te hiliva, pe i te fatu, i te poto ma te iloa o te tagata.

³⁰ Kua hē toe taua e te Atua nā aho nae hē iloa ai ia e tagata, kae i te taimi nei, kua fakatonu e ia ia tagata uma i ho he koga o te lalolagi, ke liliu kehe mai o lātou uiga kino.

³¹ Auā kua uma te fakamau e ia o te aho ka ia fakamahinoa ai ma te āmiotonu te lalolagi kātoa, e ala i he tino kua ia filifiliagia. Kua ia fakamāoniagia ki tagata uma te mea tēnei, e ala i te toe fakatūga e ia o te tino tēnā mai te oti!”

³² I te ki lātou lagona atuga o Paulo e tautala e uiga ki te toetū mai te oti, oi fakatauemu ai iētahi tino ki ei, kae ko iētahi tino kua lea vē, “Ko ki mātou e fia toe fakalogo ke tautala mai koe i te mea tēnā.”

³³ Ma na fano kehe ai loa ia Paulo mai te mea e i ei ki lātou.

³⁴ E i ei nā taulelea na talitonu ma na mulimuli ai i te kau a Paulo, ma ko tētahi o ki lātou iēnei ko Tionihio, he tino e o te taupulega; nae i ei foki he fafine e igoa ki a Tamali, ma iētahi tino.