Filipi 3 - Tokelauan New Testament

Ko te Āmiotonu Moni

¹ Ko aku toe kupu, te kau uho, koutou ke fiafia i te māfutaga a koutou fakatahi ma te Aliki. E hēai he mea e i ei kāfai au ka toe lea atu i nā mea na tuhi atu ai au muamua. E mo te koutou haogalēmū kāfai au e toe lea atu ai.

² Koutou ke fakaeteete i nā tino e vē ni kulī! Nā tino e ki lātou faia nā mea kino ma e fofou ke fakamātipitipi te tino.

³ Ko ki tātou nā tino kua mauagia te pelitome moni, auā ko ki tātou e tāpuaki ki te Atua e ala i tona Agaga, ma ko ki tātou e fiafia i to tātou ola i te māfutaga ma Keliho Iehu. E hē fakamoemoe ki tātou ki faiga a tagata i te kikila atu i fafo.

⁴ E mafai foki ke tuku toku fakamoemoe ki nā itūkāigā mea vēnei. Kāfai he tino e manatu e mafai ia ke fakamoemoe ki faiga vēnei a tagata, e tatau ke hilimua atu te ia te au o ni manatu vēnei.

⁵ Ko au na pelitome i te valu o aho talu toku fānau mai. Ko au he Ihalaelu mai te puikāiga o Peniamina, he tino Epelu moni lava. I te tūlaga tau ki te Tūlāfono Iutaia, ko au nae he Falehaio,

⁶ ma ko toku loto tautua mālohi ki te Atua, na fakahāuā ai au ki te Ekalehia. Nae fai e au nā mea uma e fakatonu mai e te Tūlāfono, kae ke fiafia ai te Atua.

⁷ Kae ko nā mea uma lele nae fakatāua e au muamua, kua hē toe tāua i te taimi nei, ona ko Keliho.

⁸ E hē nā ko nā mea iēnā oioti. Ia te au, e hēai lele he mea e hili atu te tāua i lo te iloa e au o Keliho Iehu toku Aliki. Kua tīaki e au nā mea uma lele, auā ia te au, ni otaota uma nā mea iēnā. Oioti lava te mea e fofou au ke kō maua ko Keliho,

⁹ ma ke kātoatoa lelei te māfutaga ma ia. E hēai he mea e mafai ke kō faia ke talia ai au i mua o te Atua, ona ko au e uhitaki ki te Tūlāfono a Mohe. Ko au e talia oioti i mua o te Atua pe kāfai au e fakatuatua ki a Keliho.

¹⁰ Oioti lava la te mea e fofou au ki ei, ke iloa e au ia Keliho ma te mana o tona toetū, ke puapuagā au e vē ko ia, ma ke oti foki au e vē ko ia

¹¹ kae ke mafai ai foki au ke toe fakatū mai te oti.

Taufetuli ki te Hini

¹² Ko au e hē lea atu kua maua e au te mea tēnei, pe ko au kua lelei kātoatoa. Kae ko au e tauivi lava ke kō maua te fakailoga. Ko tēnei tonu foki lava te māfuaaga na kavea ai au e Keliho Iehu ke fai mo ia.

¹³ Te kau uho, e hēai lele hoku manatu kua uma te kō mauagia o te fakailoga; kae oioti lava te mea e kō faia, ko te fakagalo o nā mea kua teka, kae taumafai ki te mea e gata ai toku mafai, ke kō maua nā mea koi mua.

¹⁴ Ko au la e vili hako lava ki te hini kae ke kō maua te fakailoga o te manumālō, ko te kalaga mai tēnā a te Atua e ala ia Keliho Iehu, ki te ola e fakavavau.

¹⁵ Ko ki tātou uma kua mātutua i te fakateagaga, e tatau ke tutuha o tātou manatu. Kae kāfai e i ei ni tino o koutou e kehe o lātou manatu, ka fakamālamalama atu e te Atua ki a te koutou.

¹⁶ Oioti lava te mea, tātou pipiki mau pea ki nā tūlāfono nae mulimuli ki tātou ki ei mai te kāmataga, ke pa mai ki te taimi nei.

¹⁷ Te kau uho, fakatakitaki mai ki a te au, ma ke maua he koutou akoakoga mai nā tino e mulimuli ki nā fakatakitakiga kua tuku atu e ki mātou mo koutou.

¹⁸ Kua lea fakafia atu au ki a te koutou i te mea tēnei, ma ka toe lea atu foki au ma te maligi o oku loimata; e tokalahi nā tino e ola i he ōlaga kua kavea ai ki lātou ma fili o te hātaulo o Keliho.

¹⁹ Ko te ikuga o nā tino iēnei e fakaumatiagia, auā kua atua ki lātou ki o lātou manakoga fakatetino. E fāfifia i nā mea e tatau ke māhiahi ai, ma e māfaufau oioti lava ki nā mea o te lalolagi.

²⁰ Kae ko ki tātou ni tagatānuku e o te lagi, e fakatalitali ma te amanaki ki to tātou Fakaola, te Aliki ko Iehu Keliho, ke haele ifo mai te lagi.

²¹ Ka hui e ia o tātou tino e pala ke vē ko tona tino mamalu, ma ko tona mana e ia mafaia ai oi tuku ia mea uma ki lalo o tana pule.