Filipi 4 - Tokelauan New Testament

Ni Fakahinoga

¹ Ko te mea ia te kau uho, ko koutou e pele ia te au ma ko au te manatu atu ki a te koutou! Kua koutou faia nā mea e fiafia lahi ma fāfia ai au. Ko te mea ia te kau uho pele, ke vēnā foki lava ona mautū te koutou talitonu ki te Aliki.

² Euotia ma Hutuke, ko koulua ni tino e o te Aliki, ma ko te mea ia e talohaga atu ai au, ke fakauma loa nā fekehekeheakiga o koulua.

³ Ma ko koe foki toku hoa moni, ko au e fofou ko koe ke fehoahoani ki nā fafine iēnei; auā nae gālulue mālohi ki lāua fakatahi ma au i te tālakiga o te Tala Lelei, fakatahi ma Kelemete ma iētahi hoā kaukauna, iēia kua tūhia o lātou igoa i te tuhi o te ola, a te Atua.

⁴ Koutou ke fiafia pea lava i te māfutaga a koutou fakatahi ma te Aliki. Ko au e toe lea atu; koutou ke fiafia!

⁵ Fakaali ki ho he tino te loto agamalū. Ko te Aliki kua toeititi oi hau.

⁶ Koutou nahe popole ki he mea e fokotahi, kae tatalo ki te Atua ki nā mea uma e fofou koutou ki ei, gogō atu ki a te ia ma te loto fakafetai.

⁷ Ma ko te fīlēmū o te Atua, tēia e hē tāitai ke pa ki ei te mālamalama o te tagata, ka puipui malu ki outou loto ma outou māfaufau, i te māfutaga fakatahi ma Keliho Iehu.

⁸ Ko aku toe kupu te kau uho, ni a lava ni mea e lelei ma maua ai he vīkiga, ni mea e moni, ni mea e mamalu, ni mea e tonu, ni mea e mamā, ni mea e gali, ni mea e lelei kātoatoa, koutou ke māfaufau pea lava ki ei.

⁹ Fakatino nā mea na iloa ma maua e koutou mai ia te au, e hē gata i aku kupu kae vēnā foki aku gāluega. Ma ko te Atua e maua ai e ki tātou te fīlēmū, ka fakatahi ma koutou.

Fakafetai mo te Meaalofa

¹⁰ I toku ōlaga i te māfutaga fakatahi ma te Aliki, ko he mea e fiafia lahi ai au, ona kua toe maua e koutou he avanoa, e ui lava kua mataloa, ke fakaalia ai te koutou alolofa mai ki a te au. E hē vē ko koutou nae hē alolofa mai ki a te au — kae kogā lava nae hēai he avanoa ke fakatino ai te koutou alolofa.

¹¹ Ma ko au e hē lea vēnei atu ona e hē lava haku mea ke ola ai au, auā kua iloa e au oi talia ma te fiafia ho he mea kua kō maua.

¹² E iloa e au te mea e takua ko te mativa ma te mea e takua ko te lahi o ni mea. Kua iloa e au te mealilo tēnei; ma pe ko fea lava la te i ei au, i ho he taimi, ko au e fiafia lava, pe mākona au pe fiakaia, pe lahi aku mea pe taigole.

¹³ Kua fōki mai e Keliho ki a te au te mālohi, ke talia ai e au ho he mea.

¹⁴ Kae te lelei na mafai e koutou oi fehoahoani mai i nā taimi faigatā nae feagai ma au.

¹⁵ E iloa lelei lava e koutou iēnā i Filipi, i te fano kehega o oku ma Maketonia i te kāmataga o te tālakiga o te Tala Lelei, e hēai hētahi Ekalehia na gālulue fakatahi ki mātou na fōki maia ki a te au he fehoahoani ma talia e au, kae vaganā ai lava koutou.

¹⁶ Ke pa foki lava ki te taimi nae i Tehalonika ai au, na fehoahoani fakafia mai lava koutou ki a te au.

¹⁷ E hē vē ko au e fofou oioti lava ke kō maua ni meaalofa; kae ko au e fofou ke tuputupu pea lava ia fua o autou gāluega.

¹⁸ Kua maua e au te totogi kātoatoa, ma e hili atu foki ki luga — ma kua hēai lele hētahi mea e kō manakomia, talu te hau o Epafolotito ma nā meaalofa mai ia te koutou. Ko autou meaalofa e vē ni tāulaga mea manogi e ofo atu ki te Atua, ma e talia ma fiafia ia ki ei.

¹⁹ Ma ka fōki atu e toku Atua ki a te koutou mai te lahi o tona tamaokāiga e ala ia Keliho Iehu, nā mea uma lele e fofou koutou ki ei.

²⁰ Ke vīkia to tātou Atua te Tamana ke pa lava ki te fakavavau! Amene.

Ko nā toe Kupu

²¹ E fakafeiloaki atu ki nā tino uma o te Atua e ala ia Keliho Iehu. E fakafeiloaki atu foki ki a te koutou, te kau uho e fakatahi ki mātou i kinei.

²² E fakafeiloaki atu foki nā tino uma o te Atua i kinei, kae maihe lava ki lātou e i te fale o Kaihala.

²³ Ke ia te koutou uma te alofa tūnoa o te Aliki ko Iehu Keliho.