Gāluega 1 - Tokelauan New Testament

¹ Ki taku uō ko Teofilo: I taku tuhi muamua, na kō tākua ai nā mea uma na fai e Iehu ma na ia akoakoa, mai te aho na kāmata ai tana gāluega

² ke pa lava ki te aho na hikitia ake ai ki te lagi. Ka ko hēki hikitia la, kae fai tana fakatonuga e ala i te mana o te Agaga Paia ki nā taulelea na ia filifilia, ke fai ma ana apohitolo.

³ I nā aho e fahefulu talu te mate o Iehu, na ia fakakitea ia ki a te ki lātou i ni taimi e lahi, ma i ni auala e fakamāonia lelei ai ko ia kua toe tū mai i te oti. Na ki lātou kitea ia Iehu, ma na tautala ia Iehu ki a te ki lātou e uiga ki te Mālō o te Atua.

⁴ Ka ko i ei ia ma ki lātou, na fai e ia te fakatonuga tēnei ki ei, “Ko koutou e hē olo kehe ma Ieluhalema, kae fakatali ki te meaalofa na lea atu ai au, te meaalofa na folafola e toku Tamana.

⁵ Na papatiho e Ioane ia tagata i te vai, kae i ni nai aho, ko koutou ka papatiho i te Agaga Paia.”

Kua Hikitia Ake ia Iehu ki te Lagi

⁶ Kua fakatahi te kau apohitolo ma Iehu, oi fehili vē atu ai ki lātou ki a te ia, “Te Aliki, ka toe fōki nei e koe te Mālō ki a Ihalaelu i te taimi nei?”

⁷ Na tali atu ia Iehu, “Ko toku Tamana oioti lava te ia faia te tonu pe ko āfea te ka tutupu ai nā mea iēnei, ma e hēai lele hautou aiā ki ei.

⁸ Kae i te taimi e fanatu ai te Agaga Paia ki outou luga, ka fakatumulia koutou i te mana ma kavea ai koutou ma molimau e uiga ki a te au i loto o Ieluhalema, Iutea ma Hāmālia, ma ke pa lava ki te gataga o te lalolagi.”

⁹ Kua uma te vāgana atu vēnei o Iehu, oi hikitia ake ai ki te lagi kae kikila atu ki lātou, ma na pupuni ai ia i he ao, mai te lātou kikila.

¹⁰ Ka koi kikila ake lava o lātou mata ki te lagi i te teka kehe atuga o Iehu, kae teki lava kua i ei ni taulelea e toka lua e tutū i o lātou tafa, e kokofu i ni kofu paepae.

¹¹ Kua lea vē mai ki lāua, “Nā tino Kalilaia, he ā te tutū ai koutou i kinā ma taukikila ki te lagi? Ko te Iehu tēnei, tēia na hikitia ake mai ia te koutou, ka toe haele mai i te auala lava e tahi na koutou kitea na fanake ai ki te lagi.”

Ko te Tino na Hui ki a Iuta

¹² Oi toe foki ai te kau apohitolo ki Ieluhalema mai te Mauga o Ōlive, e tuha pe he āfa maila te mamao mai te kakai.

¹³ Kua taunuku atu ki lātou ki Ieluhalema, oi olo ai ki te potu nae nonofo ai i te falealuga; ko Petelu, ko Ioane, ko Iakopo ma Anitelea, ko Filipo ma Toma, ko Patolomaio, ko Mataio, ko Iakopo te ataliki o Alefaio, ko Himona (nae fakaigoa ko te Lotonuku), ma Iuta te ataliki o Iakopo.

¹⁴ Nae maopoopo ho ki lātou oi tatalo fakatahi, ma nae i ei ai ma nā fafine vēnā ma Malia te mātua o Iehu ma nā uho o Iehu.

¹⁵ Kua teka atu ni nai aho, oi fai ai he fono a nā tino kua talitonu ki a Iehu, e maua te tai 120 fakatahi, oi tū ai ia Petelu oi tautala.

¹⁶ Kua lea vē atu, “Te kau uho, kua tatau lava ke fakataunuku te mea e tākua i te tuhituhiga paia e uiga ki a Iuta, tē na ia takitakia nā leoleo o te Mālumalu ke ki lātou pukeagia fakapagotā ia Iehu. Ko te mea tēnei na valoia e te Agaga Paia i nā aho kua leva lele, e ala mai ia Tavita.

¹⁷ Ko Iuta nae he hoa e o ki mātou, auā na filifilia ia ke gālulue fakatahi ki mātou.”

¹⁸ (Ko te tupe na maua e Iuta mai tana gāluega kino na fai, na ia fakataua ai he fenua, ma ko kinā te na pakū ai ki lalo ma uma ai tona ola; na gapā tona manava oi holo ai ki fafo.

¹⁹ Na fakalogo ki ei nā tino uma nae nonofo i Ieluhalema, oi fakaigoa ai e ki lātou te fenua tēnā i te lātou gagana, ko Akeletama, ko tona uiga, “Fenua o te Toto”.)

²⁰ “Auā e tūhia i te tuhi o te Halamo, ‘Ke fakagaogaogia tona fale; ke nahe i ei lele he tino e nofo ai.’ E tūhia foki vēia, ‘Ke i ei he tino ke ia hui ia i tana gāluega.’

^21-22 “Ko te mea ia kua tatau ai ke i ei he tino fakaopoopo ke fai ma molimau ki te toetū o te Aliki ko Iehu. E tatau ko he tino nae i te mātou vāega i te taimi kātoa nae malaga fakatahi ai te Aliki ko Iehu ma ki mātou, kāmata mai i te taimi na tālaki ai e Ioane tana papatihoga, ke pa ki te aho na hikitia ai ia Iehu ki te lagi.”

²³ Oi fakatutū mai ai e ki lātou nā igoa o ni taulelea e toka lua ke filifili ki ei: ko Iohefa, nae fakaigoa ki a Pāhapa (nae igoa foki ki a Iuhito), ma Matiahi.

²⁴ Oi fai ai te lātou tatalo, “Te Aliki, e kē iloa ia loto o tagata uma lele. Ko te mea ia, te Atua e, fakaali mai ki a te ki mātou pe ko ai o te toka lua tēnei kua kē filifilia

²⁵ ke fai ma apohitolo ke hui ai ia Iuta, tēia kua fano lava ki te mea e talafeagai mo ia.”

²⁶ Na fai ai te hēki i nā igoa iēnei e lua, oi maua ai ia Matiahi, ma na fakaopoopo ai ki te kau apohitolo e toka hefulutahi.