Filipi 1 - Tokelauan New Testament

¹ Mai ia Paulo ma Timoteo, nā kaukauna a Keliho Iehu — Ki nā tino uma o te Atua i Filipi e i te māfutaga fakatahi ma Keliho Iehu, vēnā ma nā takitaki o te Ekalehia ma nā tino fehoahoani:

² Ke ia te koutou te alofa tūnoa ma te fīlēmū mai te Atua to tātou Tamana ma to tātou Aliki ko Iehu Keliho.

Ko te Tatalo a Paulo mo nā tino i Filipi

³ Ko au e fakafetai ki toku Atua i nā taimi uma e māfaufau ai au ki a te koutou;

⁴ ma i taimi uma e tatalo ai au mo koutou uma, ko au e tatalo ma toku loto fiafia

⁵ ona ko tautou fehoahoani ki a te au i te tālakiga o te Tala Lelei, mai te aho muamua ke pa mai nei.

⁶ E mautinoa e au ko te Atua, tē na ia kamatagia te gāluega lelei i loto ia te koutou, ka galue pea lava ke pa ki te fakaikuga i te Aho o Keliho Iehu.

⁷ Ko koutou e i toku loto i taimi uma lava. Ma ko he mea tatau foki lava ke ia te au ni lagona vēnei e uiga ki a te koutou. Auā ko koutou uma ni hoa e o oku i te gāluega tēnei na tuku mai e te Atua ki a te au i tona alofa tūnoa, e hē gata i te taimi nei e falepuipui ai au, kae vēnā foki i nā taimi nae haoloto ai au ke fai ma molimau ki tagata ki te moni o te Tala Lelei, kae ke fakamautū ai to lātou talitonu ki ei.

⁸ E iloa e te Atua te naunau lahi o toku loto ke feiloaki ki tātou. E ia iloa ko au e alofa lele atu ki a te koutou e vē foki lava ko te alofa o Keliho Iehu.

⁹ Ma ko au e tatalo ko te koutou alofa ke tuputupu pea lava, ma ke kātoatoa te koutou iloa ma te mālamalama,

¹⁰ kae ke mafai ai e koutou oi filifili te mea e hili ona lelei. Ma ka mafai ai koutou ke mamā ma hē taku kinoagia i te Aho o Keliho.

¹¹ Ka fakatumulia outou ōlaga i nā uiga e lelei kātoatoa e ala ia Iehu Keliho, kae ke ifo ma viviki ake ai ia tagata ki te Atua.

Ko te Ola Tautua ki a Keliho ko te Ola Moni Ia

¹² Te kau uho, ko au e fofou ke koutou iloa ko te mea kua tupu ki a te au, kua ātili lele ai te tokalahi o tagata kua fakalogo ki te Tala Lelei.

¹³ Kua iloa e nā leoleo Loma uma ma nā tino uma lele i kinei, ko au e i te falepuipui ona ko au ko he kaukauna e a Keliho.

¹⁴ Kua kavea toku i te falepuipui ma mea e mautū ai te talitonu o te tokalahi o te kau uho Kelihiano ki te Aliki, ma ka ātili tupu ai pea to lātou fakamālohi ki te tālakiga o te fekau e aunoa ma he mataku.

¹⁵ E hako e i ei nā tino e tālaki e ki lātou e uiga ki a Keliho ona e loto kino ma teteke mai ki a te au, kae e i ei foki iētahi e tālaki e ki lātou i te agaga moni

¹⁶ ma te alofa, auā e ki lātou iloa ko au kua tōfia e te Atua ke fakamāonia te moni o te Tala Lelei.

¹⁷ Ko iētahi tino, e hē tālakia e ki lātou e uiga ki a Keliho i te agaga moni, kae i te agaga fia hili ma te fakapito; e taumafai ki lātou ke fai nā mea ke ātili āfāina lahi ai au, ka ko i te falepuipui au.

¹⁸ E hē āfāina! Ko au e fiafia ki ei — pe kāfai ka kavea tēnā ma auala ke tālaki ai e uiga ki a Keliho i ho he auala e mafai ai, e tuha lava pe hehē pe hako te agaga e fai ai. Ma ka tūmau pea lava toku fiafia,

¹⁹ auā e iloa e au ko autou tatalo fakatahi ai ma te fehoahoani mai o te Agaga o Iehu Keliho, ka tatala ai au mai oku noanoataga.

²⁰ Ko te mea e fakamoemoe ma naunau lahi au ki ei, ke nahe i ei lele he taimi e fakahētonu ai taku gāluega, kae i taimi uma lava, kae maihe lava te taimi nei, ke tumu au i te loto toa, kae ke fakaaogā ai toku tagata kātoa ke maua ai he vīkiga mo Keliho, e tuha lava pe ola ai au, pe oti ai.

²¹ Auā ko he ā nei te ola? Ia te au, ko te ola ko Keliho. Kāfai la ia au e oti, ka maua ai e au iētahi mea e lahi atu.

²² Kae kāfai e kavea toku ola pea ma mea ke toe fai ai e au ni iētahi gāluega lelei, oi kua hē kō hāfia la pe ko tēfea te mea ka fai.

²³ E fetoho lava i toku māfaufau nā mea iēnei e lua. Ko au e fofou keina tukua e au te ola tēnei ke fakatahi ma Keliho, auā e hili atu tēnā;

²⁴ kae ona e manakomia e koutou taku fehoahoani, e tāua lahi atu ai ke ola pea au.

²⁵ E mautinoa e au te mea tēnei, ma e iloa e au ko au e hē oti kae ka fakatahi pea au ma koutou uma, ke fakatupu ātili ai te koutou fiafia e ala i te talitonu ki a Iehu Keliho;

²⁶ ma kāfai la ka toe āhiāhi atu au ki a te koutou, ka fakaatili lele ai te koutou fiafia i te māfutaga fakatahi ma Keliho Iehu, ona ko te mea na tupu ki a te au.

²⁷ Ko te mea la e tāua, ke olo tutuha te ōlaga e ola ai koutou ma nā mea e lea mai ai te Tala Lelei a Keliho, ma e tuha lava pe fanatu au pe hēai, ka iloa e au ko koutou e tutū fakatahi, ma e tahi te fakamoemoe ma tahi te lagona e tau ai koutou mo te Tala Lelei.

²⁸ Koutou nahe mātataku i nā tino e teteke atu ki a te koutou; loto toa i taimi uma ma ka fai tēnā ma fakamāoniga ki a te ki lātou, ko ki lātou ka fakatōkilalogia ka ko koutou ka manumālō, ona ko te Atua e ia fōkiatua te manumālō ki a te koutou.

²⁹ Auā kua fōki atu ki a te koutou te avanoa fakapitoa ke kaukauna ai koutou ki a Keliho, e hē gata ona ko koutou e talitonu pea lava ki a te ia, kae ona foki ko koutou e maua pea lava i nā puapuagā ona ko ia.

³⁰ Ko koutou ma au e tau fakatahi i te taua. Ko te taua lava e tahi na koutou kitea e tau e au i nā aho kua teka, ma koi tau ai pea lava toku tagata nei, ke pa mai lava ki te taimi nei.