Filemoni 1 - Tokelauan New Testament

¹ Mai ia Paulo, tē kua kavea ma pagotā ona ko Keliho Iehu, ma to tātou uho ko Timoteo — Ki a Filemoni, te uō ma te hoa i luga o te gāluega,

² ma te Ekalehia e fai tāpuakiga i tō fale; ma te tuafafine ki a Afia, ma ki a Alihipo to mātou hoātau e vē he fitafita:

³ Ke ia te koutou te alofa tūnoa ma te fīlēmū mai te Atua to tātou Tamana ma to tātou Aliki ko Iehu Keliho.

Ko te Alofa ma te Talitonu o Filemoni

⁴ Ko nā taimi uma lava e tatalo ai au, e kō tākua pea lava tō igoa ma fakafetai au ki toku Atua.

⁵ Auā kua fakalogo au ki tō alofa ki tagata o te Atua, ma tō talitonu ki te Aliki ko Iehu.

⁶ Ko taku tatalo ko te fakatahiga a ki mātou ma koutou iēnā kua talitonu, ka maua ai he mālamalamaga lelei e uiga ki nā fakamanuiaga takitahi uma kua ki tātou mauagia, i te māfutaga ma Keliho.

⁷ Auā ko tō alofa, te uho pele, kua maua ai e au te fiafia lahi ma kua toe fakamālohi ātili mai ki a te au! Kua kē fakafiafiagia ia loto o tagata uma o te Atua.

He Talohaga e uiga ki a Onehimahi

⁸ Ona ko nā mea iēnei, e tatau ai ia te au, tō uho ia Keliho, ke fakatonu atu koe i nā mea e tatau ke fai e koe.

⁹ Kae ona ko au e alofa ki a te koe, ka hē kō fakatonua atu ai koe kae ko au ka fakatālohaga atu. E fai e au te mea tēnei e ui lava ko au ko Paulo, te hui o Keliho Iehu, ma i te taimi nei ko he pagotā ona ko toku tautua ki a Keliho.

¹⁰ Ko au la e talohaga atu ki a te koe e uiga ki a Onehimahi, ko he ataliki ki a te au e ala ia Keliho; auā na kavea au e vē ko he tamana ki a te ia, ka koi i loto au o te falepuipui.

¹¹ I he taimi kua teka atu, nae hēai hona aogā ki a te koe, kae i te taimi nei, kua aogā lele ia mo koe ma au.

¹² Ka kō uga atua ki a te koe, ma ko he mea tēnei e fakanoanoa ai foki toku loto.

¹³ Ko au nae fofou ke nonofo ki māua i kinei ka koi i te falepuipui ai au ona ko te Tala Lelei, kae ke kavea ai ma ō hui, ke fehoahoani mai ki a te au.

¹⁴ Kae ko au e hē fofou ke fakamālohia koe ke fehoahoani mai ki a te au; kae e lelei lava te fai e koe i tō loto malie. Ko te mea ia ka hē kō faia lele ai he mea, vaganā e malie koe ki ei.

¹⁵ Hōvē pe ko te mea ia na teka kehe ai ia Onehimahi ma koe mo hina taimi, kae ke toe kavatu ai ia ke fakatahi koulua i taimi uma.

¹⁶ I te taimi nei la, ko Onehimahi e hē nā ko he pologa, kae e hili atu lele ia i lo he pologa: ko ia ko he uho pele ia Keliho. Kai au te alofa ko ki ei! Kae e vēhea ake nei la te lahi lele atu o tō alofa ki ei, e hē gata ona ko he pologa kae i tētahi itū, ko he uho foki e ala i te Aliki!

¹⁷ Ko te mea ia, kāfai kua talia e koe ko au he hoā kaukauna ki a te koe, ke talia foki la e koe ma te fiafia ia Onehimahi, e vē lava ona kē talia au.

¹⁸ Kāfai na fai e ia he mea kino ki a te koe, pe kaitālafu atu ki a te koe i ho he mea, tuhi ifo ki toku igoa nā mea iēnā.

¹⁹ Tēnei ka tuhi e au ki lalo i toku lima: Ko au ko Paulo, ka toe totogi atu e au taku kaitālafu ki a te koe. (E hē tau kō fakamanatu atua foki ko koe e nofo kaitālafu mai ki a te au e ala i tō ōlaga fou ia Keliho.)

²⁰ Io te uho, e fia kō mauagia he fehoahoani mai ia te koe mo te gāluega a te Aliki; toku uho ia Keliho, fakafiafia mai ko toku loto e koe.

²¹ Ona ko au e talitonu ko nā mea e lea atu ai au e fai e koe, ko te mea kua tuhi atu ai au — ko te meamoni, e iloa e au ka lahi lele atu nā mea e fai e koe i lo nā mea e lea atu ai au.

²² Ko tētahi mea la, hāuni ko he potu mo oku, auā ko au e fakamoemoe ka tali mai te Atua ki autou tatalo, ma ka mafai ai au ke toe fanatu ki a te koutou.

Nā toe Kupu

²³ E alofa atu ki a te koutou ia Epafalahi tēnei e i te falepuipui fakatahi ki māua e ala i te tautua ki a Keliho Iehu,

²⁴ ma e vēnā foki oku hoa i luga o te gāluega, ia Maleko, Alihitako, Temahi, ma Luka.

²⁵ Ke ia te koutou uma te alofa tūnoa o te Aliki ko Iehu Keliho.