Filipi 2 - Tokelauan New Testament

Ko te Lotomaulalo ma te Hilihilikehe o Keliho

¹ Ko te ōlaga o koutou i te māfutaga ma Keliho e mākekeke ai koutou, ma ko tona alofa e fakamāfanafana ki a te koutou. Kua i te māfutaga fakatahi koutou ma te Agaga, ma kua ia te koutou te agalelei ma te tīgā alofa o tētahi ki tētahi.

² Ko au la e naunau lele ke fakakātoatoa e koutou toku fiafia, kāfai koutou e tahi i te manatu, tahi i te alofa, ma tahi i te loto ma te māfaufau.

³ Nahe faia lele he mea e koutou e ala i te manatu fakapito pe ko te fāfia, kae fai i te loto maulalo, ma ke fakamuamua lava te manatu, e hili atu te tāua o iētahi tino i lo koutou.

⁴ Ma kikila ki nā mea e manuia fakatahi ai koutou, kae nahe kikila lava te tino mo ia lava.

⁵ Ke vē outou manatu ko nā manatu nae ia Keliho Iehu:

⁶ Nae ia te ia lava te natula o te Atua, kae e hēki fofou lele ko ia ke tūmau te tutuha ma te Atua.

⁷ Kae ko ia lava te na fofou ke tīaki iēnei mea uma kua ia te ia, ma na kavea ia ma kaukauna. Na kavea ia e vē ko he tagata ola ma ko ona fōliga na kitea ni fōliga o he tagata ola

⁸ Ma i tona itū tagata, nae loto maulalo, ma nae uhitaki pea lava ke pa lava ki tona mate — i luga o te hātaulo.

⁹ Ko te mea ia kua fakaeke ake ai ia e te Atua ki te mea e pito hili te maualuga o tona mamalu i te lagi ma fōki ki ei te igoa e hili ona tāua i igoa uma.

¹⁰ Ma ko te mea ia ka tōtutuli ma ifo ai ia tagata ma agaga ola uma i te lagi, i te lalolagi ma i lalo o te lalolagi, ke iloa ai te mamalu o Iehu,

¹¹ ma ka takutaku atu e ki lātou uma lele ko Iehu Keliho ko te Aliki, ke vīkia ai te Atua te Tamana.

Huhulu e vē ni Mōlī i te Lalolagi

¹² Ko te mea ia te kau uho pele, e vē ona uhitaki mai koutou ki a te au i taimi uma nae māfuta fakatahi ai ki tātou, ka hili atu la te tāua ke uhitaki mai koutou ki a te au i te taimi tēnei e hē i kinā ai au ma koutou. Ke tūmau pea te koutou gālulue i te mataku ma te gatete, ke kātoatoa ai te koutou fakaolataga,

¹³ auā ko te Atua e galue pea lava i taimi uma i loto ia te koutou, ke mafai ai ke i ei outou loto ma uhitaki ki te mea e finagalo ia ki ei.

¹⁴ Fai autou gāluega uma e aunoa ma te mūimui pe tauaikupu,

¹⁵ kae ke hē taku hehē ai koutou ma mamā kātoatoa, koutou te fānau a te Atua e nonofo i he lalolagi o tagata āmio pikopiko ma agahala. E tatau koutou ke huhulu atu e vē ni fetu pupula e māinafia ai te lagi,

¹⁶ i nā taimi e folafola ai e koutou te fekau o te ola. Kāfai e koutou faia te mea tēnei, ka fai tēnā ma mea e fāfia ai au i te Aho o Keliho, auā e fakaali mai ai i kinā ko aku taumafaiga uma ma aku gāluega, e hēki māumau.

¹⁷ E tuha lava pe kāfai ka fakamaligi toku toto e vē he tāulaga e ofo atu ki te Atua i luga o te fata faitāulaga e tuha ai ma te talitonuga o koutou, ko au e fiafia ma olioli fakatahi ma koutou uma.

¹⁸ E vēnā foki la oi tatau ke fiafia ma olioli koutou fakatahi ma au.

Ko Timoteo ma Epafolotito

¹⁹ Kāfai e tuha ai ma te finagalo o te Aliki, ko au e fakamoemoe ka mafai e au oi uga atu ia Timoteo ki a te koutou i he taimi pili mai, kae ke maua mai ai ni tala e uiga ki a te koutou, e fakamākeke ātili mai ki a te au.

²⁰ Ko ia oioti te tino e tutuha o mā loto, ma e alofa moni atu ki a te koutou.

²¹ Ko iētahi tino uma lele, e kikila ifo lava te tino mo ia lava, kae kua hē kikila pe fehoahoani vēhea ia ki te gāluega a Iehu Keliho.

²² Ma kua uma te koutou iloa ma fakamāonia ko Timoteo ko he tino fakamoemoegia, e gālulue fakatahi ki māua e vē lava he ataliki ki a te au, i te tālakiga o te Tala Lelei.

²³ Ko au la e fakamoemoe ka uga atu e au ia Timoteo ki a te koutou, kāfai kua tau ataata mai te tūlaga ka pa au ki ei.

²⁴ Ma e talitonu au, kāfai e tuha ai ma te finagalo o te Aliki, ka mafai foki au ke vave pa atu ki a te koutou.

²⁵ Kua manatu au e tatau ke uga atu ki a te koutou to tātou uho ki a Epafolotito, toku hoa i te gāluega ma nae tau fakatahi ma au, ma ko tautou kavefekau e fehoahoani mai ki a te au.

²⁶ Kua fia fanatu lele ke feiloaki ma koutou uma, ma e popole lele ona kua koutou iloa ko ia nae tauale.

²⁷ Kae e hako nae tauale, ma na mea lava e mate ai. Kae na alofa ki ei te Atua, e hē gata la ki a te ia kae vēnā foki ki a te au, ma hēki pa ai au ki he tūlaga fakanoanoa lahi.

²⁸ Ko au la kua fofou lele ke uga atu ia Epafolotito, kae ke fiafia ai koutou kāfai koutou e toe kikila ki ei, ma ke galo atu ai foki toku fakanoanoa.

²⁹ Ko te mea la ia, ke talia mai e koutou ma te fiafia te uho tēnei i te Aliki. Fakaaloalo ki nā tino e vē ko ia tēnei,

³⁰ auā na mea lava e mate mo te gāluega a Keliho, kae ke maua ai e au te fehoahoani tēia e hēki koutou mafaia oi fōki mai ki a te au.